Ti krah yan hjan mlan 7/2025, gŏ sang Rơ Mah Huệ, ti ƀuôn Dêr Sơ, să Ia Me, čar Gia Lai, mơak mâo sang mrâo kyua Knơ̆ng bruă Bình Dương (hlăm Binh đoàn 15) mdơ̆ng brei. Boh sang prŏng hlăm brô 50 m2, mâo sa adŭ pĭt, sa adŭ drông tue leh anăn sang pui ti êngao. Mbĭt hŏng gŏ sang ayŏng Rơ Mah Huệ, ti ƀuôn Dêr Sơ ăt mâo thiăm 16 boh sang mkăn mâo đru lăm lui sang tĭ, rưč. Binh đoàn 15 đru leh prăk mdơ̆ng 10 boh sang bi đru ti alŭ wăl anei. Ayŏng Rơ Mah Huệ lač kơ klei hơ̆k mơak:

 “Kâo bi mni kơ ayŏng adei hlăm Knơ̆ng bruă 55 mdơ̆ng leh sang kơ kâo. Êlâo dih sang tĭ, ară anei mâo sang mrâo leh. Mâo Knơ̆ng bruă đru mkra sang hơĭt ai tiê, amâo lŏ rŭng răng ôh, knŏng hơĭt ai tiê ngă bruă leh anăn jing mnuih mă bruă jăk đuč, hơĭt klei hdĭp mda.”

Thượng tá Lê Đức Toàn – Khua dlăng bruă Đảng, K’iăng Khua Knơ̆ng bruă Bình Dương (Binh đoàn 15) brei thâo, anôk bruă bi leh leh anăn jao leh 68 boh sang. Hlăm wưng êgao, knơ̆ng bruă iêô mkrum dŭm êbâo hruê ai mă bruă mơ̆ng phung knuă druh leh anăn phung mă bruă tinăn mtam. Dŭm gŏ êsei mâo đru lu jing phung dôk  mă bruă  hlăm êpul mkra mjing, mâo klei hdĭp dleh dlan.

 Mbĭt hŏng Knơ̆ng bruă Bình Dương, hlăm thŭn 2025, Binh đoàn 15 tuh êyuh pŏk ngă hdră lăm lui sang tĭ hlăm ênhă prŏng. Jih jang mâo 357 boh sang mkra mrâo leh anăn mkra đĭ, jao êlâo hruê 14/7, hŏng ênoh bi liê giăm 17 êklai prăk. Kyua anăn, dŭm  êtuh gŏ êsei mnuih ƀuôn sang jing  phung mă bruă ƀun, gŏ sang knŭk kna dlăng ba leh anăn mnuih ƀuôn sang djuê ƀiă ktuê knông lăn Gia Lai mâo leh dŭm boh sang kjăp. Thượng tá Lê Đức Toàn brei thâo:

 “Êpul mă bruă, phung rŭ mkra ti alŭ wăl hin snăk. Ênoh mnơ̆ng dhơ̆ng đĭ lu, mâo wưng đa đa mnơ̆ng đĭ truh 230% mkă hŏng ênoh čhĭ tal êlâo. Čiăng kơ dŭm boh sang dưi mkra kjăp, rơ̆ng ba yua sui, hmei bi hgŭm hŏng gưl bruă Đảng, bruă sang čư̆ êa alŭ wăl mă bruă hŏng dŭm anôk bruă mkăp mnơ̆ng dhơ̆ng kñăm bi kna ênoh bi liê, rơ̆ng hnơ̆ng hdră bruă djŏ hŏng hdră êlan mơ̆ng Knŭk kna.”

Mbĭt hŏng Binh đoàn 15 (Phŭn bruă lĭng kahan), êpul kahan răng mgang knông lăn čar Gia Lai ăt gĭr mguôp ai hlăm hdră lăm lui sang tĭ, rưč ti knông lăn.  Knŏng leh sa mlan yap mơ̆ng leh Phŭn bruă lĭng kahan pŏk ngă hdră bi lông ktưn, truh hruê 15/4, kahan răng mgang knông lăn čar bi leh leh anăn jao 10 boh sang kjăp hŏng ênoh êbeh 800 êklăk prăk, ênoh bi liê dưi mkrum mơ̆ng phŭn đru mguôp sa hruê mă bruă mơ̆ng phung knuă druh, lĭng kahan leh anăn klei hrăm mbĭt hŏng gưl bruă Đảng, bruă sang čư̆ êa alŭ wăl, đru dŭm êbâo hruê mă bruă mkŏ mjing 258 boh sang ti êbeh 20 km ktuê êlan knông lăn bi knông hŏng Campuchia.  Đại tá Trần Tiến Hải, K’iăng khua gĭt gai Anôk bruă lĭng kahan čar hlŏng ngă Khua gĭt gai Anôk bruă răng mgang knông lăn čar Gia Lai brei thâo, anôk bruă bi mklă anei amâo djŏ jing bruă mă hlue si hdră ôh ƀiădah jing bruă ngă nanao. Kyua đru mnuih ƀuôn sang mdơ̆ng sang, amâo djŏ knŏng đru digơ̆ mâo anôk dôk hơĭt ôh, hơĭt ai tiê mă bruă ôh, ƀiădah lŏ đru mđĭ klei bihgŭm kahan - mnuih ƀuôn sang, hrăm mbĭt răng kriê kjăp klei dưi, klei êđăp ênang knông lăn.

"Hlăm dŭm thŭn êgao, hmei mđing kơ bruă đru kơ mnuih ƀuôn sang mdơ̆ng sang. Kyua anăn hmei iêô mthưr phung mâo ai tiê kmah, klei đru mguôp mơ̆ng phung, êpul bruă, knuă druh lĭng kahan. Kyua anei jing bruă klam hŏng mnuih ƀuôn sang krĭng knông lăn, hdơr knga kơ klei khăp, klei mđing uêñ mơ̆ng mnuih ƀuôn sang krĭng knông lăn hŏng êpul kahan răng mgang knông lăn”.

Hŏng klei gĭr leh anăn ai tiê đua klam, dŭm anôk bruă lĭng kahan mguôp prăk kăk, ai tiê, mđup brei kơ mnuih ƀuôn sang knông lăn Gia Lai boh sang kjăp, mbĭt anăn mguôp hơĭt klei hdĭp mda, mđĭ klei hdĭp mda ala ƀuôn leh anăn mjing tur knơ̆ng kơ mnuih ƀuôn sang hơĭt ai tiê mđĭ kyar bruă duh mkra, gĭr ktưn tlaih ƀun.