Sang yang mtao Hùng mâo rŭ mdơ̆ng ti čư̆ dlông, ti alŭ 6, să knông lăn Dak Buk So, kdriêk Tuy Đức, čar Dak Nông. Êlâo kơ hruê hdơr kơ knăm djiê mtao Hùng, mnuih ƀuôn sang kƀĭn mkra mjing sang yang: pô lŏ bi msiam hlăm mtih, pô kih mdoh hlăm wăl sang, pô lŏ dăp jhưng mdhô drông tue mrâo mkra. Chử Anh Chương, sa čô hlăm êpul kriê dlăng sang yang, brei thâo: hruê 10/3 hlue mlan ƀlĕ jing hruê mơak prŏng ti krĭng knông lăn anei hŏng phung kbưi hŏng ƀuôn sang Phú Thọ:

 “Jih jang grăp čô mnuih mđing kơ phŭn agha, klei mnuih ƀuôn sang thâo săng jing : Wăt tơdah djăp anôk nao, hdơr kơ knăm djiê mtao Hùng hruê 10-3 snăn wĭt.  Mnuih ƀuôn sang thâo snăn sơăi. Hmei mdơ̆ng sang yang anei čiăng mŭt hlăm gưl bi hdơr hruê djiê mtao Hùng 10-3 snăn ngă klei  bi hdơr, bi hlăm gưl knhal jih thŭn snăn mkŏ mjing klei bi tuôm hŏng phung ƀuôn sang Phú Thọ, kah bha klei thâo mă bruă knuă, klei ngă pưk hma, rông mnơ̆ng amâodah čhĭ mnia mnơ̆ng dhơ̆ng.”

Sang yang mtao hùng ti alŭ 6, să Dak Buk So mdơ̆ng hlăm sa wăl tač prŏng giăm 200o m2. Hlăm anăn, sang yang mâo mdơ̆ng hlue si knhuah rŭ mdơ̆ng yang mtao đdưm mâo ênhă hlăm brô 40 m2. Sang yang mâo mkŏ mjing hlăm gưl 7 tal, mâo wăl tač jŭm dar. Ti anăp knưl ngă yang mâo rup leh anăn mdhă čih anăn kkuh kơ Mtao Hùng. Êngao kơ sang yang, mnuih ƀuôn sang ăt mkŏ mjing sang drông tue prŏng siam, tač hlăp mjuăt asei mlei, knưl mdah klei kdŏ mmuñ…

Nguyễn Xuân Phúc, ti alŭ 8, să Dak Buk So, kdriêk Tuy Đức, brei thâo, mơ̆ng leh mphŭn rŭ mdơ̆ng  (thŭn 2018), sang yang jing leh anôk ngă bruă mđing kơ phŭn agha, răng kriê leh anăn mđĭ lar knhuah gru:

 “Hriê tinei kbưi hŏng ƀuôn sang, hmei mkŏ mjing Êpul mnuih ƀuôn sang Phú Thọ, leh anăn đru mguôp prăk blei lăn leh anăñ mdơ̆ng sang yang hdơr kơ Mtao Hùng leh anăn jing anôk bi kƀĭn êpul êya. Hmei răng kriê knhuah gru kơrŭ kkdơ̆ng mơ̆ng aê ama, mtô bi hriăm anak čô brei bi thâo săng mđing kơ phŭn agha, mâo bruă klam hŏng  čar kwar, gĭr mkŏ mjing ƀuôn sang tal dua mdrŏng sah.”

Ti krĭng knông lăn Dak Buk So, wăl krah kdriêk Tuy Đức, sang yang Mtao Hùng jing anôk čiăng mjĕ êrô, bi mguôp êpul êya. Amai Thị Chí (djuê ana M’nông) ti bon Bu Ndrung, să Dak Buk So brei thâo, ñu hlue đăo Khop, ƀiădah grăp gưl hdơr kơ knăm djiê mtao Hùng, nao čuh brui mngưi hdơr kơ phung mtao Hùng ti sang yang leh anăn bi tuôm hŏng grăp čô mnuih.

Dŭm hruê mdei Tết, knăm hdơr djiê mtao Hùng snăn kâo nao čuh ƀrui mngưi bi hdơr kơ phung mtao Hùng. Kyua mâo leh sang yang, kâo hŏng mnuih ƀuôn sang hlăm ƀuôn dưi bi mguôp, mjĕ êrô dhar kreh, kdŏ mmuñ, mjuăt asei mlei hŏng mnuih ƀuôn sang ti čar Phú Thọ hriê tinei mă bruă knuă leh anăn dŭm krĭng mkăn. Grăp čô hdĭp mbĭt jăk mơak.”

Ngô Văn Thương, Khua Knơ̆ng bruă sang čư̆ êa să Dak Buk So, hâo hưn, mơ̆ng leh mâo sang yang, hrue bi hdơr knăm djiê mtao  Hùng Vương, jing leh knăm mơak ti knông lăn:

 “Gưl bi hdơr knăm djiê mtao Hùng Vương, lu mnuih ƀuôn sang hlăm čar, kdriêk, să leh anăn gưl bruă Đảng, bruă sang čư̆ êa alŭ wăl truh sơăi čuh brui mngưi kơ phung mtao Hùng. Anei jing klei jăk siam dhar kreh mnuih ƀuôn sang alŭ wăl, boh nik mnuih ƀuôn sang Phú Thọ hdĭp mda ti alŭ wăl. Hmei ti să knông lăn, mâo lu djuê ana hdĭp mda, mơ̆ng anăn đru mkŏ mjing klei bi hgŭm jih jang djuê ana.”

 Bruă mkŏ mjing sang yang Hùng mnuih ƀuôn sang mơ̆ng krĭng lăn Mtao Hùng ti Đăk Buk So amâo djŏ knŏng đru răng kriê klei đăo, mđĭ lar knhuah gru krŭ kdơ̆ng, hyuă kjăp klei bi hgŭm dŭm djuê ana ti knông lăn Lăn Dap Kngư. Sang yang jing leh anôk mơĭt klei bi hdơr “mnăm êa hdơr kơ hnoh” leh anăn đru răng kriê, mđĭ lar ênoh yuôm dhar kreh, hƀuê ênuk djuê ana Việt Nam hlăm dŭm gưl ênuk./.