Bi ala kơ knŭk kna, Khua phŭn bruă Sang hră mơar Nguyễn Kim Sơn mâo leh hhră hâo mdah kơ hdră êlan mjuăt bi hriăm, kñăm mđĭ hĭng hnơ̆ng kjăp bruă sang hră mơar wưng thŭn 2026 – 2035 mâo ênoh bi liê kơ wưng thŭn 2026-2035  580.000 êklai prăk.

Ksiêm dlăng kơ bruă anei, Dhar bruă gĭt gai bruă kƀĭn ala mtă kơ anôk bruă čih mkra lŏ bi ksiêm duah, tĭng mkă bi nik, djăp mta bruă kñăm ngă truh kơ thŭn 2030 mâo 30% sang hră mtô bi hriăm hđeh điêt, sang hră gưl 1; 2; 3 ba bi hriăm klei Angle mjing klei blŭ tal 2, lehanăn mđĭ ênŭm 100% hlăm thŭn 2035.

Djŏ tuôm hŏng hdră mjuăt bi hriăm hlăm wưng 10 thŭn mơ̆ng 2026-2035 bi liê hlăm brô 580 êbâo êklai prăk mơ̆ng knŭk kna, Dhar bruă gĭt gai bruă kƀĭn ala mtă lŏ bi mkă tĭng klei kơ ngăn prăk, rơ̆ng bi mâo djăp prăk mă bruă. Ksiêm kơ bruă iêo mkrum ngăn prăk, mđing kơ hdră êlan mă bruă knŭk kna bi mguôp hŏng êngao knŭk kna pia PPP hlăm bruă mprăp kơ jih jang bruă sang hră mơar.

Mă klei blŭ kơ hdră mă bruă anăn, Khua bruă kƀĭn ala Trần Thanh Mẫn mtă brei mâo hdră tă kjăp kơ mgi dih, tĭng knăl kơ hdră êlan mđĭ kyar kơ klei hdĭp mda ala ƀuôn, kơ klei ba yua kdrăp mrô, mđing hlăm dŭm bruă phŭn, bruă knơ̆ng hlăm klei bi mlih mrô, mjuăt bi hriăm kjăp mnuih mă bruă, mtô bi hriăm hlăm krĭng taih kbưi, krĭng mnuih djuê ƀiă.

Mđrĭng hŏng klei anăn, jing mđing bi kjăp klei mjuăt bi hriăm, tă nanao hdră mă bruă bi djŏ kơ klei mtô bi hriăm hlăm krĭng taih kbưi, krĭng dleh dlan, krĭng mnuih djuê ƀiă, mjuăt bi hriăm sang hră hđeh điêt, mjuăt bi hriăm gưl prŏng, kñăm mâo hdră mkăp ênoh mnuih mă bruă bi găl guôp. Khua bruă kƀĭn ala Trần Thanh Mẫn lač:

“Mkŏ mjing klei bhiăn kjăp, čiăng dưi iêo jak phung duh mkra, dŭm êpul bruă lehanăn mnuih bi hgŭm duh bi liê hŏng bruă sang hră mơar. Kâo lač klei anei yơh jing yuôm bhăn hĭn, bi klei dôk mă bruă knŏng tui tiŏ prăk duh bi liê mơ̆ng knŭk kna, amâo srăng djăp ôh, kyuanăn bi mkŏ mjing klei bhiăn PPP hlăm bruă mprăp kơ klei rŭ mdơ̆ng mđĭ kyar kdrăp mă bruă hlăm sang hră mơar. Mâo lu sang hră mơ̆ng ala tač êngao duh bi liê, kñăm čiăng kơ phung hđeh hriăm hră amâo guôn lŏ nao kơ ala tač êngao ôh. Tơdah hnơ̆ng mjuăt bi hriăm jăk, sĭt nik anak aneh pô amâo lŏ luič liê lu ôh ngăn prăk kơ bruă hriăm mjuăt”.

