Hlăm dŭm hrue giăm Tết ngyên đán Bính Ngọ 2026, hlăm čar Gia Lai mâo nanao klei duh mĭn kơ klei hdĭp mda dŭm gŏ sang knŭk kna dlăng ba, gŏ sang ƀun, mnuih djuê ƀiă. Ti ƀuôn hgŭm Ia Rbol, anôk mâo hlăm brô 93% ênoh mnuih jing djuê ana Jarai, Adŭ bruă kahan ksiêm êlan klông, mơ̆ng knơ̆ng bruă kahan ksiêm čar Gia Lai hgŭm leh hŏng knơ̆ng bruă sang čư̆ êa ƀuôn hgŭm Ia Rbol mkŏ mjing hdră “Yan mnga h’uh mđao - Tết klei khăp”. Êpul mkŏ mjing ăt mđup brei leh 200 hnư mnơ̆ng Tết, grăp hnư hŏng ênoh 500.000 prăk, truh hŏng dŭm gŏ sang knŭk kna dlăng ba, gŏ sang ƀun, gŏ sang dleh dlan. Nay Pol, K’iăng khua adŭ bruă dhar kreh – Yang ƀuôn ƀuôn hgŭm  Ia Rbol, čar Gia Lai brei thâo:

“Grăp wưng Tết djuê ana, ƀuôn hgŭm Ia Rơbol mâo nanao klei duh mĭn kơ klei hdĭp mnuih ƀuôn sang, hŏng klei čang hmăng kơ jih jang mnuih mâo drông Tết mơak mñai, h’uh mđao. Hlăm wưng Tết, čar mâo ênoh đru mơĭt truh kơ dŭm boh ƀuôn hgŭm, bi mbha kơ mnuih ƀuôn sang mâo drông Tết djăp ênŭm hĭn. Mbĭt hŏng anăn, ƀuôn hgŭm dôk mđing kơ dŭm gŏ sang găn klei ruă duam, mnuih amâo mâo jăk asei mlei lehanăn dŭm gŏ sang dôk hlăm klei dleh dlan, rơ̆ng kơ jih jang mnuih amâo mâo lĕ hlăm klei ư̆ êpa, kƀah mnơ̆ng čŭt hơô ôh hlăm yan Tết.”

Să Dam Rông 4 čar Lâm Đồng dưi mkŏ mjing hluê hdră bi mŭt kluôm ênhă lehanăn ênoh mnuih mơ̆ng 3 să: Dă Tông, Dă Long lehanăn Dưng K’Nơ̆. Să mâo ênhă prŏng hŏng êbeh 17.000 čô mnuih, hlăm anăn lu jing mnuih djuê ana ƀiă. Lơ Mu Ha Poh – Khua bruă Đảng să Dam Rông 4, brei thâo, grăp blư̆ Têt truh yan mnga hriê, bruă Đảng lehanăn bruă knŭk kna alŭ wăl mđing dlăng nanao kơ klei hdĭp mnơ̆ng dhơ̆ng lehanăn ai tiê klei mĭn kơ mnuih ƀuôn sang, boh nik kơ gŏ sang mnuih djuê ƀiă, gŏ sang ƀun lehanăn dŭm gŏ sang hmăi mơ̆ng klei yan adiê ngă. Mbĭt hŏng ngăn prăk alŭ wăl, mâo lu êpul đru kơ mnuih knap mñai đru êbeh 1.000 hnư mnơ̆ng kơ mnuih djuê ƀiă.

“Hlăm wưng têt čiăng mjing ai êwa hơ̆k mơak kơ mnuih ƀuôn sang, alŭ wăl mkŏ mjing leh lu hdră dhar kreh – kdŏ mmuñ, klei hlăp djuê ana, bi lông tŭk ƀêñ điŏ, mnah phao briêng hlăm mlam 30 Têt. Mbĭt anăn, êngao bruă jao hnư mnơ̆ng hluê hdră mtrŭn mơ̆ng Đảng, Knŭk kna, alŭ wăl lŏ đru mnơ̆ng dhơ̆ng kơ gŏ sang ƀun, giăm ƀun, gŏ sang hmăi kjham mơ̆ng klei adiê hjan êa lip lêč knhal jih thŭn êgao čiăng kơ mnuih ƀuôn sang mâo klei găl drông Têt trei mđao, yâo mơak”.

