Dŭm hruê knhal jih thŭn, mnuih Bahnar ti ƀuôn Mơ Hra, să Kông Lơng Khơng, kdriêk Kbang, čar Gia Lai hơ̆k mơak kƀông tlao drông êpul hiu čhưn mơ̆ng Hà Nội. Phung tuê hiu čhưn lông ƀơ̆ng điŏ brông êun hlăm đĭng mơô, mnŭ ăm jăk snăk leh anăn čeh kpiê mnâo ƀâo mngưi; kdrăm kơah hlăm ênai čing čhar. Amai Lê Thị Phương, tue hiu čhưn mơ̆ng Hà Nội, brei tthâo:

“Anei jing gưl tal êlâo kâo hriê ti Gia Lai, ăt jing gưl tal êlâo kâo dlăng klei tông čing Lăn Dap Kngư. Leh anăn mâo phung hđeh tông mbĭt, ƀuh jăk snăk leh anăn khăp snăk, kâo ƀuh êđăp ênang leh anăn hơĭt hlăm ai tiê”.

 Mbĭt Mơ Hra, xã Kông Lơng Khơng, kdriêk Kbang, čar Gia Lai mkŏ mjing leh dŭm ƀuôn hiu čhưn  ênguê êpul êya mnuih Bahnar, mâo: Kdang (să Kông Lơng Khơng), Stơr să Tơ Tung), Kon Bông (să Đak Rong) leh anăn Chiêng (wăl krah Kbang). Khua mduôn Đinh Mưnh- ƀuôn Mơ Hra, să Kông Lơng Khơng brei thâo:

“Hmei mprăp homestay jing sang krum kơ phung tue pĭt, gŏ sang srăng knă êsei hlue si klei bhiăn pô hŏng braih mdiê hma, mă kan hlăm êa hnoh, čeh kpiê kơ tue mnăm, mmuñ  snăn digơ̆ mơak. Diñu khăp snăk. Tue hruê snăn pĭt ti sang dưi sơăi. Kâo jih khua mduôn, kâo mâo bruă klam hŏng mnuih ƀuôn sang leh anăn gĭr ngă”.

Amai Trần Thị Bích Ngọc- sa čô mă bruă hlăm Knơ̆ng bruă sang čư̆ êa să Kông Lơng Khơng, kdriêk Kbang brei thâo, bruă răng mgang dhar kreh djuê ana mơ̆ng anôk dôk truh klei bhiăn hdĭp mda dưi mđing dlăng čiăng đru kơ mnuih ƀuôn sang hiu čhưn ênguê hơĭt kjăp:

Mơ̆ng bruă ngă hiu čhưn ênguê êpul êya snăn dŭm mta mnơ̆ng kriê pioh ăt mâo mnuih ƀuôn sang lŏ mkŏ mjing msĕ si čing čhar, hrĭ mñam, pơ̆k mñam. Mnuih ƀuôn sang gĭr răng kriê mđĭ lar ênoh yuôm dhar kreh leh anăn mđĭ kyar hiu čhưn ênguê čiăng iêô jak tue hiu čhưn. Mơ̆ng anăn srăng đru mguôp thiăm hlăm bruă duh mkra kơ mnuih buôn sang”.

 Amâo djŏ hjăn dŭm ƀuôn sang hiu čhưn ênguê ôh, ƀiădah ti dŭm să mâo lu mnuih djuê ƀiă, bruă răng mgang dhar kreh mđing kơ ngă bruă hiu čhưn ênguê hơĭt kjăp ăt dôk dưi pŏk ngă. Trần Xuân Nam, Khua Knơ̆ng bruă sang čư̆ êa să Lơ Ku, kdriêk Kbang brei thâo:

“Dŭm boh ƀuôn mâo klei ngă êlâo, răng mgang mđĭ lar dhar kreh mnuih Bahnar. Êngao anăn hmei bi lar dŭm klei dhar kreh mnuih ƀuôn sang nah Dưr msĕ si mnuih Mông, Tày čiăng kơ jăk siam hĭn dhar kreh ti alŭ wăl. Boh nik hlăm gưl Tết, să mkŏ mjing knăm mơak yan mnga, iêô jak dŭm ƀuôn sang Bahnar hgŭm hlăm klei bi lông tông čing. Kyua anăn, lu ƀuôn ti să mâo klei thâo săng răng mgang dhar kreh djuê ana”.

Mơ̆ng thŭn 2022, kdriêk Kbang bi liê giăm 4 êklai prăk pŏk ngă Hdră bruă răng mgang leh anăn mđĭ lar ênoh dhar kreh mnuih djuê ƀiă mguôp hŏng mđĭ kyar hiu čhưn ênguê wưng 2021-2025. Đinh Đình Chi, Khua adŭ bruă dhar kreh hâo hưn mtô mblang kdriêk Kbang, brei thâo, alŭ wăl ăt bi mguôp lu klei găl čiăng đru kơ mnuih ƀuôn sang răng mgang dhar kreh, mjing klei duh ƀơ̆ng hơĭt kjăp klei hdĭp mda.

“Tal sa jing bi liê anôk bruă nah gŭ, tal dua jing răng mgang mđĭ lar ênoh yuôm mnơ̆ng kriê pioh dhar kreh mnuih ƀuôn sang alŭ wăl mkŏ dŭm alŭ wăl mjing sa tuor atăt tue hiu čhưn. Leh anăn tơdah tue truh leh snăn mtô kơ mnuih ƀuôn sang klei thâo mkŏ mjing hdră, bruă duh mkra; tal êlâo mă mnơ̆ng kriê pioh mjing tur knơ̆ng mđĭ kyar bruă hiu čhưn ênguê leh anăn ăt mă hiu čhưn ênguê čiăng lŏ kriê pioh bruă hiu čhưn ênguê leh anăn mjing bruă mă kơ mnuih ƀuôn sang.”