Dưi thâo, ti anôk bi kƀĭn tal 10, Bruă kƀĭn ala srăng bi mlih hdră êlan čuăl mkă kluôm ala wưng thŭn 2021-2030, tă hdră truh thŭn 2050, hlăm anăn mđing kơ dŭm bruă bi kjăp hdră êlan mơ̆ng Đảng, Knŭk kna kơ bruă sang hră mơar, tui si Khua bruă kƀĭn ala mtă bi sa hnơ̆ng hdră mtô bi hriăm, lehanăn bi klin 3 hdră kñăm đăm mđĭ mđăl kơ klei duh bi liê, ƀiădah lŏ čuê hŏng klei tŭ dưn. Sa blư̆ dơ̆ng khua bruă kƀĭn ala čang hmăng, hdră mtô bi hriăm amâo mâo mdhung mdhiang, ƀiădah mđing kơ boh phŭn klei tŭ, klei năng djŏ.

K’iăng khua bruă kƀĭn ala Nguyễn Khắc Định sa ai hŏng hdră mtrŭn kơ bruă mjuăt bi hriăm jing ti hnơ̆ng ala čar, brei mâo klei duh bi liê hŏng klei mđĭ kyar kjăp hlăm wưng tinăp.

“Hlăm klei anei kâo ƀuh brei mâo 3 mta bi bluh đĭ; tal êlâo jing sang hră mơar, dua jing klei kreh knhâo lehanăn klei bi mlih mrô; 3 jing klei Angle. Hlăm anei kâo ƀuh sa mta brei drei mđing anăn jing klei drei lač, mjuăt bi hriăm brei bi kluôm ênŭm, ƀiădah tơl klei thâo luê êa hđeh hlŏng amâo mâo thâo. Mtô hră, bi nao mđrĭng hŏng klei mjuăt mjing anak mnuih, lehanăn mtô bruă. Phung hđeh ngă djŏ klei awa Hô mtă: Khăp kơ lăn čar, khăp kơ mnuih ƀuôn sang, hriăm jăk mă bruă jăk. Ƀiădah ƀuh hriăm jing đa jăk, đa hơăi, ƀiădah truh kơ mă bruă hlŏng amâo mâo jăk mtam”.

Kyua anăn, tui si k’iăng khua bruă kƀĭn ala Nguyễn Khắc Định, mbĭt hŏng klei hriăm hră mơar, lŏ mjuăt bi hriăm klei jing anak mnuih, bi dăp hĕ bi djŏ hdră mtô bi hriăm, čiăng kơ jih jang sang hră dưi ngă kjăp sơăi klei mjuăt bi hriăm kluôm ênŭm.

Hlak mblang kơ dŭm klei phung bi ala hlăm dhar bruă gĭt gai bruă kƀĭn ala lač, Khua Phŭn bruă sang hră mơar Nguyễn Kim Sơn brei thâo, kơ hdră lŏ bi ksiêm hlăm lu gưl, bi tĭng mkă kơ ênoh ngăn prăk, lehanăn mâo knŭk kna ba mdah hŏng Bruă kƀĭn ala tĭng mkă hŏng hnơ̆ng dưi mă bruă.

Klei ksiêm wĭt dŭm boh phŭn plah wah hdră bhiăn, hdră êlan mă bruă kơ hdră ala čar kñăm. Drei bi ksiêm, ya bruă jing năng ngă mtam, ngă yơh bi djŏ hŏng hdră mtrŭn mrô 71. Kyuadah hdră mtrŭn mrô 71 tă leh êlan mă bruă djŏ hŏng mta kñăm anei.”

Jih jang klei bi trông ti anôk bi kƀĭn tal 51 brei ƀuh, hdră ala čar kñăm kơ bruă mđĭ kyar sang hră mơar wưng thŭn 2026 – 2035 hlăk djŏ tuôm hŏng lu klei dôk mđing mơ̆ng mnuih ƀuôn sang: klei tŭ dưn djă yua ênoh duh bi liê êbeh 580 êbâo êklai prăk, klei dưi ngă dŭm mta kñăm kơ bruă mtô klei Angle, klei bi mlih mrô, amâodah rơ̆ng kjăp bi djăp sang hră mơar, kdrăp mtô bi hriăm, lehanăn mjing klei găl kơ klei mjuăt bi hriăm kluôm ênŭm kơ phung hđeh./.