Bruă ngă anei kñăm mđĭ ai mnuih ƀuôn sang hơ̆k mơak drông tết, hơuh mđao, lŏ thiăm klei đăo knang leh anăn boh kdrŭt kpưn đĭ hlăm klei hdĭp. Hoàng Duy Chinh mñă klă Đảng, Knŭk kna leh anăn Bruă Kbĭn ala uêñ mĭn nanao kơ bruă djuê ana, bi hơĭt klei hdĭp yang ƀuôn ti alŭ wăl knông lăn, mñă kơ alŭ wăl lŏ dơ̆ng kriê dlăng klei hdĭp mnuih ƀuôn sang, bi lar klei bi mguôp, djă pioh dhar kreh.

Ăt hlăm hruê, êpul nao čuă, hơêč hmưi tết kơ phung knuă druh, lĭng kahan kđông kahan knông lăn Yok M’Bre. Hoàng Duy Chinh čih yap, bi myuôm dŭm klei gĭr mơ̆ng anôk bruă hlăm klei kriê dlăng, răng mgang klei dưi kiă kriê, klei êđăp ênang knông lăn ala čar leh anăn nao hgŭm mkŏ mjing bruă kđi čar nah gŭ, kriê dlăng klei hdĭp mnuih ƀuôn sang ti alŭ wăl.