3 boh sang mâo Knŭk kna bi mklă mdơ̆ng kơ mnuih ƀuôn sang krĭng êa lip djăp klei čuăn “3 khăng”: Tur khăng- mtih khăng - čuôr khăng, đru mdrơ̆ng hŏng angĭn êbŭm êa lip leh anăn êa lêč ktang. Hdră msir phŭn jing mđĭ tur sang amâodah dăp tal sang tal 2 bi kjăp čiăng mjing anôk êđăp ênang ti dlông hnơ̆ng êa lip ka tuôm mâo .

Hlăm ênoh anăn, mâo 2 boh sang 2 tal: Tal nah gŭ lui huâng amâodah ăt kjăp čiăng kơ êa lip đoh đuĕ; tal dlông jing anôk dôk leh anăn kriê dlăng ngăn drăp.  Gru hmô sang 1 tal mâo anôk mđĭ ti dlông ênoh bi liê ƀiă, ƀiădah ăt rơ̆ng kơ wăl ñĕ kơ êa lip lêč bi kjăp.

Cao Đình Huy, Khua Knơ̆ng bruă rŭ mdơ̆ng Dak Lak brei thâo, mkra mjing dŭm gru hmô sang amâo djŏ knŏng lač kơ klei kjăp ôh ƀiădah lŏ rơ̆ng êđăp ênang hlăm hnơ̆ng êa lip ka tuôm mâo:

 “Mđĭ tur ti dlông ñĕ kơ êa lip lêč, hmei ksiêm dlăng mđĭ dlông hĭn kơ hnơ̆ng êa lip hƀuê ênuk 0,2 -0,5 m hlue si Hdră mtrŭn 48 mơ̆ng Khua Knŭk kna. Grăp alŭ wăl mâo ênhă jih hnơ̆ng 44 m², hlăm anăn tur gang mkhư̆ êa lip lêč 12 m²”.

Dŭm boh sang bi hmô bi mguôp hdră mnêč mrâo mrang leh anăn hdră mkra mjing mưng leh mơ̆ng krĭng ƀuôn sang Dhŭng kwar Krah, rơ̆ng klei jăk siam leh anăn klei hdĭp mda kơ mnuih ƀuôn sang. Ênhă mơ̆ng 36–54 m² đru kơ dŭm gŏ sang ruah hlue si klei găl kơ lăn ala, klei čiăng kơ gŏ sang. Trần Văn Khánh, ti alŭ Phú Hữu, să Hoà Thịnh, čar Dak Lak, mâo sang dlưh hlăm gưl êa lip mrâo êgao. Mâo lĭng kahan Êpul kahan 5 đru lŏ mkra mjing, ruah gru hmô 1, hŏng tal dlông mjing anôk ñĕ kơ êa lip. Khánh brei thâo:

 “Mơ̆ng tal êa lip ktang anei, kâo mă klei hriăm, ruah sa boh sang mjing sa mâo tur kjăp dưi gang mkhư̆ klei êa lip, angĭn êbŭ. Êlâo dih êa lip truh amâo thâo ôh ti anôk dôk, ară anei mâo lĭng kahan đru mkra sang dôk mrâo, kâo hơĭt ai tiê hĭn.”

Thiếu tướng Trần Thanh Hải, K’iăng Khua kahan Êpul kahan 5, brei thâo anôk bruă mâo Knŭk kna leh anăn Phŭn bruă kahan ksiêm jao bruă klam bi hgŭm hŏng êpul kahan, dŭm alŭ wăl tlâo čar Dak Lak - Gia Lai – Khánh Hòa mdrơ̆ng êbeh 400 boh sang kơ mnuih ƀuôn sang krĭng êa lip.

 “Anei jing bruă klam  bi blah hlăm ênuk êđăp ênang. Dŭm êpul kahan srăng ba nao kdrăp mnơ̆ng mkŏ mjing rŭ mdơ̆ng kreh knhâo, rơ̆ng hnơ̆ng leh anăn êđăp ênang jih hnơ̆ng. Grăp boh sang jing anôk knang đru kơ mnuih ƀuôn sang hơĭt klei hdĭp mda.”

