Êpul mă bruă mơ̆ng čar Gia Lai kyua K’iăng Khua Knơ̆ng bruă sang čư̆ êa čar Nguyễn Thị Thanh Lịch ngă khua êpul nao čhưn, hơêč hmưi Tết kơ dŭm anôk bruă leh anăn gŏ sang mnuih mâo ai hŏng lăn čar êdah êdi ti dŭm alŭ wăl nah Yŭ čar. Êpul mă bruă nao hơêč hmưi Tết kơ 25 gŏ êsei phung mâo ai êdah êdi ti dŭm să Ia Rbol, Ia Rsai, Uar, Ia Dreh leh anăn Phú Túc, grăp hnư mâo mđup brei 1 hnư mnơ̆ng mơ̆ng čar leh anăn 2 êklăk prăk. Khua mduôn Ksor Chuel ti ƀuôn Rưng Ama Nhiu, să Ia Rbol, Gia Lai brei thâo:

“Gŏ sang kâo ăt msĕ si mnuih ƀuôn sang hlăm ƀuôn, klei hdĭp mda ƀrư̆ hơĭt kjăp leh anăn jăk hĭn, grăp boh sang mđing kơ klei hdĭp jăk mơak. Êngao anăn, Đảng leh anăn Knŭk kna mđing nanao, kriê dlăng kơ klei hdĭp mnuih djuê ƀiă ti  Lăn Dap Kngư, đru kơ mnuih ƀuôn sang grăp knhuang mđĭ kyar bruă duh mkra, mđĭ klei hdĭp mda. Hlăm wưng kơ anăp, kâo čang hmăng Đảng leh anăn Knŭk kna mđing dlăng lu hĭn, mâo thiăm hdră êlan klă sĭt čiăng kơ mnuih djuê ƀiă hơĭt ai tiê mă bruă, mkra mjing, hơĭt klei hdĭp mda sui.”

Hŏng mnuih Mnông ti să Nâm Nung (čar Lâm Đồng), krĭng phŭn bruă krŭ kdơ̆ng hlăm klei bi blah ară anei mâo leh lu klei mlih. Ară anei, mnuih ƀuôn sang hlăm ƀuôn dôk mđĭ kyar ana kphê, tiu, mdiê lŏ leh anăn djă pioh knhuah gru djuê ana. Knŏng ti ƀuôn Ja Rah, mnuih ƀuôn sang Mnông dôk djă pioh 20 hlâo ring čing hŏng 30 čô kreh tông čing hlăm dŭm bruă mâo ti ƀuôn sang, 30 čô pơ̆k mñam, hrĭ mñam. Lu gŏ sang dôk djă pioh čeh kpiê. Dŭm knăm mơak mơ̆ng mnuih Mnông msĕ si mmuñ ênhiang, mkra kdrăp pĕ tông dưi djă pioh kluôm dhuôm.  Y’Nkrơm (Mnuih Mnông) ti ƀuôn Ja Rah, să Nâm Nung, čar Lâm Đồng mñă klă, klei hdĭp trei mđao yâo mơak ară anei jing boh mơ̆ng klei bi mguôp, klei gĭr kpưn đĭ mơ̆ng dŭm djuê ana ti krĭng krŭ kdơ̆ng đưm dih.

   “Thŭn anei hluê ngă gru hmô bruă duh mkra mrâo mâo lu hĭn kơ thŭn dih. Gŏ sang mâo sa sào lŏ ăt hrui wĭt mâo 20 kdô. Kphê mâo 5 tôn, boh lu hĭn pô ăt mơak leh. Thŭn anei čhĭ êbeh 100 êklăk prăk, mă hĕ ênoh bi liê kơ hbâo pruê leh anăn blei mnơ̆ng yua kơ gŏ sang ăt dôk 20 - 30 êklăk prăk pioh drông tết hơ̆k mơak mbĭt hŏng ƀuôn sang. Tết knhuah gru mkŏ mjing klei huă ƀơ̆ng iêo jak mnuih ƀuôn sang, dŭm gŏ sang bi đru bi ring nao hma hlăm brô 10 gŏ sang, leh anăn iêo jak ayŏng adei, mah jiăng hriê huă ƀơ̆ng mbĭt, bi hơêč hmưi mă bruă knuă đĭ kyar hĭn.”