Ti ƀuôn hgŭm knông lăn Ia Chia, dŭm hrue anei ai êwa prăp êmiêt kơ klei ruah khua mâo ngă mơ̆ng hnưm, knuă druh lĭng kahan kđông răng mgang knông lăn Ia Chia truh leh hlăm dŭm boh ƀuôn hgŭm hŏng alŭ wăl mtrŭt mjhar mnuih ƀuôn sang kơ bruă răng mgang klei dưi êngiê lăn čar, klei êđăp ênang ti knông lăn ala čar, klei dưi lehanăn bruă čuăn mơ̆ng grăp čô mnuih hlăm bruă ruah khua.  Phạm Văn Phúc, Khua bruă Đảng ƀuôn Kom Yố, ƀuôn hgŭm Ia Chia brei thâo, hlăm grăp blư̆ hâo hưn, mnuih ƀuôn sang amâo mâo djŏ knŏng thâo săng hĭn ôh kơ klei dưi, bruă čuăn kơ pô, ƀiădah lŏ mđĭ hĭn klei đăo knang kơ klei Đảng gĭt gai, klei bruă sang čư̆ êa alŭ wăl kiă kriê.

 “Truh ti wưng anei mâo hâo hưn kơ klei ruah khua truh 3 gưl, Ară anei ti dŭm boh ƀuôn, êpul ruah khua mrô 5 mâo bi leh ênŭm bruă mƀlir anăn mnuih nao ruah. Hrue ruah khua hlăm hrue 15/3/2026 snăn mâo hâo hưn leh hŏng jih jang mnuih ƀuôn sang păn kjăp boh tŭ hlăm bruă ruah khua.”

 Hlăm ƀuôn sang, bruă klam mơ̆ng khua mduôn, mnuih mâo kơhưm lŏ dơ̆ng mđĭ hĭn, hâo hưn kơ klei ruah khua, mtrŭt mnuih ƀuôn sang mâo klei thâo săng thâo ruah djŏ mnuih mâo klei năng, lehanăn mđĭ hĭn klei răng ti anăp klei duah mčeh luar mơ̆ng phung mplư, ngă klei bi kah ana mbha djuê. Khua mduôn   Rơ Châm Chích, ƀuôn Beng, ƀuôn hgŭm Ia Chia lač:

“Asei kâo mtam mñă kơ lu bruă čiăng kơ mnuih ƀuôn sang thâo săng, hŏng klei klă mngač ruah mnuih mâo klei thâo lu, mâo knhuah dôk dơ̆ng ƀơ̆ng huă jăk, lehanăn hur har hŏng bruă knuă pioh duh kơ mnuih ƀuôn sang. Pô dôk hlăm ƀuôn hgŭm ti knông lăn, snăn brei mâo klei thâo răng prŏng hŏng djăp mnêč jhat phung bi roh, amâo mâo hmư̆, amâo mâo hlue, bi hlue gưt kjăp hdră êlan mơ̆ng Đảng, klei bhiăn knŭk kna lehanăn dŭm klei čoh čuăn mơ̆ng alŭ wăl.”

Thiếu tá Nguyễn Thanh Bảo, pô ngă bruă kđi čar hlăm kđông kahan răng mgang knông lăn Ia Chia brei thâo: Păn kjăp klei kiă kriê mơ̆ng gưl dlông, êpul lĭng kahan truh hŏng grăp gŏ sang bi êmuh kña mđĭ ai, mâo klei ktrâo atăt klă mngač, đru kơ mnuih ƀuôn sang thâo săng klei yuôm bhăn mơ̆ng klei ruah khua, mđĭ hĭng klei thâo răng, krơ̆ng kjăp nanao klei thâi bi mguôp jih jang djuê ana ti knông lăn.

“Mđĭ klei thâo săng kơ mnuih ƀuôn sang, thâo klă klei yuôm bhăn mơ̆ng klei ruah khua. Mơ̆ng anăn, mnuih ƀuôn sang dưi thâo ruah mnuih mâo klei thâo lu, mâo knhuah dôk dơ̆ng ƀơ̆ng huă jăk bi ala brei kơ klei blŭ mơ̆ng mnuih ƀuôn sang, boh nik ti knông lăn anei Mnuih ƀuôn sang bi êdah klei thâo bi mguôp, hnŭk êngiê hlăm hră pô mplĕ. Hmei hâo hưn čiăng kơ mnuih ƀuôn sang mâo klei răng, hlue gưt hdră êlan Đảng, klei bhiăn knŭk kna bi kdơ̆ng hŏng djăp mta klei bi roh, klei bi kah ana mbha djuê.”

Ƀuôn hgŭm Ia Chia mâo leh 6 êpul êya ruah khua ti 10 boh ƀuôn, bi kjăp dŭm êpul ngă bruă hâo hưn, rơ̆ng kjăp klei êđăp ênang, mghaih msir bi jih klei kčŭt hưn… Hŏng êbeh 70% ênoh mnuih jing djuê ƀiă, hnơ̆ng thâo săng awăt êdu mơh, snăn bruă hâo hưn jing bruă knơ̆ng, ngă hŏng klei djŏ čiăng kơ jih jang mnuih ƀuôn sang ênưih thâo săng. Nguyễn Công Hòa, Khua knơ̆ng bruă sang čư̆ êa ƀuôn hgŭm Ia Chia brei thâo:

“Dŭm êpul bruă mâo leh hdră, mâo klei bhiăn, jao bruă ngă kơ grăp čô. Dŭm êpul mâo klei bi hgŭm, mâo kahan răng mgang knông lăn, kahan ksiêm, êpul kahan ƀuôn hgŭm… mâo leh klei bi kƀĭn, jao bruă čiăng răng mgang klei êđăp ênang hlăm alŭ wăl êlâo, hlăm êdei kơ hrue ruah khua bruă kƀĭn ala gưl 16, lehanăn êpul gơ̆ng bruă ƀuôn sang dŭm gưl thŭn păn bruă 2026-2031 mâo klei jăk siam rơ̆ng dưi mâo klei êđăp ênang kjăp sĭt hlămalŭ wăl ƀuôn hgŭm ti knông lăn.”

Tơdah knông lăn mâo klei êđăp ênang, mnuih ƀuôn sang mâo klei sa ai mơ̆ng mnuih ƀuôn sang, snăn hlăm grăp pŏk hră mplĕ ti knông lăn anei jing yuôm bhăn snăk. Amâo mâo djŏ knŏng ruah phung bi ala, ƀiădah lŏ dưi bi mklă kơ klei dưi êngiê, bi knăl kơ klei thâo bi mguôp jih jang djuê ana. Mơ̆ng sa hdră êlan mă bruă mđrăm mbĭt jih jang, hlăm kluôm bruă kđi čar, mbĭt hŏng ai tiê mâo klei thâo uêñ klam mơ̆ng grăp čô mnuih ti knông lăn, snăn hlăk mjing leh atur kjăp kơ hrue mơak lăn čar hlăm klei êđăp ênang, hnŭk êngiê, djŏ hŏng hdră bhiăn./.