Knhuah gru wăl anôk ngă bruă lŏ hma Rossi ti êlan Trần Hưng Đạo, ƀuôn hgŭm Đạt Hiếu, wăl krah Ƀuôn Hô, jing sa hlăm dŭm wăl anôk ngă bruă lŏ hma pla kphê lehanăn ksu mâo mnuih Prăng mkŏ mjing ti Dak Lak hlăm thŭn 1926. Anei lŏ jing anôk kruăk hdră krŭ kdơ̆ng ti Lăn dap kngư hlăm 2 hdră kdơ̆ng mblah mơ̆ng djuê ana. Boh nik, hlăm hdră kdơ̆ng mblah hŏng Mi, ti wăl anôk ngă bruă lŏ hma Rossi mđĭ kyar leh 1 êpul bruă Đảng, 1 êpul bruă êdam êra lehanăn anôk bruă mnah mplĕ hŏng 16 čô mnuih mă bruă nao hgŭm. Mnuih mă bruă lehanăn Khua wăl anôk ngă bruă lŏ hma Rossi mkăp leh mnơ̆ng ƀơ̆ng huă, phao ktuang kơ hdră krŭ kdơ̆ng; đru kơ Dhar bruă Duh mkra mơ̆ng čar Dak Lak blei dŭm êtuh ton mnơ̆ng dhơ̆ng ba dŭ mdiăng ti krĭng kđông kahan mơ̆ng čar.

Mơ̆ng thŭn 2018, wăl anôk ngă bruă lŏ hma Rossi mâo leh Anôk bruă sang čư̆ êa čar Dak Lak bi mklă jing Knhuah gru hƀuê ênuk gưl čar. Ară anei, tinei lŏ dôk hdră sang dôk lehanăn sang mă bruă mơ̆ng Khua wăl anôk anei, kbăng êa, sang tŭk knă êsei djam, hjiê mkra klŏ ê’ăt, brŏng êa ăt dôk hrông msĕ hđăp. Čiăng mkra mđĭ, mđĭ lar boh tŭ yuôm knhuah gru wăl anôk ngă bruă lŏ hma Rossi mkăp kơ hdră hiu čhưn ênguê, Nai prĭn Lương Thanh Sơn, Khua hđăp Sang kriê pioh mnơ̆ng dhơ̆ng đưm čar Dak Lak lač snei, brei mâo klei ksiêm dlăng kluôm hŏng wăl knhuah gru anei. Lương Thanh Sơn brei thâo snei:

“Drei knŏng mđing kơ sang khua wăl anôk ngă lŏ hma anei đuič, ka mđing ôh kơ dŭm boh sang krum mơ̆ng phung mă bruă mnuih Êđê tinei. Jih krĭng djiêu gah anei jing mnuih mă bruă krah hjăn, mđiă dôk mjing dŭm asăr kphê siam ti wăl anôk anei. Snăn, djiêu gah wăl anôk ngă bruă lŏ hma Rossi mâo ya ƀuôn, adôk dŭm boh sang krum, sang dlông, anăn jing sa kdrêč mơ̆ng wăl anôk anei, amâo djŏ knŏng mĭndah hjăn anôk ngă bruă anei, ôh, ya ngă drei amâo bi mguôp mbĭt čiăng atăt tuê hiu čhưn hriê čhưn dlăng.

Ară anei, bruă knŭk kna alŭ wăl dôk duah hdră čiăng mkra mđĭ wăl anôk ngă bruă lŏ hma Rossi anei mbĭt anăn mđĭ hdră hưn mthâo, mtrŭt mđĭ bruă hiu čhưn ênguê… Y - Cing Mlô, Kơiăng khua Anôk bruă sang čư̆ êa wăl krah Ƀuôn Hô brei thâo:

"Leh mkra mđĭ wăl krah srăng mkŏ mjing hdră mtrŭt mjhar, iêu mthưr klei đru mguôp dŭm mta hră mơar, mnơ̆ng dhơ̆ng, čiăng bi msiam, lŏ krŭ wĭt, mkŏ mjing hdră hiu čhưn ênguê bi mguôp hŏng dŭm anôk hiu čhưn ênguê mkăn.

Ăt hưn mdah hŏng čar mjing wăl anôk anei jing sa hlăm dŭm anôk jak iêu tuê hriê čhưn. Hmei ăt gĭr gai dŭm anôk bruă, boh nik anôk bruă mtô bi hriăm ruah anei jing sa hlăm dŭm anôk mkŏ mjing hdră mtô bi hriăm êngao adŭ hriăm čiăng hriăm mjuăt kơ hƀuê ênuk, knhuah gru đưm, mđĭ lar boh tŭ yuôm mơ̆ng hƀuê ênuk knhuah gru anei./.