Blŭ kiă kriê klei bi kƀĭn, Khua bruă kƀĭn ala Trần Thanh Mẫn brei thâo, thŭn 2024, khădah lăn čar dôk găn lu klei dleh dlan, siămdah hnơ̆ng đĭ kyar GDP ăt mâo hlăm brô 7%, jih jang 15 ênoh čuăn mơ̆ng bruă kƀĭn ala čoh čuăn dưi djăp, klei hdĭp mda ala ƀuôn hơĭt. Knŭk kna, bruă Mặt trận čar kwar gưl dlông Việt Nam hlăk dôk ngă bruă lăm lui jih sang tĭ ƀrôč, bruă răng mgang klei êđăp ênang mâo klei hơĭt kjăp, bruă hŏng ala tač êngao dưi hyuă kjăp, bruă bi kdơ̆ng hŏng klei ƀơ̆ng ngăn, klei bi liê hơăi mung mang mâo mđĭ hĭn, ai tiê klei đăo knang mơ̆ng mnuih ƀuôn sang hŏng Đảng, Knŭk kna lŏ đĭ hĭn leh.

Khua bruă kƀĭn ala mñă, mâo hĕ boh tŭ dưn anei jing klei gĭr prŏng êdi mơ̆ng kluôm Đảng, jih jang lĭng kahan, lehanăn mnuih ƀuôn sang, hlăm anăn mâo klei đru mguôp prŏng mơ̆ng anôk bruă kƀĭn ala hlăm buă mkŏ mjing klei bhiăn, bi mklă djăp mta bruă yuôm bhăn kơ lăn čar hlue hŏng hdră mlih mrâo klei mĭn, lehanăn hdră mkra mjing klei bhiăn.

Bi ala kơ dhar bruă gĭt gai bruă kƀĭn ala, Khua bruă kƀĭn ala Trần Thanh Mẫn bi mni kơ dŭm klei đru mguôp prŏng mơ̆ng dŭm anôk bruă êpul êya hlăm adŭ bruă kƀĭn, lŏ mñă, thŭn 2025 mâo lu gru knăl yuôm bhăn kơ lăn čar, Khua bruă kƀĭn ala mtă kơ dŭm anôk bruă hlăm dhar bruă gĭt gai bruă kƀĭn ala, tơdah ka tŭ ư ôh hŏng dŭm boh tŭ dưn leh mâo, snăn brei mâo klei gĭr hĭn mghaih msir jih klei awăt kƀah:

“Anăp anei, si drei srăng ngă čiăng dưi mghaih msir jih ti anôk bi kƀĭn tal 9, klei bi kƀĭn tal 10 amâodah êlâo kơ mâo klei bi kƀĭn mjêč hlăm mlan 2 thŭn 2025 jing kơ boh tŭ djăp mta hră mơar, boh tŭ kơ klei ksiêm dlăng. Tal 2, jing mơĭt hră mơar truh phung bi ala bruă kƀĭn ala bi hmao. Tal 3, hnơ̆ng tŭ bruă kăp kčĕ mơ̆ng Êpul gơ̆ng bruă djuê ana , dŭm dhar bruă, êpul êya, adŭ bruă kƀĭn ala brei bi jăk hĭn. Tal 4, jing kơ klei bhiăn mă bruă bi kjăp ti dŭm anôk bruă hŏng klei ktang. Si srăng ngă čiăng mđĭ k’hưm mơ̆ng bruă kƀĭn ala, brei bi êdah klei tŭ hŏng yang ƀuôn, hŏng mnuih ƀuôn sang. Klei yuôm bhăn hĭn jing mnuih ƀuôn sang jưh knang kơ bruă kƀĭn ala, bruă kƀĭn ala brei mă bruă kyua kơ mnuih ƀuôn sang. Anei jing klei brei drei mâo nanao ai tiê păn kjăp hlăm klei mă bruă, mghaih msir bruă knuă”.

