Hruê dŭm gŏ sang ti krĭng êa lip Hoà Thịnh, čar Dak Lak atăt Táo wĭt kơ adiê, mjưh ruê̆ thŭn Ất Tỵ, ăt jing dŭm hruê hơ̆k mơak mơ̆ng hdră “Yan mnga wăl 5 bi mguôp klei khăp lĭng kahan mnuih ƀuôn sang”. Hlăm wăl anôk kriê puih hƀuê ênuk gưl ala čar Hòa Thịnh, mnuih ƀuôn sang, knuă druh, lĭng kahan bi đŭng điŏ, bi lông mjuăt asei mlei, ngă klei kdŏ mmuñ. phung hđeh điêt, phung êdam ngiêk, mnuih prŏng mâo phung lĭng kahan khăt brei ƀŭk. Phung amĭ, phung amai nao blei mnơ̆ng ti anôk čhĭ mnia ênoh 0 prăk. Phạm Văn Mạnh, mnuih ƀuôn sang să Hoà Thịnh hơ̆k mơak brei thâo:

 “Tal êlâo hĭn kâo lač jăk kơ Đảng, klei đru mơ̆ng Lĭng kahan.Gưl êa lêč mrâo êgao dưi lač msĕ si dlăng kriê mnơ̆ng dhơ̆ng braih huă, êmnăm. Dŭm anôk bruă, dhar bruă ăt kriê dlăng, ăt mâo êsei huă, lŏ wĭt trei mđao, sang dôk ăt dưi lŏ wĭt mdơ̆ng kjăp.”

Hòa Thịnh jing anôk êa lip êlam hĭn hlăm gưl êa lip ka tuôm mâo mlan 11/2025. Hlăm wưng dleh dlan hĭn, 4 bĭt kiêng êa lip, dŭm êpul lĭng kahan hmao mâo ƀô̆ mta mbĭt hŏng gưl bruă Đảng nah gŭ, Bruă sang čư̆ êa alŭ wăl hrăm mbĭt hŏng mnuih ƀuôn sang mơ̆ng klei đru dŏng, msir bôh jhat yan adiê ngă truh kơ lŏ wĭt mdơ̆ng sang dôk, krŭ wĭt klei hdĭp kơ mnuih ƀuôn sang leh êa lêč. Leh hră bruă Quang Trung,  klei dưi ti să Hoà Thịnh, rup phung lĭng kahan Awa Hồ kđăm hlăm ai tiê mnuih ƀuôn sang. Đại tá Đinh Văn Hưng, khua bruă kđi čar Knơ̆ng gĭt gai lĭng kahan čar Dak Lak mñă ktang. Hdră Yan mnga wăl 5 bi mguôp - tết klei khăp lĭng kahan - mnuih ƀuôn sang” tal anei lŏ sa blư̆ mñă klă klei khăp lĭng kahan mnuih ƀuôn sang lŏ kjăp hĭn:

 “Hŏng hdră hruê anei drei lŏ mñă klă sa klei kmeh gơ̆ng mkŏ mjing bruă lĭng kahan jih jang mnuih ƀuôn sang, klei êđăp ênang mnuih ƀuôn sang amâo djŏ knŏng klei răng mgang, êpul êya, ƀiădah tal êlâo hĭn hŏng klei bi mguôp sa ai plah wah lĭng kahan hŏng mnuih ƀuôn sang. Êjai mnuih ƀuôn sang ênang, mnuih ƀuôn sang tŭ, anăn jing tur knơ̆ng kjăp kơ klei hơĭt kjăp mơ̆ng djuê ana.”

Hluê si Phương Văn Lành, khua bruă Đảng să Hoà Thịnh, mơ̆ng êa lêč truh kơ dŭm hruê krŭ wĭt mơ̆ng hdră bruă Quang Trung truh kơ ară anei, Hoà Thịnh ăt mâo klei đru kơ kdrăp mnơ̆ng leh anăn ai tiê mơ̆ng Đảng, Knŭk kna, dŭm êpul bruă kđi čar, yang ƀuôn, dŭm êpul lĭng kahan, dŭm êpul ngă bruă jăk leh anăn dôk pral bi hlao grui êka kyua yan adiê ngă. Hdră yan mnga Wăl 5 bi mguôp tal anei lŏ sa blư̆ mkŏ mjing boh kdrŭt kơ Bruă sang čư̆ êa alŭ wăl hlăm bruă hluê ngă tŭ jing dŭm bruă klam thŭn 2026.

 "Mbĭt hŏng gưl bruă Đảng nah gŭ, Bruă sang čư̆ êa, dŭm êpul bruă kriê dlăng kơ mnuih ƀuôn sang. Boih nik hruê anei kahan alŭ wăl 5 ba yan mnga wăl 5 bi mguôp - trết klei khăp lĭng kahan mnuih ƀuôn sang truh ti să Hoà Thịnh, anei jing wưng yuôm bhăn čiăng đru kơ mnuih ƀuôn sang, hrăm mbĭt hŏng mnuih ƀuôn sang msir klei dleh dlan, brei kơ mnuih ƀuôn sang klei hơ̆k mơak drông sa tết trei mđao, yâo mơak.

Grăp čô mnuih ƀuôn sang Hoà Thịnh ktưn hưn hŏng knhuah gru krŭ kdơ̆ng, mjing klei dưi krŭ kdơ̆ng Hòa Thịnh dŭm thŭn 60, ară anei găn klei dleh dlan mơ̆ng yan adiê ngă. Tết anei mnuih ƀuôn sang krĭng êa lip ăt mâo klei khăp mơ̆ng klei hrăm mbĭt mơ̆ng êpul êya yang ƀuôn. Klei hdĭp mrâo dôk mâo hlăm grăp boh sang. Sa yan mnga mrâo dôk wĭt ti ƀuôn sang krŭ kdơ̆ng Hòa Thịnh./.