Nguyễn Thành Công, Khua êpul mkŏ mjing hdră “Ngă bruă kyua yang ƀuôn” brei thâo, hlăm klei ksiêm dlăng, anôk bruă ƀuh Kon Čiêng jing ƀuôn hgŭm dleh dlan êdi mơ̆ng čar Gia Lai hŏng êbeh 90% jing mnuih djuê ƀiă. Êpul ngă bruă jăk hmăng hmưi jing aruăt klei mkŏ, bi lar ai tiê thâo bi kah mbha truh hŏng mnuih ƀuôn sang.

 “Hmei ƀuh klei hdĭp mnuih ƀuôn sang tinei čiăng mâo lu êdi klei đru leh anăn hmei bi klă ruah anei jing anôk truh. Klei hmei ƀuh tal êlâo hĭn jing dŭm boh sang krum, dŭm bĭt êlan lăn mnuih ƀuôn sang găn êrô grăp hruê. Hmei ƀuh dŭm boh êdeh êran hŏng pông săng đai čiăng găn dŭm êlan čư̆ leh anăn êlan klŭt, kyuanăn hmei bi klă srăng hriê tinei”.

Hdră ngă leh lu mta bruă klă kơ̆ng, kñăm kơ bruă mdrao mgŭn, sang hră mơar leh anăn đru kơ klei mkă dlăng klei ruă, hưn mthâo klei suaih pral leh anăn mbha êa drao kơ 500 čô mnuih ƀuôn sang. Ba yua Sang dlăng hră đru adei nao sang hră, mđup brei hdruôm hră hriăm, mnơ̆ng yua hriăm hră, čhŭm ao mrâo, ktir 2 ƀăng êa, rŭ mdơ̆ng 1 boh sang klei khăp…Ênoh prăk ngă bruă 850 êklăk prăk. Adei Hà Hoàng Phú, dôk ti ƀuôn Thương, hđeh sang hră adŭ 6D, mgei ai tiê brei thâo:

 “Kâo dưi mkă dlăng klei ruă, mă êa drao leh anăn mâo hnư mnơ̆ng, kâo lač jăk kơ phung neh, phung amiêt hlăm êpul ngă bruă.”

Hdră “Ngă bruă kyua yang ƀuôn” gưl tal 31 iêo jak leh 130 čô nao đru bruă. Amai Bùi Thị Minh Phương, sa čô hriăm gưl prŏng sang hră gưl prŏng Y Dược ƀuôn prŏng Hồ Chí Minh lač, gưl nao anei jing klei dleh wơr hŏng amai, dưi ƀuh klă klei thâo pap, sa knhuah hdĭp čiăng êdi kơ bruă knuă pô hlăm klei dŏng mdrao kơ mnuih ruă
 

 “Mgei ai tiê êjai nao 12 mmông, găn dŭm bĭt êlan jhat, kčŭn čư̆ truh kơ anôk mkă dlăng klei ruă. Pô ƀuh mgei ai tiê, hmăng hmưi mâo ba lu êa drao leh anăn klei khăp truh kơ mnuih ƀuôn sang”.