Ti Dak Lak, alŭ wăl tŭ klei luč liê kjham hĭn hŏng 700 boh sang dlưh, 1.400 boh sang jhả rai kjham leh anăn êbeh 106.000 sang êngăp êa. Tạ Anh Tuấn, Khua Knơ̆ng bruă sang čư̆ êa čar Dak Lak brei thâo, čar iêô mkrum lu klei găl, bi mklă jih ai tiê mdơ̆ng sang mrâo êlâo hruê 31/1/2026, mkra leh sang jhat rai êlâo hruê 31/12/2025.

"Hmei srăng iêo mkruk klei găl mơ̆ng Knŭk kna, alŭ wăl, klei găl phung mâo ai tiê kmah leh anăn mnuih ƀuôn sang čiăng ngă hdră. Êngao kơ bruă mkŏ mjing sang kơ mnuih ƀuôn sang hmei ăt mkra hlăm brô 300 boh sang kƀĭn ƀuôn ñĕ kơ êa lip čiăng dưi đru mnuih ƀuôn sang ñĕ kơ êa lip, angĭn êbŭ ngă”.

Êlâo anăn, Khua knŭk kna Phạm Minh Chính nao ti krĭng êa lip nah Ngŏ čar Dak Lak, mă bruă hŏng khua gĭt gai dŭm čar Lăn Dap Kngư - Dhŭng kwar Krah leh anăn mtă brei pŏk hdră “Quang Trung mjêč” čiăng lŏ mkŏ mjing sang kơ dŭm gŏ êsei luč sang dôk, rơ̆ng kơ mnuih ƀuôn sang mâo anôk dôk mrâo êlâo kơ Tết Nguyên đán Bính Ngọ 2026.

Khua knŭk kna mñă klă lŏ mkra mjing sang dôk ti krĭng êa lip hlue si hnơ̆ng čuăn “3 khăng”, mbĭt anăn mkra mjing hdră gang mkhư̆ djăp hnơ̆ng kơ klei truh kyua yan adiê ngă. Phŭn bruă rŭ mdơ̆ng mâo jao mkra mjing sa anăn hră mkra mjing, yua jar ƀê tông amâodah jar msei mkra mjing lu mta čiăng bi hrŏ ƀiă hruê mmông rŭ mdơ̆ng. Čiăng mđĭ pral hnơ̆ng, đru kơ mnuih ƀuôn snag hmao mâo sang êlâo kơ Tết, Khua knŭk kna ăt mtă kơ Phŭn bruă lŏ hma leh anăn wăl hdĭp mda ktrâo lač kơ dŭm alŭ wăl msir boh klei kơ lăn ala hŏng dŭm gŏ êsei amâo lŏ mâo anôk dôk. Dŭm Phŭn bruă lĭng kahan, kahan ksiêm, êpul êdam êra mtă brei iêô mkrum jih hnơ̆ng klei găl kơ bruă mdơ̆ng, mkra sang čiăng kơ hnơ̆ng bi leh pral hĭn:

 “Iêô mkrum klei găl alŭ wăl, Knŭk kna, phung mâo ai tiê kmah leh anăn gŏ sang. Hlei pô mâo mnơ̆ng đru mnơ̆ng, mâo ai đru ai leh anăn hlei mâo lu đru lu, mâo ƀiă đru ƀiă, ti anôk găl đru tiñăn, ai tiê bi hgŭm djuê ana hlăm klei iêo mkrum jing brei mđĭ lar.”

Mơ̆ng klei čih mkra leh anăn klei gĭt gai jih hnơ̆ng, truh ară anei tur knơ̆ng tal êlâo mâo mdơ̆ng leh. Êbeh 1.500 boh sang, ênoh bi liê hlăm brô 255 êklai prăk, srăng mâo mdơ̆ng ti Dak Lak, Khánh Hòa, Gia Lai… jing anôk knang kjăp kơ mnuih ƀuôn sang Dhŭng kwar Krah găn klei yan adiê ngă, hơĭt anôk dôk leh anăn mđĭ kyar kjăp hĭn hlăm êdei anăp./.