Ară anei čar Daklak mâo êbeh 252.000 čô mnuih mâo čan prăk mơ̆ng knơ̆ng prăk đru ba bruă yang ƀuôn, hŏng ênoh  leh brei čan êbeh 14.500 êklai prăk. Phung mâo čan jing dŭm gŏ sang ƀun, giăm ƀun, gŏ sang knŭk kna dlăng ba, mnuih djuê ƀiă, phung hđeh hriăm hră – phung hriăm gưl prŏng, dŭm gŏ sang čiăng kơ prăk pioh duh kơ bruă, duh mkra mnia mblei, rŭ mdơ̆ng sang mkra êa doh…. Klei brei čan prăk anei, dưi lăm lui leh klei hiu čan prăk kơ êngao hŏng mnga ktrŏ hlăm krĭng taih kbưi, đru lu alŭ wăl bi leh ênoh čuăn bruă mkŏ mkra krĭng ƀuôn sang mrâo, mơ̆ng anăn rơ̆ng klei êđăp ênang bruă kđi čar, klei êđăp ênang yang ƀuôn. Siămdah, klei hlue ngă hdră mtrŭn mrô   78 truh kơ ară anei, êdah lu klei awăt msĕ si klei brei čan ƀiă, mâo đa đa bruă amâo lŏ djŏ guôp ôh, ênoh prăk čan čiăng nao mă bruă kơ ala tač êngao ƀiă đei, prăk mnga mơ̆ng dŭm bruă đa đa jing đĭ.

Ti anôk mă bruă, dŭm klei blŭ mơ̆ng čar mđing đru kơ hdeh hriăm hră phung hriăm gưl prŏng čang truh 200 êklăk prăk hŏng dŭm gŏ sang ƀun, wưng kčah tla nư čan mơ̆ng 5 - 10 thŭn; lehanăn lŏ pŏk mlar mnuih dưi čan pioh nao mă bruă kơ ala tač êngao. Êpul nao ksiêm dlăng mă tŭ leh klei blŭ mơ̆ng čar Daklak, lehanăn brei thâo prăl srăng mâo klei ksiêm dlăng, pioh mâo hdră êlan mă bruă bi djŏ hŏng dŭm êpul dôk čiăng hlăm kluôm ala. mbĭt anăn, dưi ksiêm dlăng kơ klei bhiăn, hdră êlan ba yua kơ čar Daklak, msĕ si klei ba yua prăk mơ̆ng alŭ wăl pioh brei mnuih ƀuôn sang čan./.