Ruah khua - hrue mơak kơ ai tiê mnuih ƀuôn sang, jing giê mkă kơ klei hnŭk êngiê  jing atur kơ klei pioh rŭ mdơ̆ng sa lăn čar mâo klei bhiăn kjăp, sa yang ƀuôn mtăp mđơrm kreh dhar. Anei jing wưng klei ngă phŭn êngiê mơ̆ng mnuih ƀuôn sang mâo bi êdah tinăp mta, mâo bi knăl hŏng hră mplĕ. Nai prŏng, nai prĭn Nguyễn Minh Đoan, nai mtô prŏng gti sang hră gưl prŏng Luật Hà nội lač: Hŏng klei ruah khua, mnuih ƀuôn sang čŏng pô nao čoh čuăn bruă prŏng kơ lăn čar lehanăn aluĭ wăl; msĕ si nao hlăm bruă kiă kriê hlăm bruă lăn čar lehanăn yang ƀuôn, hŏng dŭm anôk bruă mâo klei dưi mơ̆ng pô yơh ruah:

 “Anei jing klei mnuih ƀuôn sang bi êdah kleik dưi pô hŏng bruă ruah mnuih knhâo, mâo knhuah dôk dôk dơ̆ng ƀơ̆ng huă jăk, jing phung kdlưn hĭn mơ̆ng jih jang mnuih hlăm yang ƀuôn nao mŭt hlăm anôk bruă mâo klei dưi, anôk bruă bi ala brei kơ mnuih ƀuôn sang. Tơdah ñu klă sĭt jing bi ala brei kơ klei tŭ dưn amâo mâo djŏ knŏng kơ lăn čar, ƀiădah kơ grăp čô mnuih snăn mmông anăn ƀuh klei pô nao ruah khua klă sĭt jing hrue mơak êdi, lehanăn ƀuh klei ruah khua anăn jing yuôm bhăn êdi.”

Klei ruah phung bi ala bruă kƀĭn ala gưl 16, lehanăn êpul gơ̆ng bruă ƀuôn sang wưng păn bruă thŭn 2026–2031 êjai lăn čar čhuang hlăm ênuk kčưm kơ klei mđĭ kyar. Ka tuôm mâo ôh Việt Nam dôk ti anăp klei găl prŏng msĕ si ară anei: K’hưm pô hŏng ala tač êngao mâo lŏ mđĭ; êpa mhao kơ klei đĭ kyar mdrŏng sah jing ai tiê ktang, kreh knhâo – kdrăp mrâo, klei bi mlih mrô, duh mkra mtah, duh mkra mrô pŏk mlar dŭm klei mđĭ kyar mrâo, mlih mrâo hdră êlan kiă kriê hŏng klei klă mngač.

Hlăm klei msĕ snăn, klei ruah khua tal anei amâo mâo djŏ knŏng jing klei yuôm bhăn kơ wưng 5 thŭn, ƀiădah lŏ jing klei hrŏng ruah hdră êlan nao djŏ kơ lăn čar, mâo klei kjăp bruă hlăm bruă kiă kriê, klă sĭt dưi bi sĭt klei mđĭ kyar wưng tinăp. Tui si nai prŏng nai prĭn Nguyễn Viết Chức - K’iăng khua anôk bruă dhar kreh, mjuăt bi hriăm, hlăk ai hđeh êlăk mơ̆ng anôk bruă kƀĭn ala, mơ̆ng klei anăn, brei mâo grăp čô mnuih ƀuôn sang thâo săng klă hĭn kơ klei jing lăn čar, lehanăn kơ klei mđĭ kyar, nao mđrĭng mbĭt hŏng bruă klam klei pô hrŏng ruah:

 Drei hlăk čhuang hlăm ênuk mđĭ kyar klei djuê ana pô dôk êpa mhao, truh thŭn 2045 jing sa ala čar đĭ kyar. Ñu mâo klei čoh čuăn prŏng brei mâo čiăng kơ phung bi ala jing phung năng mâo knhuah jăk, mâo klei thâo hĭn, jih ai tiê hur har kơ bruă kčah jao. Lehanăn mnuih ƀuôn sang thâo săng hĭn jing klei tŭ dưn lehanăn bruă klam hŏng klei mđĭ kyar lăn čar.”

 Klei ruah khua phung bi ala bruă kƀĭn ala gưl 16 lehanăn phung bi ala êpul gơ̆ng bruă ƀuôn sang dŭm gưl wưng păn bruă 2026-2031 ƀaih hĭn mơh lŏ thiăm klei yuôm bhăn, leh klei bi kƀĭn prŏng phungbi ala kluôm ala gưl 14 mơ̆ng Đảng mâo klei tŭ jing, bi klă bruă čuăn kơ klei mđĭ kyar hlăm ênuk gưl mrâo, lehanăn hrŏng ruah êpul mă bruă mâo klei kjăp hlăm bruă kđi čar, mâo knhuah dôk dơ̆ng ƀơ̆ng huă jăk, mâo klei mĭn mlih mrâo, lehanăn thâo duh myơr ai tiê. Nguyễn Văn Phúc, k’iăng khua anôk bruă duh mkra hlăm bruă kƀĭn ala êlâo dih lač: Klei tŭ jing mơ̆ng klei bi kƀĭn prŏng amâo mâo djŏ knŏng mjing atur kơ brŭ kđi čar kjăp, ƀiădah lŏ bi kjăp klei đăo kang kơ mnuih ƀuôn sang hlăm klei Đảng kiă kriê – boh phŭn bi klă kơ djăp mta klei dưi mơ̆ng cách mạng Việt Nam.

 “Klei bi kđĭn prŏng Đảng gưl 14 mrâo mâo klei tŭ jing kdrăm k’ah pŏk sa ênuk mđĭ kyar mrâo, gưl ênuk kpưn đĭ mơ̆ng djuê ana Việt Nam. Mnuih ƀuôn sang đăo knang kơ klei Đảng kiă kriê, lehanăn đăo knang kơ bruă kƀĭn ala jing anôk bruă bi ala prŏng hĭn kơ mnuih ƀuôn sang, anôk bruă mâo klei dưi prŏng hĭn mơ̆ng knŭk kna. Mnuih ƀuôn sang srăng ruah djŏ phung bi ala năng dưi mŭt hlăm bruă kƀĭn ala  pioh hlue ngă jăk, mâo klei tŭ dưn, mâo klei tŭ hlăm 3 mta bruă yuôm bhăn hŏng mơ̆ng anôk bruă kƀĭn ala, mơ̆ng anăn đru mguôp dŭm bruă čuan mơ̆ng klei kƀĭn prŏng gưl 14 mơ̆ng Đảng mtrŭn.

Tơdah mnuih ƀuôn sang nao ruah khua hlăm klei đăo knang kơ hdră êlan mâo leh klei bi kƀĭn prŏng Đảng tă čua, lehanăn anôk bruaư̆ mâo klei dưi prŏng hĭn srăng dưi jing hŏng atur anăn, anăn yơh jing klei ktang, mjing boh kdrŭt prŏng pioh lăn čar kjăp knhuang hlăm wưng đĭ kyar mrâo./.