Hlăm sang bi kƀĭn alŭ mrô 2, ƀuôn hgŭm Phú Xuân, čar Daklak lu mnuih ƀuôn sang mbĭt hŏng êpul kiă kriê ƀuôn, bi leh djăp ênŭm jih jang bruă mprăp kơ klei ruah khua ti anôk ruah khua mrô 10. Băng rôn, boh hră mđĭ ai, hla čhiăm gru mâo ka leh, hip mplĕ hră, jhưng mdhô̆, pui kmlă êa jua, sang tlô mâo mprăp leh djăp ênŭm, doh mngač.   Trần Văn Hùng, dôk hlăm êpul ruah khua mrô 10 brei thâo, hrue 15/3 tinăp, 1.060 jih jang mnuih srăng nao mplĕ hră. Kyuanăn mơ̆ng hnưm leh, bruă prăp êmiêt, jih jang bruă wăt hlăm klei êđăp ênang dưi yua kjăp kơ hrue ruah khua.

          “Mơ̆ng ênoh mnuih nao ruah khua mâo mƀlir leh anăn ti sang bi kƀĭn alŭ mrô 2 dŭm hrue leh êgao, hmei ăt hâo hưn, ktrâo atăt mnuih ƀuôn sang ksiêm bi nik anăn phung mgơư̆ng ruah. Mơ̆ng anăn čiăng dưi ruah hlei pô mâo klei thâo, mâo klei mưng leh hlăm bruă, pioh ruah mŭt hlăm êpul bi ala bruă kƀĭn ala, lehanăn êpul gơ̆ng bruă ƀuôn sang dŭm gưl.”

          Ƀuôn hgŭm Phú Xuân dưi mkŏ mjing leh klei bi mŭt mbĭt 3 boh să Ea Púk, Ea Dăh lehanăn Phú Xuân (dôk hlăm kdriêk Krông Năng hđăp). Klei ruah khua phung bi ala bruă kƀĭn ala gưl 16, lehanăn êpul gơ̆ng bruă ƀuôn sang dŭm gưl wưng thŭn 2026–2031, ƀuôn hgŭm mâo hlăm brô 25.000 čô mnuih nao mplĕ hră ti 7 anôk ruah khua, 19 anôk mplĕ hră. Nguyễn Tiến Ấn, K’iăng khua knơ̆ng bruă sang čư̆ êa ƀuôn hgŭm, jing mnuih dôk hlăm êpul ruah khua ƀuôn hgŭm brei thâo, truh ară anei, klei čih hưn kơ klei hdĭp phung mgơ̆ng ruah mâo mƀlir leh, snăn ară anei 19/19 anôk mplĕ hră mâo mprăp leh ênŭm jih jang bruă, dŭm klei bi kƀĭn bi tuôm hŏng mnuih ƀuôn sang ăt mâo mkŏ mjing leh ênŭm, dôk guôn hrue jih jang mnuih nao ruah khua.   

“Knơ̆ng bruă sang čư̆ êa ƀuôn hgŭm Phú Xuân mkra wĭt leh, bi msiam, yuôl băng rôn, boh hră, huôm mplĕ hră... Ti dŭm anôk ruah khua dưi hlue ngă djŏ hŏng klei čoh čuăn mơ̆ng Êpul gơ̆ng ruah khua ala čar. Truh ti wưng anei, jih jang bruă prăp êmiêt mâo ngă ênŭm. Bruă mƀlir anăn ti dŭm anôk ruah khua hlăk dôk ngă lehanăn dôk guôn kơ hrue ruah khua.”

