Knăm Festival Mnga Đà Lạt tal X - 2024 dưi dlăng jing sa hlăm dŭm hdră prŏng êdi mơ̆ng êlâo truh kơ ară anei ti Đà Lạt hŏng ênhă anôk mdah klei kdŏ mmuñ anei truh giăm 2.000 m2. Klei êdah êdi mơ̆ng knăm anei jing 5 anôk mdah rup hŏng pui Led prŏng, truh 1000m2. Kdrăp mdar lehanăn kdrăp mtrang pui mngač ênuk mrâo dưi yua hlăm knăm kdŏ mmuñ anei.

Kdrăp anôk mdah klei kdŏ mmuñ anei hŏng dŭm wăl anôk dưi mjing msĕ si sa anôk mkra phim rup hŏng lu mta êa mil mbĭt hŏng dŭm anôk bi msiam hŏng mnga mơ̆ng ƀuôn prŏng Đà Lạt msĕ si: mnga Hồng, Mimosa, Cẩm Tú Cầu, mnga phĭ, hlăm anăn rup “Mnga phĭ” dưi ba yua lu bi êdah ai tiê hgŭm mguôp lehanăn gĭr ktưn kpưn đĭ mơ̆ng anak mnuih Đà Lạt. Mlan mphŭn pŏk Festival mnga  Đà Lạt tal X - 2024 hŏng anôk mdah jăk siam lehanăn prŏng srăng mjing klei tui ksiêm amâo hnơ̆ng kčah ôh kơ dŭm êbâo čô tuê hiu čhưn ênguê./.