Êbeh 3 mlan hŏng anei, grăp mmăt mơ̆ng knăm sa truh kơ knăm êma grăp hruê kăm, adŭ msir klei amâo thâo hră ti Sang hră gưl sa Trần Phú, să Ia Dom, kdriêk Đức Cơ lŏ guh mngač lehanăn kwang ênai răk boh hră. Adŭ hriăm mâo 40 čô jing mnuih djuê ƀiă hriê mơ̆ng dŭm ƀuôn ti să Ia Dom, kdriêk knông lăn Đức Cơ, čar Gia Lai.

Ti adŭ hriăm, aduôn Siu H’Phem, ƀuôn Mok Đen 2, să Ia Dom, kdriêk Đức Cơ, 54 thŭn, mnuih hriăm khua thŭn hĭn hlăm adŭ dôk čih boh hră. Ñu yăl dliê, thŭn khua, hriăm êmưt ƀiădah ñu kriăng nao hriăm ti adŭ, ară anei ñu thâo răk, thâo čih leh anăn pô.

“Ară anei, kâo dôk gĭr hriăm hlăm adŭ msir klei amâo thâo hră hŏng mta kñăm tal êlâo hĭn jing čiăng kơ kâo thâo čih, thâo răk, thâo čih anăn pô, thŭn kkiêng pô lehanăn mnuih riêng gah, kyua anăn kâo gĭr hriăm hŏng jih ai tiê. Kâo hriăm adŭ msir klei amâo thâo hră anei amâo djŏ knŏng čiăng kâo thâo ƀiădah lŏ mtô kơ phung čô anak kâo.

Ƀă anak 5 mlan ti rŏng, amai Rơ Mah H’Với, ƀuôn Mok Đen 1, să Ia Dom dôk mđing hmư̆ nai mtô. H’Với brei thâo: 26 thŭn, mâo 3 čô anak, klei hdĭp dleh dlan. Adŭ hriăm jing klei găl čiăng kơ amai hgao klei dleh dlan, kyua anăn H’ Với kriăng nao hriăm hlăm grăp mmăt khădah sang kbưi hŏng adŭ hriăm giăm 10km.

Kâo hriăm adŭ msir klei amâo thâo hră anei hŏng klei čang hmăng dưi thâo hră lehanăn lŏ mtô kơ phung čô anak, mbĭt anăn tơdah ngă ya hră mơar thâo siñê boh hră pô tinăn. Gŏ sang kâo dleh dlan kyua anăn amâo mâo klei găl dưi nao sang hră, ară anei mâo klei mđing dlăng mơ̆ng bruă sang čư̆ êa alŭ wăl pŏk adŭ msir klei amâo thâo hră kâo gĭr nao hriăm, čiăng ênưih hlăm klei ngă hră mơar pô.

Nai mtô Trương Thị Cúc, pô mtô adŭ msir klei amâo thâo hră ti Sang hră gưl sa Trần Phú brei thâo, păt čĭng jih phung hriăm adŭ anei khua thŭn sơaĭ, jing mnuih djuê ana ƀiă, hruê mlan mưng hŏng bruă pưk hma. Nai mtô brei mâo klei gĭr hlăm bruă mtô bi hriăm čiăng kơ jih mnuih hriê hriăm thâo dlăng, thâo răk, thâo čih boh hră.

“Kâo mơak êdi hlăk ƀuh mâo lu mnuih hriê hriăm, diñu čiăng hriăm, diñu čiăng thâo lu wăl lăn mnga êa mơak jăk siam mơ̆ng Việt Nam dôk mđing hmư̆ êdi klei nai mtô. Phung hriê hriăm pap êdi dlăng kơ digơ̆, lu jing gŏ sang ƀun, gŏ sang dleh dlan, diñu čiăng thâo hră. Hdră mtô brei ksiêm dlăng klă klơ̆ng grăp čô hriăm, dlăng kluôm ăt suaĭ mơh phung nai mtô adŭ anei.

Khă snăn, hluê si nai Phan Thị Tâm, pô lu thŭn mtô adŭ msir klei amâo thâo hră, wưng tal êlâo đru kơ mnuih ƀuôn sang thâo răk, thâo čih hŏng klei jăk găl, ƀiădah wưng êdei ênoh hđeh hriê hriăm mâo lu klei bi mlih mơh, ƀiă hĭn kyua lu mta klei. Mâo lu blư̆ phung nai kreh nao truh ti grăp sang nao mdiăng mnuih hriăm.

“Truh ti wưng tal 2, phung hriăm mâo klei thâo săng snei, thâo răk, thâo dlăng, thâo čih mĭn snăn dưi leh kyua anăn diñu lŏ hnêč nao kơ pưk hma, mâo phung êdam êra hlăm gưl thŭn mă bruă nao ngă bruă ti Bình Dương kyua anăn ênoh mnuih hriăm trŭn. Bruă mtrŭt mjhar mnuih nao hriăm ăt tuôm hŏng lu klei dleh dlan kyua diñu wĭt mă bruă êla, mâo phung hriăm ƀun knap êdi, amâo mâo êa săng êdeh nao hriăm. Phung nai nao mtrŭt brei prăk blei êa săngm nao mdiăng, mtrŭt hŏng yan hdră čiăng kơ diñu dưi nao hriăm djăp ênŭm.

 Hluê ngă hdră msir klei amâo thâo hră wưng thŭn 2021 – 2025, kdriêk knông lăn Đức Cơ pŏk leh 20 adŭ msir klei amâo thâo hră kơ êbeh 600 čô hriăm. Đức Cơ mkŏ mjing leh anôk bruă mmtô bi hriăm, msir klei amâo thâo hră ti dŭm alŭ wăl, kah mbha klei đua klam kơ grăp čô ksiêm dlăng grăp alŭ wăl mdê mdê; hluê ngă hdră ksiêm dlăng, đru kơ dŭm alŭ wăl dleh dlan. Siu Luynh, Kơiăng khua Anôk bruă sang čư̆ êa kdriêk Đức Cơ brei thâo:

“Leh mnuih ƀuôn sang thâo răk, thâo čih, bruă mtô mblang kơ mnuih ƀuôn sang ênưih hĭn mơh, bruă răng mgang klei tŭ dưi kơ mnuih ƀuôn sang dưi krơ̆ng kjăp. Mơ̆ng hdră tĭng dlăng snăn mnuih khua thŭn thâo răk, thâo čih boh hră diñu mơak êdi, jih boh sang gĭr hriăm, amĭ ama, phung anak, aduôn aê hriăm sơaĭ. Bi hŏng bruă sang čư̆ êa alŭ wăl, ênưih mơh kơ bruă bi trông klei hâo hưn, dŭm hdră bruă hưn mtruh hŏng mnuih ƀuôn sang ăt găl ênưih hĭn mơh.

 Dŭm angpul pui đ’điêt hlăm adŭ msir klei amâo thâo hră dôk guh mngač hlăm grăp mmăt, đru bi tuič mngač klei čang hmăng lehanăn klei đăo knang hlăm klei hdĭp jăk siam hĭn mơ̆ng mnuih ƀuôn sang djuê ana ƀiă ti krĭng knông lăn Đức Cơ, Gia Lai./.