Alum kkuh kơ ayŏng Y Lêvi Niê Siêng.  Dưi thâo ih mâo bi mni jing sa čô mda asei êdah êdi hlăm bruă kriê pioh leh anăn lar bra dhar kreh čing čhar. Dưi mơ̆ ih yăl dliê kơ klei khăp kơ čing čhar ?

- Anăn kâo Y Lêvi Niê Siêng, djuê ana Êđê, amĭ kkiêng leh anăn hriê kơ prŏng ti ƀuôn Kroa B, să Čuôr Dăng, čar Dak Lak. Čing čhar yuôm bhăn snăk kyua anăn jing dhar kreh djuê ana, mnơ̆ng yuôm bhăn  mơ̆ng aduôn aê, amiêt awa lui kơ drei. Čing čhar mâo nanao hlăm klei hdĭp mda êpul êya, mơ̆ng čang ênuh, knăm mơak, knăm ngă yang leh anăn bruă ngă mkăn hlăm êpul êya. Lui čing čhar jing drei wơr hĕ klei dhar kreh jăk siam aduôn aê pô.

Snăn, năng ai klei anăn mđĭ ai ih siă suôr leh anăn gĭr mtô čing čhar kơ phung mda asei hlăm ƀuôn sang djŏ mơ̆?

Brei drei kriê pioh leh anăn djă pioh dhar kreh čing čhar aduôn aê pô, mtô kơ phung mda asei tui hriăm. Leh anăn mđĭ ai phung mda asei mpŭ kơ dhar kreh djuê ana pô. Kâo pŏk adŭ mtô kơ phung hđeh leh anăn phung hlăm  ƀuôn pô. Kâo mtô klei tông čing mơ̆ng ênưih truh kơ dleh, tơdah diñu raih leh snăn phung nao hlăm klei bi lông čing čhar dŭm gưl leh anăn tông čing hlăm dŭm gưl knăm mơak êpul êya.

Hlăm klei hdĭp mrâo mrang snăn bruă mjĕ êrô dhar kreh leh anăn kdrăp mrâo dôk hmăi prŏng snăk kơ klei hdĭp mda, srăng mâo lu klei dleh dlan tơdah mtô čing čhar kơ phung mda asei. Snăn ya klei thiăm klei mđĭ ai kơ ih gĭr mguôp hŏng bruă kriê pioh leh anăn bi lar ênai čing?

Hlăm klei mtô kơ phung hđeh kâo tuôm hŏng lu klei dleh dlan. Phung hđeh hriăm lu kƀah čing kơ phung hđeh hriăm leh anăn boh nik ƀiă phung mbruă khua thŭn raih lu klei tông čing mtô kơ phung hđeh. Lu phung hđeh ka tuôm nao hlăm adŭ hriăm leh anăn tal êlâo hmư̆ ênai čing, kdrăp mnơ̆ng ăt kƀah lu mơh. Khădah snăn, kâo ƀuh pô dôk mda asei dôk ai ktang leh anăn klei mĭn čiăng hrăm mbĭt găn leh anăn lŏ dơ̆ng hlăm hdră kriê pioh čing čhar djuê ana pô. Tơdah hmư̆ ênai čing kâo ƀuh pô mâo thiăm klei ktang hŏng mnuih ƀuôn sang pô kriê pioh  dhar kreh djuê ana.

Hlăm ai êwa Têt truh yan mnga hriê, ênai čing dôk kwang kdrăm kơah kluôm ƀuôn  sang, ya klei ih čiăng mơĭt kơ mnuih ƀuôn sang leh anăn boh nik phung mda asei?

Kâo čiăng kah mbha hŏng mnuih ƀuôn sang leh anăn phung mda asei drei gĭr lŏ kơrŭ wĭt klei jăk siam dhar kreh êpul êya pô. Phung mbruă khua thŭn srăng lŏ dơ̆ng mtô kơ phung mda asei leh anăn phung hđeh brei găn klei dleh dlan čiăng tui hriăm. Brei ênai čing hdĭp hlăm ƀuôn sang nanao.

Mni lač jăk kơ ayŏng Y Lêvi Niê Siêng hŏng klei yăl dliê. Hơêč hmưi kơ ih hŏng gŏ sang thŭn bhang mrâo mâo lu klei suaih pral, jăk mơak; hơêč hmưi kơ ih lŏ dơ̆ng kjăp ai ktang kriê pioh leh anăn lar bra ênai čing čhar, čiăng kơ ênoh yuôm dhar kreh djuê ana ti ƀuôn sang leh anăn djuê ana Êđê dưi kriê pioh leh anăn mđĭ lar nanao!