Hlăm ai êwa dŭm hruê knhal tuč thŭn Giáp Thìn, Khua bruă kƀĭn ala Trần Thanh Mẫn hưn mthâo hŏng phung khua êmua hđăp mơ̆ng Bruă Kƀĭn Ala , Dhar bruă Bruă Kƀĭn Ala dŭm gưl kơ dŭm boh tŭ lăn čar leh anăn Bruă Kƀĭn Ala dưi mâo leh hlăm thŭn êgao. Khua bruă kƀĭn ala Trần Thanh Mẫn mñă klă, Bruă Kƀĭn Ala gưl 15 dưi lŏ čuê, bi lar dŭm boh tŭ dưn, klei hriăm mơ̆ng dŭm wưng êlâo čiăng lŏ ngă jăk bruă klam anôk bruă bi ala gưl dlông mơ̆ng mnuih ƀuôn sang, anôk bruă mâo klei dưi hĭn.

“Hlăm dŭm klei đĭ kyar mơ̆ng Bruă Kƀĭn Ala, amâo djŏ knŏng klei gĭr ară anei ƀiădah lŏ jing klei lŏ čuê dŭm knhuah siam mơ̆ng dŭm gưl khua gĭt gai nao êlâo, knuă druh, phung mă bruă hlăm dŭm wưng mkŏ mjing leh anăn ksul mbŭ. Phung dĭng kna, wăt kơ leh mdei bruă, ƀiădah hŏng klei thâo, ai tiê leh anăn klei hriăm pô, hrăm mbĭt nanao, kah mbha leh anăn đru mguôp čiăng kơ Bruă Kƀĭn Ala ƀrư̆ hruê ƀrư̆ kjăp hĭn, ktrâo atăt, jing gru mngač kơ dŭm ênuk ară anei hluê ngă.

Thŭn 2025 anei mâo boh tŭ dưn yuom bhăn, mâo lu hruê knăm prŏng mơ̆ng lăn čar, jing thŭn kơ Đảng, jih jang mnuih ƀuôn sang gĭr čiăng bi hmar, kdlưn hĭn, hluê ngă tŭ jinig hdră mtrŭn klei kƀĭn kluôm tal 13 mơ̆ng Đảng. Boh nik, Bruă Kƀĭn Ala adôk 3 gưl kƀĭn kơ bruă čih mkra hdră bhiăn. Mĭn tĭng bi klă 34 hdră bhiăn leh anăn mkra mlih, bi mbŏ dŭm mta lu hdră bhiăn čiăng đru kơ bruă mkŏ dăp mnuih mă bruă.

Hluê anăn, leh mdei Tết nguyên đán, Bruă Kƀĭn Ala srăng kƀĭn êngao hdră hlăm krah mlan 2 kñăm bi kluôm hdră êlan đru hluê ngă hdră êlan mkŏ dăp hŏng klei khuăt – ktang – ngă bruă rŭ dưn mơ̆ng gưl dlông truh kơ alŭ wăl.

Kyuanăn, hŏng ai tiê srăng mlih mrâo ktang kơ Bruă Kƀĭn Ala, boh nik jing thŭn 2025, čiăng mprăp kơ klei kƀĭn bruă Đảng dŭm gưl anăp truh kơ klei kƀĭn kluôm bruă Đảng ăt msĕ mơh ruah khua Bruă Kƀĭn Ala gưl 16 leh anăn Êpul gơ̆ng bruă ƀuôn sang dŭm gưl wưng thŭn 2021 – 2031, Khua bruă kƀĭn ala Trần Thanh Mẫn hmăng hmưi phung khua gĭt hđăp mơ̆ng Bruă Kƀĭn Ala, k’iăng khua Bruă Kƀĭn Ala, phung khua, knuă druh, phung mă bruă knŭk kna hlăm Eepul gơ̆ng djuê ana, dŭm hdră bruă mơ̆ng Bruă Kƀĭn Ala lŏ dơ̆ng sa ai lu hĭn hlăm wưng kơ anăp.

Khua Bruă Kƀĭn Ala mñă klă, Bruă Kƀĭn Ala mprăp mđing hmư̆ leh anăn mlih mrâo čiăng ngă bruă hdră bhiăn, ktuê dlăng gưl dlông, bi klă dŭm boh klei yuôm bhăn mơ̆ng lăn čar dưi jăk hĭn.

Blŭ hrăm hlăm mmông bi tuôm, k’iăng khua Bruă Kƀĭn Ala hđăp Uông Chu Lưu bi êdah klei hơ̆k mơak, ktưn hưn ti anăp klei đĭ kyar kluôm dhuôm mơ̆ng lăn čar hlăm thŭn 2024, mñă ktang, hlăm boh tŭ dưn mbĭt mơ̆ng lăn čar mâo bruă klam leh anăn klei đru mguôp yuôm bhăn mơ̆ng Bruă Kƀĭn Ala. Khădah bruă knuă jing lu êdi, mâo lu bruă mjêč, mrâo, dleh ƀiădah Bruă Kƀĭn Ala bi mguôp, mlih mrâo, kñăm jih klei thâo leh anăn mnĭt mmông, bi leh jih bruă klam pô hlăm bruă hdră bhiăn, ktuê dlăng gưl dlông leh anăn bi klă dŭm boh klei yuôm bhăn mơ̆ng lăn čar.

Thŭn 2025 lăn čar mŭt lăm ênuk mrâo, ênuk kpưn đĭ mơ̆ng djuê ana hŏng lu klei găl leh anăn klei lông dlăng pluă mbĭt, bruă klam jing anôk bruă hdră bhiăn, anôk bruă bi ala mnuih ƀuôn sang, anôk bruă mâo klei dưi hĭn knŭk kna, k’iăng khua Bruă Kƀĭn Ala hđăp Uông Chu Lưu đăo knang Bruă Kƀĭn Ala srăng bi leh bruă klam hing ang pô, năng hŏng klei đăo knang mơ̆ng phung bi ala leh anăn mnuih ƀuôn sang hlăm lăn čar, mbĭt anăn mñă klă, ăt mâo klei uêñ mĭn leh anăn mprăp đru mguôp ai tiê pô hlăm klei đĭ kyar mbĭt mơ̆ng lăn čar leh anăn Bruă Kƀĭn Ala.