Să krĭng čư̆ čhiăng Khánh Sơn, čar Khánh Hòa mâo giăm 12 êbâo čô mnuih ƀuôn sang, snăn mâo êbeh 8.500 čô mnuih Raglai. Cao Minh Khánh, K’iăng Khua dlăng bruă Đảng să Khánh Sơn, brei thâo, 5  thŭn êgao gŏ êsei ƀun tinei hrŏ lu, ƀiădah ăt adôk êbeh 20%, ênoh hrui wĭt kah knar grăp čô mnuih knŏng mâo 30 êklăk prăk/thŭn. Hŏng lu hdră êlan djŏ guôp dôk dưi pŏk ngă, boh tŭ mkra mjing mnuih ƀuôn sang dôk dưi bi mđĭ:

“Dŭm hdră êlan bruă duh mkra krĭng čư̆ čhiăng mrâo êgao dưi pŏk ngă lu snăk ti alŭ wăl, mnuih ƀuôn sang dưi dưn djăp ênŭm. Khădah snăn, nao êlam, nao giăm hŏng mnuih ƀuôn sang sang ăt ƀuh đa đa gŏ êsei ka dưi mđĭ lar tŭ dưn ôh hdră bruă. Adôk lu jing mđĭ lar jăk hdră êlan đru leh anăn tlaih ƀun kjăp.”

 Ksiêm dlăng kluôm čar Khánh Hòa, ênoh gŏ êsei ƀun mnuih djuê ƀiă hrŏ kah kbar êbeh 5% grăp thŭn; truh ară anei adôk êbeh 6.400 gŏ êsei, mâo 10,7%. Êbeh 3.500 boh sang dôk êjai, tĭ rưč dưi hrô hŏng boh sang kjăp. Êlan klông, sang hră, anôk bruă mdrao mgŭn, pui kmlă leh anăn êa jua truh kơ dŭm gŏ êsei mnuih ƀuôn sang.  Ti lu alŭ wăl leh bi mŭt, ênhă, ênoh mnuih ƀuôn sang đĭ, mâo thiăm lu hdră bruă đĭ kyar, mkra mjing tal êlâo mâo êlan nao mrâo, Msĕ si ti Trung Khánh Vĩnh dôk bi lar gru hmô pla ana boh kroh. Knŭk kna đru ana mjeh, prăk čan, mtô bi hriăm kơ hdră mnêč, mjing boh kdrŭt čiăng kơ mnuih ƀuôn sang jhŏng bi mlih. Cao Thị Ngọc Thanh, Khua Knơ̆ng bruă sang čư̆ êa să Trung Khánh Vĩnh brei thâo:

“Alŭ wăl mkŏ mjing hdră kčah mđĭ kyar gru hmô ana pla mjing phŭn, ruah ana bi djŏ guôp hŏng lăn ala, yan adiê, ngă djŏ klei čiăng mđĭ kyar bruă duh mkra, bi mlih bruă lŏ hma hlue hdră tŭ dưn. Lu mnơ̆ng dhơ̆ng dưi ba čhĭ, rơ̆ng hnơ̆ng lu, hnơ̆ng jăk, ba klei tŭ dưn kơ bruă duh mkra lu leh anăn prăk hrui wĭt hơĭt kjăp kơ mnuih ƀuôn sang”.

Hlue si klei hưn mdah mơ̆ng čar, krĭng Dưr Khánh Hòa bi leh 29/30 hnơ̆ng kčah Hdră kñăm ala čar mđĭ kyar krĭng mnuih djuê ƀiă leh anăn krĭng čư̆ čhiăng; prăk hrui wĭt kah knar krĭng mnuih djuê ƀiă đĭ lu hĭn 2,14 blư̆ mkă hŏng thŭn 2020. Ti Dhŭng Khánh Hòa, 19/22 hnơ̆ng kčah mâo leh anăn êbeh, hlăm anăn êdah êdi jing 100% gŏ êsei mnuih djuê ƀiă mâo đru kơ sang dôk. Khădah snăn, ăt adôk mâo klei kñăm ka dưi ngă msĕ si bi hrŏ ênoh să dleh dlan, mđĭ ênoh hđeh sang hră djuê biă hriăm gưl tlâo, amâodah hnơ̆ng luôm dliê.

 Hlue si Nguyễn Ngọc Sơn, K’iăng Khua Knơ̆ng bruă djuê ana leh anăn klei đăo čar Khánh Hòa, krĭng mnuih djuê ƀiă leh anăn krĭng čư̆ čhiăng ti čar adôk lu klei dleh dlan, ƀiădah ăt mâo klei găl, boh nik kơ bruă lŏ hma. Bruă duh mkra ala ƀuôn tinei srăng bi mlih kơ hnơ̆ng jăk čiăng čar iêô mthưr anôk bruă duh mkra hrăm mbĭt, mkŏ mjing dŭm hdră bi hgŭm. Nguyễn Ngọc Sơn mă klei bi hmô ti să Khánh Sơn:

“Ti krĭng čư̆ čhiăng Khánh Sơn, ară anei ana durian jing leh ana pla mjing phŭn. Mkŏ mjing anăn knăl leh anăn hdră êlan bi liê mkra mjing, đŭng hruh, kdô hruh, snăn durian ti čar Khánh Sơn srăng klă sĭt nao kbưi. Ƀiădah  čiăng dưi ngă klei anăn, brei mâo hdră êlan mdê hjăn, mđing kơ anôk bruă duh mkra bruă anăn. Mơ̆ng anăn mjing boh kdrŭt kơ dŭm alŭ wăl krĭng mnuih djuê ƀiă đĭ kyar.”

  Bruă bi hrŏ ƀun, mđĭ klei hdĭp krĭng mnuih djuê ƀiă ti Khánh Hòa mâo lu bon tŭ klă mngač, ƀrư̆ kjăp tơdah bi mguôp hŏng anôk bruă nah gŭ, mtô bi hriăm leh anăn duh ƀơ̆ng. Anôk bruă duh mkra ăt dôk hrăm mbĭt čiăng bi êrâo klei găl. Klei hưn mdah kđi čar mơ̆ng čar Khánh Hòa mñă klă klei mĭn “amâo lui hlei pô ti tluôn”, kčah klei kñăm bi hrŏ lu tĭng 1 truh 1,5% grăp thŭn, bi mklă klei gĭr đru mđĭ kyar kluôm, kjăp kơ krĭng mnuih djuê ƀiă, krĭng čư̆ čhiăng./.