Hlăm boh sang mrâo prŏng 80m2 ti ƀon Bu Boong, să Tuy Đức, čar Lâm Đồng, amai Thị Duyên, djuê ana M’nông, hŏng ung leh anăn dua čô anak êmiêt tiêt pưk sang mprăp drông Tết. Boh sang kjăp mâo mdơ̆ng mơ̆ng hdră lăm lui sang tĭ ƀrôč, bi leh giăm mkrah thŭn anei, jing klei mơak prŏng hĭn gŏ sang ñu. Mâo sang mrâo, đang kphê mŭt hlăm yan pĕ boh tal êlâo, lŏ thiăm braih leh anăn mnơ̆ng ƀơ̆ng Tết mâo lĭng kahan jao, yan mnga thŭn anei hŏng gŏ sang amai Thị Duyên kyua anăn mâo klei mơak kluôm ênŭm:

“ Gŏ sang kâo mâo Knŭk kna đru 90 êklăk prăk mdơ̆ng sang mơ̆ng hdră lăm lui sang tĭ ƀrôč, dôk êbeh 3 mlan anei leh, jih gŏ sang mơak snăk. Mâo anôk dôk kjăp, hmei hơĭt ai tiê mă bruă, kriê dlăng kơ anak čô nao sang  hră. Tết anei mâo Êpul kahan 7 mđing uêñ, mđup brei prăk leh anăn mnơ̆ng ƀơ̆ng, kyua anăn gŏ sang pioh sa kdrêč blei thiăm mnơ̆ng ƀơ̆ng, čhum ao mrâo kơ phung anak drông Yan mnga Bính Ngọ. Gŏ sang kâo hdơr knga kơ đảng, knŭk kna lu snăk.”

Ăt msĕ si Tuy Đức, klei mơak drông Tết djăp ênŭm dôk lar ba kơ lu gŏ sang dleh dlan ktuê knông lăn čar Lâm Đồng. Ti alŭ Bình Minh, să Dak Wil, Lữ Thị Đan, djuê ana Thái, hjăn păn rông anak leh ung djiê hnưm. Krah thŭn dih, mơ̆ng hdră đru duh ƀơ̆ng, ñu mâo mkăp 250 drei mnŭ mjeh hŏng mnơ̆ng ƀơ̆ng  mnơ̆ng rông leh anăn mâo knuă druh să mtô mkra war êning.  Giăm Tết, gưl mnŭ tal êlâo ba čhĭ ba ênoh hrui wĭt lu. Mkrah ênoh prăk ñu pioh lŏ rông, kdrêč adôk jing preăk hriăm hră leh anăn kčoh čhum ao mrâo kơ anak. Dŭm hruê giăm Tết, 30 kg braih đru mơ̆ng knŭk kna hŏng điŏ, mnơ̆ng yua  kyua lĭng kahan mđup brei đru kơ dua amĭ anak amâo lŏ rŭng răng ôh. Lữ Thị Đan, brei thâo:

 “Mâo mă braih đru mơ̆ng Knŭk kna, mnơ̆ng Tết mơ̆ng lĭng kahan, amĭ anak kâo hơ̆k mơak snăk, mni lač kơ Đảng leh anăn Knŭk kna. Tết anei amĭ anak kâo djăp mnơ̆ng ƀơ̆ng huă, mnơ̆ng ƀơ̆ng Tết leh. Thŭn mrâo Bính Ngọ, tơdah dưi, čang hmăng Đảng, Knŭk kna mđing uêñ hĭn kơ dua amĭ anak tlaih kơ klei dleh dlan.”

