Hlăm adiê êăt mlan knhal jih thŭn, Trung tá Lâm Mạnh Tuyển, knuă druh kahan kđông răng mgang knông lăn Ia Chía, (kdriêk Ia Grai, čar Gia Lai)  nao čuă sa čô mniê mduôn anăn gơ̆ Puih Yơng, giăm 80 thŭn hdĭp hjăn amâo mâo anôk jưh knang ti ƀuôn Beng, să Ia Chía. Lu thŭn hŏng anei kyua amâo lŏ mâo klei suaih pral Yă Yơng amâo lŏ dưi êbat hiu, lehanăn ăt lu thŭn êgao, Trung tá Tuyển mbĭt hŏng ƀĭng kahan jih ai tiê mkă dlăng klei suaih pral kơ gơ̆. Leh mâo tŭ mă êa drao mơ̆ng phung kahan yă Puih Yơng mgei ai tiê blŭ:

 “Kâo thâo hdơr knga êdi kơ ƀĭng kahan răng mgang knông lăn kreh hriê đru, mkă dlăng klei suaih pral kơ hmei. Kâo dôk hlăm klei dleh dlan, hdĭp hjăn păn amâo mâo anôk jưh knang, kyuadah ung lehanăn anak aneh djiê leh sơăi, lu blư̆ lĕ hlăm klei dleh dlan amâo mâo prăk nao mkă dlăng klei suaih pral, ară anei mâo ƀĭng kahan hriê mkă dlăng lehanăn brei êa drao kơ kâo”.

Ăt jing mnuih khua thŭn mơh, asei mlei lĕ nanao klei amâo mâo suaih,   Ksor Bơng, 74 thŭn ti ƀuôn Bi, să Ia O brei thâo, nai êa drao kahan kđông răng mgang knông lăn Ia O, jing nanao anôk kơ mnuih ƀuôn sang băng tal êlâo tơdah tuôm hŏng klei ruă duam. Kyua mâo klei đru dlăng ba jih ai tiê mơ̆ng kahan răng mgang knông lăn, mnuih ƀuôn sang amâo mâo đei lŏ rŭng răng ôh tơdah lĕ hlăm klei ruă duam, amâo lŏ nao băng kơ anôk mdrao mgŭn taih kbưi, luič liê lu prăk kăk:

  “Đru mnuih ƀuôn sang lu snăk, kđông mkŏ mjing leh sa bĭt anôk kăp mdrao mgŭn hlăm ƀuôn mtam, tơdah mnuih ƀuôn sang lĕ hlăm klei ruă duam snăn hlŏng đih mdrao tinăn, mâo êa drao mơ̆ng kđông mkăp jih. Mnuih ƀuôn sang truh mkă dlăng lehanăn mdrao mgŭn mơ̆ng jih jang klei ruă duam aguah tlam, knŏng tơdah klei ruă kjham kơh lŏ ba kơ gưl nah dlông”.

Lu thŭn leh êgao, kahan răng mgang knông lăn ngă leh mđrĭng bruă dlăng kriê klei suaih pral lĭng kahan êjai, lehanăn mkă dlăng, mkăp êa drao kơ mnuih ƀuôn sang msĕ mơh, lehanăn wăt mnuih ƀuôn sang mơ̆ng Campuchia. Êjai hlăm klei mkă dlăng, mdrao mgŭn klei ruă kơ mnuih ƀuôn sang, phung aê mdrao kahan lŏ dơ̆ng kăp kčĕ kơ mnuih ƀuôn sang hdră răng kriê klei ruaih pral pô, hdĭp hlăm klei thâo bi mdoh, ƀơ̆ng ksă, mnăm tŭk, pĭt đih hlăm mŭng… Mbĭt hŏng anăn mđrăm mbĭt hŏng sang êa drao nah gŭ hâo hưn čiăng kơ mnuih ƀuôn sang mâo klei thâo săng kơ bruă mdrao mgŭn, mdrơ̆ng hŏng klei ruă tưp, bi mdoh wăl hdĭp mda, lehanăn ruă duam nao băng kơ sang êa drao. Trung tá Trần Anh Tuấn- Nai êa drao kahan, kđông răng mgang knông lăn Ia O (kdriêk Ia Grai) brei thâo:

Bruă lĭng kahan ngă bruă mkă dlăng klei suaih pral kơ mnuih ƀuôn sang jing bruă ngă amâo mâo mă prăk ôh, grăl mlan, grăp gưl nao truh hlăm ƀuôn sang mkă dlăng klei suaih pral lehanăn mbha êa drao kơ mnuih ƀuôn sang, mơ̆ng anăn mjing klei thâo bi mguôp plah wah mnuih ƀuôn sang hŏng kahan răng mgang knông lăn, mjing klei đăo knang hlăm mnuih ƀuôn sang hŏng lĭng kahan. Kâo ăt bi mguôp hŏng sang êa drao să, amâodah knơ̆ng bruă mrô 74, mrô 75 mâo hdră êlan nao mkă dlăng mdrao mgŭn amâo mâo mă prăk ôh kơ mnuih ƀuôn sang”.

Mơ̆ng thŭn 2023 truh ară anei, mbĭt hŏng klei mkă dlăng mdrao mgŭn klei ruă ti kđông, kahan răng mgang knông lăn čar Gia Lai mkŏ mjing leh lu blư̆ truh hŏng mnuih ƀuôn sang mkă dlăng suaih pral, lehanăn mbha êa drao kơ giăm  2.000 čô mnuih, lehanăn mđup brei hlăm brô 600 êklăk prăk kơ dŭm gŏ sang dôk hlăm klei dleh dlan ti knông lăn.  Ksor Tuông, K’iăng khua knơ̆ng bruă sang čư̆ êa să Ia O, kdriêk Ia Grai brei thâo, dŭm mta bruă mă mơ̆ng nai êa drao kahan jing mđĭ klei thâo săng hlăm mnuih ƀuôn sang kơ bruă răng mgang wăl hdĭp mda, mdrơ̆ng hŏng djăp mta klei ruă hŏng klei tŭ jing.

 “Êpul nai êa drao kahan ti knông lăn jih ai tiê đru bi hâo hưn kơ mnuih ƀuôn sang brei thâo răng mgang wăl hdĭp mda. Truh hŏng grăp boh sang mnuih ƀuôn sang čuă êmuh, mkă dlăng klei suaih pral kơ mnuih khua thŭn lehanăn kơ phung hđeh. Mơ̆ng anăn grăp čô thâo răng kriê klei suaih pral pô, lehanăn thâo bi mdoh wăl hdĭp mda, mâo leh klei mnuih ƀuôn sang hluê ngă jăk, hnơ̆ng ênoh mâo klei ruă êngoh bi ƀlĕ êrah hrŏ leh, dŭm mta klei ruă mkăn mâo gang mkhư̆ jăk hlăm alŭ wăl. Anăn jing sa kdrêč kyua mâo nai êa drao kahan kđông răng mgang ngă bruă dlăng kriê jăk klei suaih pral mnuih ƀuôn sang”.

Jih jang bruă ngă yuôm bhăn anăn mơ̆ng êpul nai êa drao kahan răng mgang knông lăn čar Gia Lai mđrăm mbĭt leh hŏng dŭm gưl bruă Đảng, bruă sang čư̆ êa alŭ wăl, sang êa drao să ngă jăk bruă dlăng kriê klei suaih pral mnuih ƀuôn sang. Đru bi kjăp leh klei thâo bi mguôp lĭng kahan hŏng mnuih ƀuôn sang ti knông lăn, đru bi răng mgang kjăp klei hnŭk ênang lăn čar./.