Ti ƀuôn hgŭm Ia Krel, čar Gia Lai, Binh Đoàn 15 (Phŭn bruă lĭng kahan) mkŏ mjing knăm ba yua leh anăn jao sang hră hđeh điết Sao Mai kơ phung nai leh anăn hđeh sang hră ƀuôn hgŭm Ia Krel, čar Gia Lai. Sang hră hđeh điêt Sao Mai jing sa hlăm dŭm sang hră mâo Phŭn bruă lĭng kahan leh anăn dŭm knơ̆ng bruă lĭng kahan rŭ mdơ̆ng ti alŭ wăl knông lăn. Ti čar Gia Lai, hdră dưi jao kơ Binh đoàn 15 ngă hlăm 5 mlan. Sang hră mâo dŭm anôk msĕ si: sang phung nai mă bruă 231m2, 2 pruê̆ adŭ hriăm mâo ênhă jih jang 800m2 mâo 5 adŭ hriăm krip, sang huă ƀơ̆ng, anôk mjuăt asei mlei, tač hlăp lêñ, sang dưm êdeh…Bi mâo djăp klei  čiăng hriăm kơ êbeh 300 čô hđeh điêt mơ̆ng 24 ƀuôn hlăm dŭm ƀuôn hgŭm nah Yŭ čar Gia Lai.

 Đại tá Khuất Bá Cao, khua dlăng bruă Đảng, k’iăng khua knơ̆ng gĭt gai lĭng kahan Bình Đoàn 15 brei thâo: Bruă ba yua sang hră hđeh điêt Sao Mai đru bi mâo djăp klei čiăng mtô leh anăn hriăm mơ̆ng anôk čô knuă druh, lĭng kahan leh anăn mnuih ƀuôn sang, mkŏ mjing tur knơ̆ng hơĭt kjăp mđĭ kyar alŭ wăl knông lăn. Bình đoàn 15 hmăng hmưi alŭ wăl, sang hră srăng mbĭt hŏng Bình Đoàn bi lar ktang boh tŭ mơ̆ng sang hră.

         “Hlăm wưng kơ anăp, Bình Đoàn 15 srăng lŏ bi mguôp hŏng Bruă sang čư̆ êa alŭ wăl leh anăn Êpul bruă duh mrka  - lĭng kahan mrô 75 hlăm bruă kriê dlăng hdră bruă djŏ mta kñăm, tŭ dưn, hơĭt kjăp, đru mkra mđĭ êjai čiăng êdi, hrăm mbĭt răng kriê sang hră mtah - doh - siam, mkŏ mjing klei găl čiăng kơ phuung hđeh dưi hriăm, mjuăt pô hlăm anôk jăk hĭn”.

Nao hlăm knăm ba yua, mduôn ƀuôn Rah Lan Vọng - ƀuôn Ngol Le, ƀuôn hgŭm Ia Krel, čar Gia Lai hơ̆k mơak brei thâo Sang hră hđeh điêt Sao mai đru kriê dlăng, rông ba phung hđeh ti krĭng knông lăn jăk hĭn, čiăng kơ mnuih ƀuôn sang hơĭt ai tiê mă bruă knuă, krơ̆ng kjăp klei êđăp ênang ti alŭ wăl:

“Sang hră kdrưh kơăm, doh, siam, anak čô hmei dưi hriăm jăk, êdei anei đru kơ lăn čar. Hmei hơ̆k mơak leh anăn đăo knang kơ Đảng leh anăn Knŭk kna”.

Ti să knông lăn Đức Cơ, čar Gia Lai, Sang hră hđeh điêt 18/4 (mơ̆ng knơ̆ng bruă 72, Binh đoàn 15O mâo hnơ̆ng prŏng hŏng 18 sang hră ti 5 să. Ară anei sang hră mâo êbeh 1 êbâo čô hđeh nao hriăm, hlăm anăn 1/3 jing hđeh mnuih djuê ƀiă. Jih jang phung hđeh dôk huă yang hruê. Bi phung hđeh mnuih djuê ƀiă amâo mâo guôn tla sa mta prăk ôh. Êngao kơ năn knơ̆ng bruă 72 lŏ đru kơ grăp čô hđeh 8 êbâo prăk huă grăp hruê. Knơ̆ng bruă ăt mưn êdeh drông phung hđeh nao sang hră grăp hruê.

Ti să knông lăn Mô Rai, čar Quảng Ngãi, knơ̆ng bruă 78 (Binh đoàn 15) ăt duh bi liê rŭ mdơng sang hră hđeh điêt, djăp mnơ̆ng yua, kdrăp yua. Čiăng mkŏ mjing klei găl kơ dŭm gŏ sang mă bruă mâo anak điêt naoi reh ktăk ksu, jih jang 11 bĭt sang hră mơ̆ng knơ̆ng bruă rŭ mdơng ngă bruă drông phung hđeh mơ̆ng aguah. ti dŭm sang hră, êpul kiă sang hră tiŏ nao 2 čô nai ngă bruă čiăng drông phung hđeh sang hră.

  Đại tá Khuất Bá Cao, khua dlăng bruă Đảng, k’iăng khua knơ̆ng gĭt gai lĭng kahan Bình Đoàn 15  brei thâo: Hŏng klei mĭn kñăm ai dưi rŭ mdơng sang hră jăk hĭn kơ phung hđeh, Bình Đoàn 15 mdơng leh 9 sang hră hđeh điết, dua sang rông hđeh, hŏng 130 bĭt sang hră ti alŭ wăl Lăn Dap Kngư. Kah knar grăp thŭn  dŭm sang hră mtô leh anăn kriê dlăng êbeh 4.500 čô hđeh, hlăm anăn 2/3 jing hđeh mnuih djuê ƀiă. Mbĭt hŏng bruă mđĭ hnơ̆ng klei mrô leh anăn bi hriăm, êpul knuă druh kriê dlăng, phung nai, phung mă bruă ti dŭm sang hră mơ̆ng Bình Đoàn 15 lŏ hur har hâo hưn, mtrŭt mjhar phung hđeh mnuih djuê ƀiă nao sang hră. Klei gĭr,  klei jih ai tiê, bruă klam mơ̆ng knuă druh Binh Đoàn 15 dưi msir klei leh dŭm klei dleh kpăk čiăng kriê dlăng kơ anak čô mnuih djuê ƀiă ti krĭng knông lăn./.