Ti ƀuôn Ea Mao, să Tân Tiến (Dak Lak), pô mbruă Hliêt, mnuih djuê ana Jeh Triêng (78 thŭn) thâo pơ̆k mñam mơ̆ng hlăk mrâo dôk ung. Ñu brei thâo, kmha mniê ñu jing pô mtô pơ̆k mñam kơ ñu.

“Đưm dih, mâo ñu mtô ktang êdi, tơdah pô mñam amâo mâo jăk, amâo răng ñu mă giê theh kngan pô… tơdah kâo bi mŭt mrai amâo mâo djŏ boh mnga ñu kreh teh hĕ kngan kâo…”

Kyua klei ktang anăn yơh mjing klei kjăp kngan kơ pô pioh kơ bruă ară anei. Hluê si klei pơ̆k mñam knhuah gru mơ̆ng mnuih Jeh Triêng, sa blah mnal kreh mâo mơ̆ng 4 -6 boh mnga msĕ si rup anak mnuih, čĭm čap, mtŭ, mnga…Pô mbruă Hliết brei thâo, čiăng bileh sa blah băn srăng luč mơ̆ng 7 - 10 hruê, čiăng kơ pô pơ̆k mñam mâo klei gĭr, mbruă, klă sĭt khăp kơ bruă, hlăm anăn dleh hĭn ăt jing đêč boh mnga, kyuadah knŏng soh sa aruăt lŏ wĭt ruh ngă.

Gĭr hŏng bruă pơ̆k mñam, đa đa pơ̆k mñam čiăng ba čhĭ, đa đa mđup brei kơ pô mkăn. Hŏng pô thâo mbruă Hliêt, klei yuôm bhăn hĭn amâo djŏ čhĭ mâo dŭm prăk, ƀiădah jing anak čô, găp djuê hlăm ƀuôn ăt čiăng kơ mnơ̆ng pơ̆k mñam. Ñu djă pioh bruă kyua khăp kơ anak čô, khăp kơ ƀuôn sang, leh anăn kyua khăp kơ bruă knhuah gru djuê ana pô.

Bi ti să Đăk Tô, čar Quảng Ngãi, pô mbruă Y Trường, mnuih djuê ana Jeh Triêng ăt hdĭp hŏng bruă pơ̆k mñam. Ñu dưi kkiêng leh anăn hriê kơ prŏng hlăm gŏ sang thâo pơ̆k mñam, mâo lu gưl mtô kơ klei pơ̆k mñam. Ƀiădah, leh amai nao dôk ung kbưi, amĭ ăt lui anôk pơ̆k mñam, bruă mă đưm ƀrư̆ ƀrư̆ luč ram. Klei anăn ngă kơ amai ênguôt êdi. Ñu wĭt bi trông hŏng amĭ, dua amĭ anak lŏ wĭt hdơr kơ bruă hđăp, lŏ dôk ti anôk giêng mrai, lŏ bi râo bruă knhuah gru.

Hluê si pô thâo mbruă Y Trương, klei mdê mơ̆ng klei pơ̆k mñam mnuih Jeh Triêng jing boh mnga leh anăn êa mil. Boh mnga nao mbĭt hŏng krĭng lăn pô hdĭp. Pô mbruă Y Trường brei thâo, pơ̆k mñam ară anei mâo thiăm êa mtah, kñĭ, ƀiadah êa hrah leh anăn jŭ ăt jing phŭn:

“Hŏng boh mnga djuê ana hmei jing bi hmô kơ krĭng lăn pô hdĭp, ti krĭng lăn mâo lu kbuôn, čŏng čư̆ boh mnga srăng mdê mơh…”

Bruă pơ̆k mñam mơ̆ng mñuih Jeh Triêng ară anei dưi krŭ wĭt ƀrư̆ ƀrư̆, kyua internet yang ƀuôn, mnơ̆ng pơ̆k mñam mâo lu mnuih thâo. Klei phung mniê Jeh Triêng hmăng hmưi hĭn amâo djŏ dưi čhĭ lu prăk, ƀiădah lŏ mâo thiăm dŭm gưl phunug mda asei dôk ti anôk giêng mrai, hriăm leh anăn djă pioh bruă mơ̆ng aduôn, mơ̆ng amĭ. A Mrông, ti să Tân Tiến, čar Dak Lak ăt hmăng hmưi mâo thiăm wăl anôk čiăng kơ phung thâo mbruă krŭ wĭt leh anăn lŏ mtô bruă knhuah gru kơ phung mda asei.

“Leh ba yua sang dhar kreh să, hmăng hmưi phung thâo mbruă srăng mâo dŭm anôk hrĭ mñam, pơ̆k mñam hŏng wăl anôk prŏng, jăk găl hĭn, lŏ dơ̆ng djă pioh bruă knhuah gru djuê ana pô kơ phung mda asei hriăm leh anăn hluê ngă.”

Ênai giêng mrai ară anei ăt dôk kwang hlăm sang, buôn sang mnuih Jeh Triêng. Ênai anăn amâo djŏ knŏng pơ̆k mñam mơiêng ao, băn msăm, ƀiădah jing anôk djă pioh bruă đưm mơ̆ng ƀuôn sang, krơ̆ng kơ mngăt êwa dhar kreh djuê ana ti anăp lu klei mlih hlăm klei hdĭp.