Ƀuôn hgŭm Đăk Tô (Quảng Ngãi) mâo mkŏ mjing mơ̆ng leh bi mŭt wăl krah Đăk Tô lehanăn dŭm boh să Tân Cảnh, Pô Kô, Diên Bình. Thŭn 2025, klei duh mkra ala ƀuôn hlăm ƀuôn hgŭm mâo nanao klei đĭ kyar, mâo leh lu ênoh čuăn dưi djăp, lehanăn kdlưn hĭn hŏng hdră kčah. Mbĭt hŏng bruă duh kơ klei hdĭp mnuih ƀuôn sang, čiăng kơ jih jang mnuih mâo drông Tết djăp ênŭm, h’uh mđao, ƀuôn hgŭm Đăk Tô mâo klei mđing kơ bruă mkŏ mjing dhar kreh, mơak yan mnga jiă knhuah gru. Mai Huy Hưng – K’iăng khua knơ̆ng bruă sang čư̆ êa ƀuôn hgŭm Đăk Tô brei thâo:

“Kơ bruă dhar kreh yang ƀuôn hmei mâo nanao klei mđing, mâo lu bruă mơak mñai hlăm yan mnga, čiăng kơ mnuih ƀuôn sang hlăm alŭ wăl mâo drông Tết lehanăn mâo ngă dŭm bruă mbĭt hŏng ƀuôn sang. Boh nik grăp thŭn ƀuôn hgŭm mkŏ mjing leh hdră ‘Đuing điŏ klŏ mtah’ mbha prăk đru kơ mnuih ƀuôn sang ngă klei bi đung điŏ mprăp drông Tết, boh nik mbha bêñ kan kơ dŭm gŏ sang ƀun, giăm ƀun./.

Bon Pi Nao, să Nhân Cơ, čar Lâm Đồng jing anôk bi mklin ênŭm knhuah dhar kreh djuê ana đưm mơ̆ng êpul êya mnuih djuê ƀiă nah Dhŭng Lăn dap kngư, msĕ si: M’nông, Mạ, K’ho, Ngôi mơ̆ng mduôn H’Yon, Khua bruă Đảng ƀuôn Pi Nao, jing anôk ngă bruă mơ̆ng Êpul pơ̆k mñam, mbĭt anăn ăt jing sa hlăm dŭm anôk tui ksiêm kơ dhar kreh mơ̆ng Wăl anôk hiu čhưn ênguê êpul êya ti ƀuôn Pinao, boh nik hlăm wưng Têt truh yan mnga hriê.

Wăl hiu čhưn ênguê êpul êya ti ƀuôn Pinao mphŭn ngă bruă, tinei hmei mâo nao hgŭm hlăm hdră kdŏ, mmuñ, mdah wĭt knăm ngă yang mdiê mrâo lehanăn tŭk dŭm mta djam ƀơ̆ng djuê ana. Hŏng kơhưm jing khua êpul bi hgŭm, hmei knă kpiê čeh, mâo mtei juê ƀhu krô, êbŭng krô čiăng mkăp kơ tuê. Mbĭt anăn lŏ mâo hdră kdŏ mmuñ djuê ana, êpul tông čing. Sang sang mjing klei găl čiăng kơ ƀuôn kriê kjăp knhuah dhar kreh djuê ana pô, mbĭt anăn čiăng kơ ênuk gưl hđeh lŏ khăp čiăng hĭn lehanăn kriê kjăp knhuah dhar kreh djuê ana pô. Têt truh, Đảng, Knŭk kna ăt mtrŭt mjhar grăp čô mnuih hlăm ƀuôn hrăm mbĭt mkŏ mjing klei ƀơ̆ng Têt msĕ si ayŏng adei Yuăn, čiăng kơ jih jang mâo wưng kuh kŭm, bi tuôm mbĭt. Sang mâo klei găl mkŏ mjing prŏng, bi đa đa mkŏ mjing điêt.