Boh nik hlue ngă hdră mtrŭn mrô 18 mơ̆ng gưl dlông, kơ klei dăp wĭt mnuih ngă bruă hŏng klei kjăp. Ƀri wưng anei, Khua bruă kƀĭn ala čang hmăng, phung knuă druh, mnuih mă bruă bi sa ai mâo klei thâo bi mguôp čiăng dưi găn jih klei dleh dlan. Khua bruă kƀĭn ala mtă, kơ dŭm anôk bruă hlăm bruă kƀĭn alalŏ dơ̆ng mlih mrâo klei mĭn hlăm bruă mkra mjing klei bhiăn, mđĭ hĭn bruă ksiêm dlăng, mbha gưl, mbha klei dưi čiăng mghaih msir jih jang bruă, hŏng boh tŭ bruă klam, klă mngač bruă ngă, djŏ mnuih, lehanăn păn kjăp bruă ksiêm dlăng klei bi mlih hdră mă bruă hlăm anôk bruă kƀĭn ala, Khua bruă kƀĭn ala ăt mtă, hlăm wưng ti anăp, dŭm êpul êya hlăm adŭ bruă kƀĭn ala mprăp hĕ bi jăk jih jang bruă čuăn msĕ si: Bruă ksiêm wĭt hlăm thŭn mơ̆ng anôk bruă kƀĭn ala, hrŏng ruah 10 mta bruă yuôm bhăn thŭn 2024; bruă duh mĭn mprăp Tết kơ phung knuă druh, mnuih mă bruă, dôk hlăm klei dleh dlan. Boh nik, dhar bruă gĭt gai bruă kƀĭn ala mkŏ mjing dŭm klei bi kƀĭn tal   41, 42 hlăm mlan 1, 2/2025 lehanăn klei bi kƀĭn mjêč hlăm mlan 2/2025; mprăp kơ klei bi kƀĭn tal 9, bruă kƀĭn ala gưl 15; Mkŏ mjing tŭ jing klei bi trông kơ bruă kăp ksiêm, lehanăn knăm mđup brei klei mpŭ mni Diên Hồng tal 3, rơ̆ng mâo klei tŭ dưn, djŏ, mjing klei lar bra prŏng.

Êlâo anăn, tui si khua čih hră anôk bruă kƀĭn ala, khua adŭ bruă kƀĭn ala Lê Quang Tùng, bruă hlue ngă hdră mtrŭn mrô 18 mơơ̆ng Êpul khu akiă kriê gưl dlông 12 hlăm êpul bruă kƀĭn ala, dơ̆ng mơ̆ng phŭn mâo hdră mtrŭn , bruă Đảng hlăm anôk bruă kƀĭn ala mâo leh klei gĭt gai, kiă kriê dhar bruă gĭt gai bruă kƀĭn ala mkŏ mjing mtam êpul ksiêm wĭt bruă hlue ngă hdră mtrŭn mrô 18 hlăm anôk bruă kƀĭn ala, mâo khua bruă kƀĭn ala ngă khua êpul, phung k’iăng khua bruă kƀĭn ala jing k’iăng khua êpul kiă kriê, Khua bruă kƀĭn ala mâo mtam klei mtă brei ngă bi kjăp kơ klei mlih mrâo, dăp wĭt hŏng klei khuăt lehanăn kjăp êpul khua kiă kriê, mnuih mă bruă hŏng klei kjăp mă bruă mâo boh tŭ dưn hlăm anôk bruă kƀĭn ala, dŭm anôk bruă dôk hlăm dhar bruă gĭt gai bruă kƀĭn ala kiă kriê, adŭ bruă kƀĭn ala, mâo klei blŭ hrăm yuôm bhăn ti anôk bi kƀĭn kluôm hlue ngă hdră mtrŭn mrô 18 kơ hdră “Ruh mgaih jih jang klei dôk gun kpăk kơ klei bhiăn kiă kriê”./.