- Snăn ơ Nguyễn Thụy Phương Hiếu, hiu čhưn ênguê ti čar Dak Lak jiă kma knhuah dhar kreh dŭm djuê ana, mpŭ kơ čư̆ dliê êa, mđing mđĭ kyar hơĭt kjăp. Klei anei mâo mơ̆ng si hdră tă mđĭ kyar mơ̆ng alŭ wăl?

 Nguyễn Thụy Phương Hiếu: Dak Lak bi mklă leh klei găl pô jing mđĭ kyar hiu čhưn ênguê leh anăn dhar kreh. Hŏng 49 djuê ana hdĭp mda ăt jing sa klei găl mjing klei bi mkă kơ Dak Lakk hŏng dŭm alŭ wăl mkăn, mjing lu mnơ̆ng dhơ̆ng hĭn čiăng iêô jak phung tue hruê ti alŭ wăl.

Bruă Đảng čar mâo leh hdră bruă mđĭ kyar hiu čhưn ênguê, anei jing tur kơ dŭm anôk bruă, alŭ wăl kƀĭn mđĭ kyar 3 kmeh gơ̆ng phŭn kơ hiu čhưn ênguê, mâo ƀuôn prŏng Ƀuôn Ama Thuôt, Lăk leh anăn Ƀuôn Đon. Dŭm kdriêk, wăl krah riêng gah srăng jing dŭm bruă đru, mkŏ mjing dŭm hdră, tuôr hiu čhưn dlăng.

 Dak Lak dôk hlăm jar dhar kreh čing čhar Lăn Dap Kngư, snăn ăt ƀuăn rơ̆ng hŏng

UNESCO kơ klei răng mgang čing čhar. Hlăm wưng 2021 - 2025, čar mâo leh lu hdră mtrŭn kơ čing čhar, hdră mtrŭn đru kơ mnuih ƀuôn sang dŭm alŭ, ƀuôn mđĭ kyar hiu čhưn ênguê êpul êya. Kƀĭn hlăm klei găl, hdră bruă, hdră êlan mđĭ kyar bruă duh mkra krĭng mnuih djuê ƀiă, mđĭ lar mâo boh phŭn kơ hiu čhưn ênguê čiăng răng mgang dhar kreh, mđĭ kyar mnơ̆ng dhơ̆ng hiu čhưn ênguê.

- Hlăm wưng êgao snăn si boh tŭ bruă mđĭ kyar hiu čhưn ênguê hlue hdră anei?

Nguyễn Thụy Phương Hiếu: Grăp thŭn snăn hnơ̆ng đĭ kyar kơ hiu čhưn ênguê, wăt prăk hrui wĭt mơ̆ng hiu čhưn ênguê leh anăn tue hiu čhưn êbeh hlăm brô mơ̆ng 10 – 15%, wăt phung tue hlăm ala čar leh anăn tue ala tač êngao. Wăt tơdah găn 2 thŭn klei ruă tưp Covid-19, ƀiădah hnơ̆ng đĭ kyar wưng 2021 -2025 êbeh mkă hŏng hdră kčah.

- Mđĭ kyar hiu čhưn ênguê leh anăn dhar kreh mơ̆ng klei găl mâo leh, hlăk êjai lu čar ƀuôn prŏng mkăn ăt dôk ngă hlue hdră anei, snăn si čar Dak Lak ngă čiăng hưn mthâo klei jăk siam mdê hjăn mơ̆ng alŭ wăl hŏng phung tue hiu čhưn?

Nguyễn Thụy Phương Hiếu: Hlăm hdră tă mđĭ kyar hiu čhưn ênguê mơ̆ng čar mâo bruă bi hgŭm hŏng alŭ wăl, snăn čar kƀĭn ruah alŭ wăl mâo klei găl hiu čhưn ênguê leh anăn mâo êlan phiơr mkŏ hŏng Dak Lak. Ară anei čar bi hgŭm leh hŏng 14 čar, ƀuôn prŏng leh anăn sa êpul hlăm wăl tuh tia mkra mjing ti ƀuôn prŏng Hồ Chí Minh. Kyua mâo klei bi hgŭm snăn hlăm dŭm hdră mtrŭt mjhar hưn mdah snăn hlăm mbĭt mkŏ mjing hdră kƀĭn mđĭ lar ai ktang mơ̆ng êa ksĭ hŏng dliê. Hŏng phung hiu čhưn ala tač êngao snăn mơ̆ng dŭm anôk mkŏ msĕ si Khánh Hòa, Hà Nội, ƀuôn prŏng Hồ Chí Minh čiăng iêô jak phung tue hriê ti čar. Pral mkŏ, hgŭm hlăm bruă hŏng tač êngao čiăng hưn mdah rup, klei găl kơ dhar kreh, anak mnuih Dak Lak hŏng dŭm alŭ wăl.

- Snăn msĕ si ih mrâo lač snăn mđĭ lar klei găl grăp alŭ  wăl, mkŏ êa ksĭ - dliê čiăng bi đru mbŏ jing hdră Dak Lak mkŏ mđĭ kyar hiu čhưn ênguê. Snăn, hkăn ti čar Dak Lak srăng mđĭ bruă hiu čhưn ênguê si ngă čiăng iêô jak leh anăn krơ̆ng phung tue hiu čhưn?

Nguyễn Thụy Phương Hiếu:  Knơ̆ng bruă tă hdră kơ dŭm anôk bruă pral mkŏ mjing mnơ̆ng dhơ̆ng mrâo mơ̆ng tur knơ̆ng dhar kreh čiăng mjing klei mrâo, mdê. Mđĭ hnơ̆ng jăk kơ kriê dlăng knŭk kna, mkŏ mjing mtô bi hriăm kơ mnuih mă bruă ti alŭ wăl. Ngă djŏ klei čiăng ƀrư̆ lu mơ̆ng phung tue. Mđĭ ktang bruă ngă mơ̆ng êpul hgŭm hiu čhưn ênguê, mkŏ mjing dŭm êpul hgŭm bruă, mđĭ lar klei găl mơ̆ng bruă mkăn, mơ̆ng klei dhar kreh, hiu čhưn ênguê amâodah klei bi lông mjuăt asei mlei Dak Lak mkŏ mjing čiăng iêô jak tue hriê hŏng alŭ wăl.

 Hlăm mlan 10 anei, Knơ̆ng bruă srăng kčĕ kơ Knơ̆ng bruă sang čư̆ êa čar mkŏ mjing klei bi kƀĭn ksiêm dlăng hdră bi hgŭm, mơ̆ng anăn srăng mkŏ mjing hdră bi hgŭm hlăm wưng mrâo tŭ dưn hĭn. Mbĭt anăn, Êpul hgŭm hiu čhưn ênguê Dak Lak ăt srăng mkŏ mjing thiăm 2 êpul hgŭm dơ̆ng, jing êpul hgŭm Sang jưh - mnơ̆ng ƀơ̆ng huă leh anăn Êpul hiu čhưn dlăng, mđĭ lar klei găl mđĭ kyar hiu čhưn ênguê ti alŭ wăl.

-Lač jăk kơ Nguyễn Thụy Phương Hiếu, K’iăng Khua Knơ̆ng bruă dhar kreh , mjuăt ktang asei mlei leh anăn hiu čhưn ênguê Dak Lak.