Anei jing bruă ngă yuôm bhăn, bi êdah klei thâo mđing uêñ mơ̆ng knơ̆ng bruă kahan knông lăn čar, dŭm gưl bruă Đảng, bruă sang čư̆ êa, dŭm dhar bruă, êpul êya alŭ wăl lehanăn phung thâo bi đru ngă leh bruă dlăng kriê, mjuăt bi hriăm hđeh êlăk, boh nik hđeh êlăk hlăm krĭng knông lăn, mơ̆ng anăn đru mđĭ ai phung hđeh kriăng hlăm klei hriăm hră mơar, ktưn dưi jing mnuih tŭ dưn kơ lăn čar. Hlăm hdră anei, Êpul khu akiă kriê kahan răng mgang knông lăn čar Lâm Đồng, bruă sang čư̆ êa alŭ wăl, lehanăn phung thâo bi đru mâo mđup brei leh 450 hnư mnơ̆ng hŏng ênoh jih jang hlăm brô 200 êklăk prăk.

Dŭm êpul êya ti Dak Lak dôk iêu mkrưm djăp klei găl mâo čiăng mkŏ mjing hdră hlăp lêñ, mdup brei mnơ̆ng kơ dŭm êbâo čô hđeh ƀun, phung hđeh amâo jăk asei mlei hlăm čar, đru kơ phung hđeh dưi mâo klei hơ̆k mơak kluôm ênŭm hlăm yan mơak mlan pŭr. Hŏng akŏ “Bŏ hŏng klei mơak – thâo bi khăp” mâo adŭ Trung cấp lý luận chính trị A55A, sang hră ksiêm hriăm kơ bruă kdid čar ti čar Dak Lak mkŏ mjing, jao leh 210 hnư mnơ̆ng kơ phung hđeh ti sang hră.

Ti să Êa Mdroh, 300 hnư mnơ̆ng dưi jao kơ phung hđeh ti ƀuôn kgŭ krŭ kdơ̆ng đưm hluê Hdră Pui hruh guh mngač klei čang hmăng. Bi ti ƀuôn Kŏ Êmông, Êpul êdam êra să Dang Kang bi hgŭm hŏng dŭm êpul mâo ai tiê kmah mkŏ mjing hdră kdŏ anak rai, tŭk ƀung hdang, khăt ƀŭk amâo mă prăk lehanăn mdup brei čhum ao, mnơ̆ng yua hriăm hră, mđup brei mnơ̆ng Trung thu kơ giăm 700 čô hđeh ti 2 ƀuôn Čư̆ Păm lehanăn Čư̆ Kŏ Êmông. Dŭm hnư mnơ̆ng anei đru leh kơ lu phung hđeh dleh dlan ti Dak Lak dưi mâo sa yan trung thu hơ̆k mơak kluôm ênŭm./.