Čar mâo mta kñăm truh kơ thŭn 2030 mâo ƀiă êdi 80% ênoh sang hră mâo djăp hnơ̆ng čuăn ala čar, grăp čô hđeh hriăm hră dưi dưn hdră mtô bi hriăm bi knar, mâo hnơ̆ng tŭ jăk. Dŭm alŭ wăl mâo klei mđing tal êlâo jing dŭm krĭng kreh hmăi mơ̆ng klei yan adiê ngă, krĭng mâo hdră duh mkra – ala ƀuôn adôk dleh dlan lehanăn dŭm sang hră mprăp bi mklă djăp hnơ̆ng čuăn ala čar.

Mbĭt hŏng bruă mdơ̆ng mrâo dŭm êbâo boh adŭ hriăm ti jih jang gưl mơ̆ng gưl hriăm hđeh điêt truh kơ gưl tlâo, čar Gia Lai ăt mđing kơ dŭm klei hriăm Âm nhạc, Mỹ thuật, Ngoại ngữ, Tin học lehanăn boh nik jing hdră adŭ hriăm STEM, mkăp djŏ hŏng klei čiăng mơ̆ng Hdră mtô bi hriăm mrâo lehanăn mtrŭt mđĭ kyar hdră bi mlih mrô hlăm bruă mtô bi hriăm. Čiăng rơ̆ng boh tŭ dưn hdră anei, Knơ̆ng bruă sang čư̆ êa čar Gia Lai jao bruă klam klă klơ̆ng kơ dŭm knơ̆ng, dhar bruă, alŭ wăl hlăm bruă ksiêm dlăng keh lăn, mbĭt anăn bi mguôp phŭn mkăp prăk duh bi liê mơ̆ng dŭm hdră bruă kñăm ala čar./.