Klei mơak dôk truh ti krĭng knông lăn Lâm Đồng jing boh tŭ mơ̆ng klei hrăm mbĭt jih bruă kđi čar. Grăp thŭn, Êpul kahan 7 bi hgŭm hŏng bruă sang čư̆ êa alŭ wăl mkŏ mjing hdră “yan mnga lĭng kahan”. Ti Lâm Đồng, hdră thŭn anei mâo pŏk ngă hrăm mbĭt ti 5 să knông lăn mâo Tuy Đức, Đắk Wil, Thuận An, Thuận Hạnh leh anăn Quảng Trực. Mbĭt hŏng bruă kơrŭ wĭt anôk mnuih ƀuôn sang dôk giăm kdrông kahan  ti să Quảng Trực,  hdră mđup brei êbeh 2.600 hnư mnơ̆ng Tết mâo ênoh hlăm brô 5 êklai prăk kơ mnuih ƀuôn sang leh anăn lĭng kahan ti krĭng knông lăn. Dŭm êbâo klŏ điŏ mđup brei kơ gŏ êsei ƀun, giăm ƀun, lu gưl ksiêm mkă, mbha êa drao amâo mă prăk dưi mkŏ mjiing; sang mnia “0 prăk” duh kơ mnuih ƀuôn sang blei mnơ̆ng Tết. Đại tá Nguyễn Văn Sơn,  Khua dlăng bruă Đảng anôk bruă gĭt gai lĭng kahan čar Lâm Đồng brei thâo:

“Mơ̆ng dŭm bruă ngă mơ̆ng Hdră “Yan mnga lĭng kahan” thŭn anei ba leh klei kđi čar yuôm bhăn, bi êdah ai tiê bi hgŭm plah wah lĭng kahan leh anăn mnuih ƀuôn sang. Mơ̆ng anăn  ai tiê mnuih ƀuôn sang ƀrư̆ dưi mđĭ, mkŏ mjing kjăp hĭn ti knông lăn čar Lâm Đồng.”

Leh bi mŭt mơ̆ng dŭm čar Dak Nông, Lâm Đồng leh anăn Bình Thuận, čar Lâm Đồng mrâo mâo ênhă giăm 24.300km², prŏng hĭn kluôm ala, mâo knông lăn ti lăn hang, mâo knông lăn êa ksĭ. Hjăn ktuê knông lăn lăn hang taih 142 km, hŏng 5 să, giăm 100 êbâo čô mnuih ƀuôn sang hdĭp mda, giăm mkrah wah ênoh mnuih ƀuôn sang jing mnuih djuê ƀiă. Wăt tơdah leh bi mŭt, čar ăt dôk mđĭ lar boh tŭ mơ̆ng hdră bi hrŏ ƀun kjăp lu tĭng, kƀĭn hlăm krĭng wăl dleh dlan. Gưl Tết Bính Ngọ, čar iêô mkrum mđup brei 1.600 hnư mnơ̆ng, ênoh bi liê 1,6 êklai   prăk kơ gŏ sang dleh dlan ti knông lăn. H’Vy Êban, K’iăng Khua Knơ̆ng bruă mặt trận čar Lâm Đồng brei thâo:

 “Mơ̆ng hdră,mnuih ƀuôn sang thiăm klei găl mơak yan mnga, drông Tết hơuh mđao leh anăn djăp ênŭm hĭn. Anei ăt jing bruă klă sĭt, tŭ dưn, đru hlue ngă hdră êlan mơ̆ng Đảng, Knŭk kna hŏng ai tiê amâo brei hlei pô ti tluôn”.

Mơ̆ng boh sang kjăp hrô kơ sang tĭ, dŭm gru hmô duh ƀơ̆ng dôk mđĭ lar klei tŭ dưn, truh kơ dŭm hnư mnơ̆ng mđup brei djŏ mmông, klei hdĭp mda mnuih ƀuôn sang ti knông lăn Lâm Đồng dôk grăp knhuang dưi mđĭ. Yan mnga knông lăn amâo djŏ knŏng jing mnga siam ôh, jing điŏ mtah ôh, ƀiădah lŏ jing klei đăo knang dưi mđĭ, jing êpul bi hgŭm jih jang djuê ana lŏ dơ̆ng dưi mđĭ, mkŏ mjing kjăp klei găl hlăm ai tiê mnuih ƀuôn sang, krơ̆ng kjăp klei găl leh anăn klei êđăp ênang ti anôk phŭn čar kwar./.