Amâo mâo bi kčah ôh ƀiădah tuôm, dŭm hrue knhal jih thŭn čhuang kơ thŭn mrâo, mơak Đảng, mơak yan mnga, hmei truh hŏng alŭ Phú Hữu, ƀuôn hgŭm Hoà Thịnh, anôk jing msăt kơ klei êa lip nah ngŏ čar Daklak, djŏ hlăm hrue amai Lê Thị Kim Ngân dôk mâo lu tue. Knuă druh kahan ksiêm čar Đồng Nai, Êpul bruă mniê kahan ksiêm čar Daklak ngă klei mđup brei sang klei bi đru. Amai Ngân bŏ hŏng klei mơak kyua klei anei:

 “Boh sĭt jing mơak êdi, amâo mâo thâo lŏ mblang ôh. Mâo di neh lehanăn mneh hriê hơêč hmưi tết, kâo hmăng hmưi kơ diih thŭn mrâo mâo klei suaih pral lehanăn klei jăk jĭn.”

Truh hŏng sang anei mơh, Phương Văn Lành, Khua bruă Đảng ƀuôn hgŭm Hoà Thịnh hơk mơak hưn, gru mơ̆ng klei êa lip pătdah jih leh. Hoà Thịnh hlăk lŏ kơrŭ wĭt hŏng ai ktang.

”Hrue anei, phung ayŏng amai adei truh kơ anei ƀuh amâo lŏ dôk ôh gru mơ̆ng klei êa lip, klei hdĭp mda mnuih ƀuôn sang lŏ wĭt msĕ si aguah tlam leh. Kyuâ mâo klei kiă kriê mơ̆ng dŭm gưl bruă đảng, bi mguôp mbĭt hŏng jih jang bruă kđi čar, klei sa ai mbĭt hŏng klei bi đru mơ̆ng phung mâo ai tiê kmah, dưi mâo hĕ boh tŭ dưn msĕ snei.”

Kbưi hŏng sang amai Ngân sa êwang jing êpul mrô 13 alŭ Phú Phong, jing anôk êa bi rai ktang hĭn, ătt jing anôk khua knŭk kna Phạm Minh Chính nao ksiêm dlăng, lehanăn mtrŭt mjhar hdră êlan Quang Trung. Dơ̆ng mơ̆ng mkăm klưh rai, hrue anei, anôk anei mâo leh mâo leh pưk sang kjăp siam. Msĕ si Trần Văn Khánh, mkŏ mjing leh klei huă ƀơ̆ng hrue êlâo kơ tết hnưm hĭn. Truh ară anei, ñu êđăp ênang, mprăp kơ Tết lehanăn kơ klei hdĭp pô êdei anăp.

 Ară trŭn kơ bruă dlăng kriê mdiê lŏ, msĕ si mă rơ̆k, prue hbâo, jah guê. Snăn gŏ sang ară anei ăt dôk lu bruă mă.

 Mâo dŭm klei jăk snăk, Trần Văn Khánh ăt kreh iêo jing Trần Quốc Khánh. 4 čô anak êkei ñu mâo bi anăn Hoà, Hội, Nghĩa, Nam… Tui boh hră “Cộng Hoà-Xã Hội-Chủ nghĩa-Việt Nam”. 5 boh sang mơ̆ng sa găp djuê prŏng mơ̆ng 5 ama anak: Quốc Khánh- Cộng Hoà- Xã Hội Chủ Nghĩa- Việt Nam, mâo mdơ̆ng mơ̆ng hdră êlan Quang Trung, kjăp siam leh hlăm krah čuê lŏ mtah mda. Tui si Trần Chủ Nghĩa, bruă lŏ wĭt rŭ mdơ̆ng tui si hdră êlan mơ̆ng khua knŭk kna mtrŭt mjhar, amâo mâo djŏ knŏng lŏ rŭ mdơ̆ng pưk sang mrâo, ƀiădah lŏ đru kơ mnuih ƀuôn sang mkŏ mjing klei hdĭp, lehanăn mâo klei kăp kčĕ mđĭ ai.

 “Dah dôk k’ŭ kyăm nanao hlăm klei ênguôt hnĭng, snăn amâo mâo srăng dưi ngă sa mta bruă ôh, kyuadah ai tiê ka kjăp, klei mĭn ka djŏ, yŏng sa boh giêt êa kăn truh rei. Pô gĭr brưih yơh hdĭp hlăm klei mơak mñai, brei mâo klei mĭn êđăp ênang, snăn kơh djăp mta bruă srăng dưi ngă, amâo mâo jăk êgah êmăn ôh, lehanăn ai tiê mă bruă jăk hĭn mơh”.

Hlăm dŭm hrue mơak Đảng, mơak yan mnga, Chủ Nghĩa ăt ktrŏ hŏng lu bruă păng čuôr êtung sang ti gah, pioh ngă anôk drông tue, anôk pioh dưm êdeh. Nghĩa lŏ pla dua ƀĕ kmeh msei ngă ƀăng jang, lehanăn mkra anôk kă hla čhiăm gru. Ñu lač, klei čŭt hla čhiăm gru lăn čar ti sang mrâo hlăm krĭng lŏ kơrŭ wĭt leh klei êa lip, jing klei yuôm bhăn êdi:

“Bi kă mtam 2 dua blah hla čhiăm gru ti dua ƀĕ kmeh ƀăng jang bi jăk. Kâo ƀuh sang mâo hla čhiăm gru mrâo jing Ok djŏ mơ̆? Lehanăn nah dih jing sang amao kâo. Thŭn anei ama 45 thŭn Đảng, kâo êbeh kơ 10 thŭn Đảng leh mơh”.

Hlăm ai êwa yan mnga Bính Ngọ mơak kơ Đảng, mơak yan mnga, hŏng dŭm blah hla čhiăm gru bi kđhĭt ti ƀăng jang sang mrâo, amâo mâo djŏ knŏng bi knăl kơ sa yan Tết djăp ênŭm hĭn, lehanăn dưi lŏ bi klă kơ klei êpa mhao hơĭt klei hdĭp mda, mkŏ mjing kơ mgi dih kjăp hĭn hlăm lăn kreh tuôm nanao hŏng klei êa lip lêč anei./.