Jih hrue kăm anei, truh aguah ưm mâo yơh hlăm brô giăm 400 čô mnuih ƀuôn sang ti ƀuôn hgŭm knông lăn Ia O, čar Gia Lai ênŭm ênap ƀô̆ mta ti krah ƀuôn hgŭm čiăng nao hriăm klei bi lông mă hră dưi mgăt êdeh hnơ̆ng A1. Jing alŭ wăl mâo giăm 70% jing mnuih djuê ƀiă, kei hdĭp mda dôk lu klei dleh dlan, kyuanăn bruă bi hriăm klei bi lông mă hră dưi mgăt êdeh mâo mkŏ mjing amâo mâo mă prăk ôh  kơ mnuih ƀuôn sang. Ksor Thí, ti ƀuôn O, ƀuôn hgŭm Ia O brei thâo:

 “Kâo thâo djă êdeh p’phŭt mơ̆ng sui leh, ƀiădah kâo ka mâo ôh hră tŭ yap dưi djăp mgăt êdeh. Leh mâo klei hâo hưn, kâo ngă leh hră mơar čiăng mâo klei thâo săng mjuăt hriăm kơ klei bhiăn êrô hiu hlăm êlan klông. Sĭt nik leh ruĕ hriăm, bi lông mă hră tŭ yap dưi mgăt êdeh, mơ̆ng anăn kâo hơĭt ai tiê yơh êrô hiu đĭ êdeh êdâo hŏng klei êđăp ênang."

Čiăng kơ đru kơ mnuih ƀuôn sang ênưih truh hŏng klei bi lông, dŭm êpul êya djŏ tuôm hgŭm mkŏ mjing leh adŭ mjuăt bi hriăm klei bi lông ti ƀuôn hgŭm mtam. Êngao kơ bruă mtô bi hriăm klei bhiăn êrô hiu hlăm êlan klông, mnuih ƀuôn sang lŏ mâo klei ktrâo atăt ƀhĭ ênŭm dŭm klei bi lông, hŏng dŭm anôk msĕ si: Đĭ ti êlan dar mrô 8, đĭ hlue gru treh kpă, đĭ găn dŭm êlan mâo mnơ̆ng bi gun… Võ Thị Hà, K’iăng khua anôk bruă mjuăt bi hriăm hdră bi lông tŭ mă hră dưi mgăt êdeh, ƀuôn hgŭm Pleiku, čar Gia Lai brei thâo, klei mkŏ mjing adŭ mjuăt bi hriăm hdră bi lông tŭ mă klei dưi mgăt êdeh hlăm krĭng taih kbưi mâo leh hdră êlan mă bruă jăk čiăng đru kơ mnuih ƀuôn sang thâo klei bhiăn lehanăn mâo djăp hră mơar hŏng klei kjăp:

 “Ngă djăp mta bruă, dơ̆ng mơ̆ng mă rup, lehanăn ngă hră mơar kơ mnuih ƀuôn sang. Ti anôk mjuăt bi hriăm klei bhiăn êrô hiu hlăm êlan klông, mâo leh hdră mă bruă amâo mâo mă prăk ôh kơ jih jang mnuih nao hriăm, boh nik hŏng mnuih ƀuôn sang dôk hlăm klei dleh dlan, ƀun ƀin.”

Leh ksiêm dlăng brei ƀuh, hlăm čar Gia Lai adôk dŭm êbâo čô mnuih ƀuôn sang hlăm krĭng taih kbưi ka mâo ôh hră mơar tŭ yap klei dưi djă mgăt êdeh hnơ̆ng   A1, lu jing hlăm dŭm boh ƀuôn hgŭm krĭng taih kbưi, krĭng mnuih djuê ƀiă.   Thượng tá Ksor H’Bơ Khắp, Kơăng khua knơ̆ng bruă kahan ksiêm čar Gia Lai brei thâo, čiăng mghaih msir klei anei, mơ̆ng akŏ thŭn truh kơ ară anei, kahan ksiêm čar  Gia Lai kiă kriê leh êpul êya djŏ tuôm bi hgŭm hŏng anôk bruă mjuăt bi hriăm klei bi lông mă hră mơar tŭ yap klei dưi mgăt êdeh, bruă sang čư̆ êa lehanăn anôk bruă mdrao mgŭn čar lehanăn dŭm êpul bruă bi đru mkŏ mjing klei mkă dlăng klei suaih pral, mkŏ mjing klei mjuăt bi hriăm amâo mâo mă prăk ôh, mkăp hră tŭ yap klei dưi mgăt êdeh ti hnơ̆ng A1 kơ mnuih ƀuôn sang hlăm alŭ wăl hlei pô mâo klei čiăng:

 “Amâo mâo djŏ knŏng čoh čuăn đơ knuă hlăm krĭng tai kbưi, krĭng knông lăn đuič ôh, ƀiădah hŏng wăt dŭm boh ƀuôn hgŭm ƀuôn prŏng mnuih lu, dôk hlăm klei dleh dlan, dưi nao hriăm lehanăn bi lông. Leh klei anăn srăng mâo klei bi hgŭm hŏng dŭm anôk bruă mkŏ mjign bruă knuă, bi lông, mkŏ mjing mkăp hră tŭ yap klei dưi mgăt êdeh. Mkŏ mjing klei bi kƀĭn, lehanăn mă bruă hŏng phung duh mkra, phung mâo ai tiê thâo bi đru, čih anăn pioh đru kơ mnuih ƀuôn sang hlue ngă dŭm bruă hriăm, bi lông lehanăn mkăp hră tŭ yap dưi mgăt êdeh.”

Tui si hdră, mơ̆ng ară anei truh jih thŭn 2025, kahan ksiêm čar Gia Lai mbĭt hŏng dŭm êpul êya djŏ tuôm, mâo klei čoh čuăn mkŏ mjing klei bi lông, mkăp hră tŭ yap dưi mgăt êdeh hnơ̆ng A1 kơ giăm 47.000 čô mnuih hriăm, lu jing mnuih djuê ƀiă. Bruă anei lŏ mâo hdră mđĭ hĭn klei thâo săng hdră bhiăn, đru bi hrŏ klei truh tơl hlăm êlan klông, hŏng klei kjăp hlăm mnuih djuê ƀiă hlăm čar./.