Ti ƀuôn hgŭm Ea Bŭng, Nguyễn Thị Đinh mô̆ kahan ruă duam Nguyễn Huy Nuôi mgei ai tiê êjai mâo khua bruă sang čư̆ êa čar Dak Lak mbĭt hŏng êpul ngă bruă nao êmuh hrăm, brei mnơ̆ng. Ñu brei thâo, êlâo dih gŏ sang dleh dlan, ung ñu dưi mdrao ti anôk rông ba phung mâo ai đru. 15 thŭn hŏng anei, gŏ sang ba ñu wĭt kriê dlăng ti sang leh anăn mâo nanao klei uên mĭn mơ̆ng dŭm gưl bruă.

 “Mơ̆ng čar, kdriêk, să, alŭ grăp thŭn mâo hruê knăm, tết diñu hriê kriê dlăng, mđao ai tiê. Kyua mâo Đảng, knŭk kna leh anăn dŭm êpul bruă đru kơ pô dưi mdul ƀiă sa kdrêč.”

Ti Ƀuôn hgŭm Ea Knôp, Nguyễn Ái Quế, kahan êka hnơ̆ng 3/4, dưi mâo klei đru 110 êklăk prăk rŭ mdơ̆ng sang dôk mrâo 50m2. Ñu tuôm bi blah ti wăl kahan 5, êka kjham ti Quảng Nam thŭn 1973. Thŭn 1985, ñu ba gŏ sang hriê ti Dak Lak čô̆ kơ bruă êjai adôk lu klei dleh dlan.

 “Êlâo dih mâo sang mdhă ăt suăi êdi, ară anei mâo knŭk kna pap brei sơnei jing jăk êdi leh. Lač jăk kơ dŭm gưl bruă uêñ mĭn kâo hơ̆k mơak êdi. Găp djuê hriê čuă ăt mâo anôk dôk gŭ jăk mơh. ”

Ti ƀuôn hgŭm Quảng Phú, Ngô Văn Tường mbĭt hŏng êpul mă bruă dôk bi leh sang 150 êklăk prăk, hlăm anăn knŭk kna đru 110 êklăk prăk. Mô̆ ñu Võ Thị Nghĩa jing pô mâo ai đru, tuôm arăng krư̆ ti sang mnă Ƀuôn Ama Thuôt thŭn 1973 kyua đru ba mnơ̆ng ƀơ̆ng, hră čih, brei klei hưn kơ lĭng kahan.

 “Mâo sang dôk sơnei hmei mâo klei hơĭt mă bruă knuă đru hlăm klei hdĭp grăp hruê mơ̆ng dua ung mô̆.”

Hluê si hdră mtrŭn mrô 131 thŭn 2021 leh anăn klei bi klă mrô 21 thŭn 2024 mơ̆ng knŭk kna, čar Dak Lak ngă leh klei đru kơ 593 gŏ sang phung mâo bruă tŭ dưn dưi mkra mđĭ leh anăn rŭ mdơ̆ng sang dôk (142 sang mkra mrâo, 451 sang mkra mđĭ). Wưng anei, Dak Lak ngă klei čuh brui mngưi, brei phung mâo bruă tŭ dưn nao čuă dlăng, bi tuôm ti Hà Nội.

Lê Đức Tịnh, k’iăng khua knơ̆ng bruă kiă kriê bruă knuă čar Dak Lak brei thâo, čar ăt mtrŭt mjhar hdră hdơr knga tla ai čiăng kriê dlăng jăk hĭn phung kahan êka, gŏ sang phung djiê êngiă leh anăn phung mâo ai đru:

 “Knơ̆ng bruă đru kčĕ hŏng čar mtrŭt mđĭ hdră bruă, jih jang mnuih ƀuôn sang kriê dlăng phung kahan êka, gŏ sang kahan djiê êngiă leh anăn phung mâo ai đru, rơ̆ng kơ klei klă klơ̆ng, tŭ dưn, mâo klei nao hgŭm mơ̆ng dŭm gưl bruă, dhar bruă, yang ƀuôn hlăm bruă mkŏ mjing leh anăn mđĭ kyar kreh prăk hdơr knga tla ai. Jêñ jêñ uêñ mĭn, thâo klă klei čiăng, hmao mgaih msir dŭm boh klei djŏ tuôm, rơ̆ng klei dưi kơ phung mâo ai đru”.

Êlâo kơnăn, Êpul bi ala Bruă Kƀĭn Ala čar Dak Lak mkŏ mjing hdră wĭt kơ phŭn agha ti wăl hƀuê ênuk ala čar, ƀuôn hgŭm Đồng Xuân – anôk mkŏ mjing anôk bruă Đảng tal êlâo mơ̆ng Phú yên leh anăn wăl anôk krŭ kdơ̆ng H9, ƀuôn Dak Tuôr, ƀuôn hgŭm Čư̆ Pui, čar Dak Lak. Tinei, phung bi ala leh anăn mnuih ƀuôn sang hmư̆ dŭm klei yăl dliê mơ̆ng phung tuôm ƀuh, lŏ bi hdơr dŭm hruê mlan hlăm klei bi blah ti wăl anôk H9, anôk bi klă klei siă suôr, amâo mâo kdŭn mơ̆ng lĭng kahan leh anăn mnuih ƀuôn sang drei. Nguyễn Thị Thu Nguyệt, k’iăng khua êpul klam bruă êpul bi ala Bruă Kƀĭn Ala čar Dak Lak mñă ktang:

 “Wưng wĭt kơ phŭn agha anei đru kơ phung bi ala Bruă Kƀĭn Ala, grăp čô knuă druh, phung mă bruă knŭk kna leh anăn mnuih ƀuôn sang mâo wưng lŏ bi hdơr kơ knhuah gru leh anăn thâo klă hĭn kơ klei duh myơr mơ̆ng aê ama ti krĭng lăn anei. Hluê anăn, grăp čô ƀuh klă klei asăn asei, ksul mbŭ klei khăp kơ ƀuôn sang, lăn čar. Anei ăt jing boh kdrŭt čiăng kơ jih jang lŏ dơ̆ng gĭr đru mkŏ mjing čar ƀrư̆ hruê ƀrư̆ đĭ kyar”.

Êpul bi ala Bruă Kƀĭn Ala čar Dak Lak mbĭt hŏng phung đru mđup brei leh 30 boh êdeh wai jơ̆ng, čhŭm ai kơ phung hđeh sang hră dleh dlan, 236 hnư mnơ̆ng kơ dŭm gŏ sang knŭk kna dlăng ba, mnuih djuê ƀiă, phung mâo kơhưm leh anăn jao tač čưng boh, sang bi hgŭm kơ alŭ wăl. Bruă kriê dlăng phung mâo ai đru ti Dak Lak amâo djŏ knŏng jing bruă klam, ƀiădah lŏ bi êdah kơ ai tiê mnăm êa hdơr kơ hnoh, đru bi kjăp klei bi mguôp mnuih ƀuôn sang.