Ti ƀuôn hgŭm M’Đrắk, kbưi hŏng ƀuôn phŭn čar Daklak hlăm brô 90 km, ai êwa mprăp êmiêt ruah khua ăt mjhĭt m’uăt. Nguyễn Đức Thảo, Khua knơ̆ng bruă sang čư̆ êa ƀuôn hgŭm, khua anôk bruă ruah khua ƀuôn hgŭm brei thâo, klei ruah khua phung bi ala bruă kƀĭn ala gưl 16, lehanăn êpul gơ̆ng bruă ƀuôn sang dŭm gưl ti alŭ wăl mâo hlăm brô 15.800 čô mnuih nao mplĕ hră ti 10 anôk hlăm 8 êpul êya ruah khua. Truh ară anei, bruă prăp êmiêt mâo bi leh ênŭm, knŏng dôk guôn hrue ruah khua. Nguyễn Đức Thảo hưn.

 “Ară anei, hmei mƀlir leh djăp ênŭm anăn phung mgơ̆ng ruah tri dŭm anôk mplĕ hră, ti dŭm anôk lu mnuih, lehanăn dŭm anôk bruă sang čư̆ êa ƀuôn hgŭm. Mkŏ mjing klei bi kƀĭn trông čhai tal 3, lehanăn bi êdah anăn 40 čô phung mgơ̆ng ruah, pioh ruah mă 24 čô pô bi ala Êpul gơ̆ng bruă ƀuôn sang wưng thŭn 2026 – 2031.”

Tui si Cao Thị Hòa An, k’iăng khjua bruă Đảng čar, Khua anôk bruă ruah khua čar Daklak lač, čiăng dưi đru kơ 2,42 êklăk čô mnuih nao mplĕ hră, čar mkŏ mjing leh 102 anôk bruă ruah khua gưl ƀuôn hgŭm dăp leh truh 2.119 alŭ wăl mplĕ hră. Truh ară anei, 100% alŭ wăl mplĕ hră bi leh jih jang bruă, rơ̆ng kơ klei êđăp ênang, mâo dŭm knhuang bi trông, mƀlir anăn mnuih nao ruah, mkŏ mjing klei bi tuôm hŏng mnuih ƀuôn sang, ngă djŏ hŏng klei čoh čuăn, mprăp kơ hrue ruah khua. Khua anôk bruă ruah khua čar Daklak mtă leh kơ dŭm knơ̆ng dhar bruă, lehanăn knơ̆ng bruă sang čư̆ êa dŭm boh ƀuôn hgŭm lŏ dơ̆ng ksiêm wĭt ênoh phung nao mplĕ hră, kñăm čiăng kơ jih jang mnuih mâo klei găl nao mplĕ hră.

“Mđing lŏ ksiêm wĭt ênoh mnuih nao mplĕ hră bi djăp ênŭm, čiăng kơ jih jang mnuih mâo klei găl nao mplĕ hră sơăi. Boh nik hŏng phung dôk mă bruă hlăm dŭm alŭ wăl duh mkra, phung nao mă bruă kbưi, phung hđeh hriăm hră, phung hriăm gưl prŏng, lehanăn mbĭt hŏng mnuih ka mâo ngă kak asei ôh, phung tal êlâo nao ruah khua. Boh nik, mnuih dôk hlăm klei ruă duam, dôk đih mdrao ti sang êa drao, ăt lŏ bi ksiêm yap čiăng kơ jih jang mnuih mâo ngă klei dưi kơ pô nao ruah khua.”

            Hŏng klei prăp êmiêt djăp ênŭm, kjăp mơ̆ng čar truh kơ nah gŭ, 102 boh ƀuôn hgŭm ti Daklak mprăp leh ênŭm kơ hrue ruah khua. Mơ̆ng anôk hlŏng kơ jih jang klei bi ksiêm wĭt mơ̆ng ênoh anăn mnuih nao ruah khua, jih jang wir kơ mta kñăm amâo mâo lui sa čô mnuih amâo mâo ruah khua. Hrue 15/3 tinăp, mbĭt hŏng mnuih ƀuôn sang kluôm ala, êbeh  2,42 êklăk čô mnuih ti Daklak srăng čhuang hlăm hrue mơak prŏng kơ lăn čar./.