Êlâo hĭn lač kơ klei duh bi liê bruă sang hră mơar hlăm alŭ wăl dleh dlan, pô bi ala Nguyễn Đại Thắng, êpul Hưng Yên akâo: “Kâo akâo lŏ thiăm mbŏ sa pruĕ hlăm mta mrô 19 “Knŭk kna brei klei găl tal êlâo duh kơ hdră êlan đru dŭm anôk mjuăt bi hriăm hlăm krĭng dleh dlan, krĭng taih kbưi, krĭng knông lăn, plao ksĭ, krĭng mnuih djuê ƀiă hlăm bruă bi mlih mrô; rơ̆ng mâo klei mtăp mđơr hlăm bruă dưnyua kơ bruă mjuăt bi hriăm. Msĕ snăn srăng mâo klei tŭ dưn hlăm bruă hlue ngă dŭm hdră êlan, lehanăn dưi mâo klei mtăp mđơr kơ bruă ba yua kdrăp mrâo hlăm sang hră mơar.”

Kơ hdră bhiăn mlih mrâo thiăm mbŏ đa đa mta mơ̆ng hdră bhiăn sang hră mơar, mta năng mđing jing klei čoh čuăn kơ bruă mlih mrâo, thiăm mbŏ hlue hdră knŭk kna mkăp ba yua sa hnơ̆ng hdruôm hră hriăm hlăm kluôm ala. Pô bi ala Nguyễn Thị Mai Thoa, êpul Hưng Yên lač: “Êpul čih mkra bi hrŏng ruah hdră jăk hĭn dăp mkra hra bi hriăm mrâo, bi djŏ guôp hŏng hdră mtô bi hriăm mrâo, srăng dưn yua jih klei jăk, lăm lui jih klei amâo lŏ djŏ êlâo dih, ba yua bi jăk hdruôm hră mtô bi hriăm pioh čih mkra klei hriăm.”

Êjai anăn, mâo đa đa phung bi ala dôk ka hơĭt ôh kčưm mơ̆ng thŭn 1 jar bi hriăm mbĭt kơ kluôm ala msĕ si pral hĕ đei. Ti anăp klei blŭ mơ̆ng phung bi ala, Khua phŭn bruă sang hră mơar Nguyễn Kim Sơn brei thâo: “Klei anei phŭn bruă srăng mkŏ mjing hdră êlan mă bruă. Mbĭt hŏng anăn mâo mơh hdră akâo kơ khua gĭt gai Đảng, lehanăn ba mdah hŏng khua knŭk kna ksiêm bi mklă. Phŭn bruă gĭr bi pral hĭn hlăm mlan 11 srăng mâo klă lehanăn srăng mâo klei hâo mdah. Kâo jhŏng bi êdah snăn, pral srăng mâo ngă.”

Klei yuôm bhăn hĭn hlăm klei čih mkra lŏ mlih mrâo thiăm mbŏ kơ bruă mkŏ mjing hdră mtô bi hriăm bi sa hnơ̆ng, lŏ thiăm mbŏ kơ hdră êlan mjuăt bi hriăm bruă knuă, brei phung hđeh hriăm hră mơar êjai, lehanăn hriăm bruă knuă êjai, ngă bi ênưih djăp mta hdră êlan mă bruă, lăm lui bruă mkăp hră tŭ yap hriăm jih gưl 2, lehanăn jao klei dưi kơ gưl 3 mơ̆ng khua knơ̆ng bruă sang hră mơar kơ khua sang hră kiă kriê...

Pô bi ala Nguyễn Thị Việt Nga, êpul Hải Phòng bi êdah klă hdră êlan mjuăt bi hriăm hlăm sang hră, kyuadah ară anei jing ktrŏ đei, tơl truh kơ klei lŏ mtô bi hriăm kơ êngao, kyuadah phung nai mtô bi hriăm amâo dưi leh lehanăn amâo mâo djăp ôh hŏng hdră bi hriăm anăn ti sang hră. Êjai anăn, kƀah klei thâo săng kơ klei hdĭp hlăm yang ƀuôn. “Mbĭt hŏng bruă hdruôm hră hriăm snăn bruă dăp wĭt hdră êlan mă bruă ti sang hră ăt yuôm bhăn. Mâo nai mtô klei tĭng lač hđeh hriăm hră hriăm thâo hlăm klei tĭng, hdră bi tĭng, ƀiădah leh kbiă nao hlăm sang mnia, brei phung hđeh tĭng kơ klei bleidjam dôk lĕ hlăm klei mtŭk mtŭl mơh. Klei thâo săng hlăm klei hdĭp aguah tlam mlam hrue kƀah. Kyuanăn, hlăm bruă dăp hdră mtô bi hriăm brei mđing kơ klei anei.”

Bi trông hlăm êpul, phung bi ala bruă kƀĭn ala ăt tŭ ư lăm lui dŭm klei čoh čuăn mkăp hră tŭ yap jih gưl dua, knŏng bi mklă hlăm hră ksiêm hriăm gưl dua mơ̆ng khua sang hră pô ngă. Klei čoh čuăn anei jing guôp hŏng klei hriăm mjuăt hlăm sang hră gưl 2, bi ênưih jih jang hdră êlan mă bruă, amâo mâo mjing klei ktrŏ ôh kơ hđeh hriăm hră nao hlăm klei bi lông./.