Leh knăm mgrông mnơ̆ng ngă yang, lehanăn knăm ngă yang, ti sang yang Âu Lạc dlông čŏng čư̆ Phượng Hoàng hlăm alŭ wăl hiu chcưn ênguê Drai Prenn, ƀuôn prŏng Đà Lạt, Phung khua kiă kriê lehanăn mnuih ƀuôn sang čar Lâm Đồng mbĭt hŏng lu phung tue hiu čhưn ênguê bi nao čuh brui mngưi. Êngao kơ knăm, mkŏ mjing klei bi hdơr kơ phung mtao Hùng Vương thŭn anei čar Lâm Đồng lŏ mâo lu klei mdah kdŏ muiñ, klei hlăp mbul ênhiang djuê ana, đĭ gơ̆ng hla čhiăm gru êbhơr, čăm gŏ lăn, klei rang mdah mnơ̆ng ƀơ̆ng Việt Nam, čih klei due, rang mdah rup.

Ti Dak Lak, Knăm bi hdơr Hruê djiê mtao Hùng Vương thŭn 2025 dưi mkŏ mjing ti Knhuah gru hƀuê ênuk Sang yang Lạc Giao, ƀuôn prŏng Ƀuôn Ama Thuôt. Leh hdră tông čing mơ̆ng djuê ana Êđê mơ̆ng êpul tông čing ƀuôn Kŏ Tam, Knăm bi hdơr hruê djiê Mtao Hùng Vương ti Dak Lak dưi mkŏ mjing hŏng klei bhiăn  knăm ngă yang mâo mơ̆ng đưm mâo êpul ngă yang phung Nữ quan hluê ngă.

Phung bi ala nao čuh leh brui mngưi lehanăn dŭm mta mnơ̆ng lŏ hma, mnơ̆ng dliê kmrơ̆ng jăk ti alŭ wăl truh kơ knưng ngă yang kơ Mtao hùng; hưn mthâo boh tŭ dưn lehanăn lŏ bi hdơr knhuah gru kdrưh kơăm mơ̆ng phung mtao Hùng Vương ênuk mkŏ mkra ala čar, hƀuê ênuk kdơ̆ng mblah sua wĭt klei hnŭk êngiê, hluh lir ala čar. Nguyễn Tuấn Hà, kơiăng khua Anôk bruă sang čư̆ êa čar Dak Lak bi ala bruă knŭk kna, mnuih ƀuôn sang dŭm djuê ana čar Dak Lak hưn mthâo leh boh tŭ dưn kơ phung mtao Hùng kơ dŭm boh tŭ êdah êdi mâo mnuih ƀuôn sang dŭm djuê ana ti čar mâo leh hlăm thŭn êgao.

Hlam dua hrue mdei knhal jih hrue kăm, lehanăn hrue bi hdơr kơ phung mtao Hùng Vương (mơ̆ng 8 - 10 mlan 3 hlue mlan ƀlĕ), dŭm pluh êbâo čô tue ruah leh čar  Kon Tum jing anôk truh, lehanăn mnuih ƀuôn sang lŏ wĭt hdơr kơ phŭn agha jăk siam. Anôk phung tue truh ti Kon Tum hlăm knăm bi hdơr kơ mtao Hùng Vương jing wăl krah Măng Đen, kdriêk Kon Plông, hŏng giăm 20.000 gưl čô tue. Mâo lu phung tue nao ti anôk ngă yang kơ phung mtao Hùng, msĕ si anôk Lương Khế ti ƀuôn prŏng  Kon Tum, sang yang Tháp Kỳ Quang, kdriêk Đăk Hà, čiăng mđrăm mbĭt hŏng mnuih ƀuôn sang alŭ wăl, čuh brui mngưi bi hdơr kơ phŭn agha./.