Ti krah tria sang hđăp mtŭk mtŭl leh êa lêč, ayŏng Nguyễn Thế Kiên ( ti alŭ Chánh Hữu, ƀuôn hgŭm Ngô Mây, čar Gia Lai) dôk mbĭt hŏng knuă druh, lĭng kahan Sang hră lĭng kahan (Quân đoàn 34) mkra tur msei, dơ̆ng tuh ƀê tông kơ sang mrâo.

Angĭn êbŭ mrô 13 ngă kơ čuôr sang ayŏng Kiên kpŏk đuĕ. Ka hmao mkra wĭt, êa lêč truh hlŏng tlưng bi rai jih. Mâo Knŭk kna đru 60 êklăk prăk, mâo lĭng kahan đru hruê ai rŭ mdơ̆ng, ñu lŏ čan thiăm 40 êklăk prăk brei djăm 100 êklăk prăk rŭ mdơ̆ng sang dôk kjăp. Nguyễn Thế Kiên  brei thâo, sang mâo srăng mâo ênhă 30m2, čuôr hŏng bêtông kjăp:

“Lĭng kahan diñu hur har êdi. Diñu đru kơ gŏ sang kâo mkra sang kjăp, siam hĭn hŏng sang êlâo. Ară anei mkra sang tuh kmeh, tuh tur srăng kjăp hĭn hŏng êlan gưl 4. Ară anei kâo blei msei, êa đĭ pô đĭ ti dlông, amâo lŏ pŭ mnơ̆ng kơ anôk mkăn.”

Ăt tui alŭ Chánh Hữu, lĭng kahan sang hră lĭng kahan Quân đoàn 34 dôk đru kơ gŏ sang ayŏng Ngô Đình Vị rŭ mdơ̆ng sang. Sang hlăm êlan kjhiêt, lăn tlung kyuanăn lĭng kahan tuh mbŏ lăn, mđĭ klei dưi mdrơ̆ng hŏng êa lip. Anei srăng jing sang kjăp, kyua êngao kơ 60 êklăk prăk mơ̆ng Knŭk kna đru, ñu mă jih 120 êklăk prăk mkiêt mkriêm čiăng blei mnơ̆ng yua, bi lĭng kahan đru hruê ai rŭ mdơ̆ng. Jing sa čô ngă bruă mkra sang kyuanăn ayŏng Vị bi mguôp hlăm bruă rŭ mdơ̆ng sang. Ayŏng mgei ai tiê:

“Diñu dôk krah mđiă krah hjan ƀuh pap êdi. Adiê hjan kâo lač brei diñu mdei, ƀiădah diñu hơô ao êa hjan ăt mă bruă. Ea mnăm, mnơ̆ng ƀơ̆ng diñu amâo mâo yua sa mta. Diñu hriê đru kơ gŏ sang kâo, kâo mơak êdi. Ya brei hmei akâo đru diñu ngă jih. Mĭn tĭng gŏ sang srăng bi leh hlăm 45 hruê.”

Hlăm hdră bruă Quang Trung tal anei, Quân đoàn 34 dưi jao rŭ mdơ̆ng 70 boh sang ti krĭng êa lip mơ̆ng čar Gia Lai leh anăn 30 boh sang ti krĭng êa lip čar Dak Lak. Leh mâo asăp mtrŭn, tiŏ nao leh êbeh 600 knuă druh lĭng kahan mbĭt hŏng kdrăp yua nao mjêč ti dŭm alŭ wăl, jao kơ grăp anôk bruă klam dŭm alŭ wăl klă klơ̆ng, hrăm mbĭt bi mguôp kjăp hŏng bruă sang čư̆ êa dŭm alŭ wăl leh anăn pô sang mjêč mâo hdră êlan leh anăn ngă bruă mtam.

Đại tá Phạm Hồng Sơn, k’iăng khua bruă kđi čar Sang hră lĭng kahan Quân đoàn 34, klam ngă bruă klam ti ƀuôn hgŭm Ngô Mây, čar Gia Lai brei thâo: Jih jang êpul dưi tiŏ nao čiăng rơ̆ng kơ boh tŭ dưn leh anăn klei ngă bruă. Anôk bruă mdưm mta kñăm bi leh dŭm boh sang êlâo kơ hruê 20/1/2026 čiăng kơ mnuih ƀuôn sang hmao drông tết hlăm sang mrâo.

“Boh klei mkra mjing alŭ wăl leh anăn gŏ sang srăng đua klam bi anôk bruă srăng đru kơ phung rŭ mdơ̆ng leh anăn êpul dŭ mdiăng mnơ̆ng. Huă ƀơ̆ng anôk bruă srăng rơ̆ng djŏ hŏng klei čuăn lĭng kahan. Hmei mkŏ mjing rơ̆ng kơ bruă nah tluôn bi kƀĭn sa anôk čiăng ba truh kơ dŭm êpul ti sang mnuih ƀuôn sang čiăng kơ ayŏng adei huă ƀơ̆ng, rơ̆ng klei suaih pral čiăng ngă jăk bruă pô.”

Hŏng dŭm gŏ sang mrâo găn êa lip, angĭn êbŭ, dŭm boh sang kjăp dôk ƀrư̆ ƀrư̆ rŭ mjing amâo djŏ knŏng jing anôk dôk êđăp ênang, ƀiădah lŏ jing anôk knang bi juh sa kdrêč dŭm klei luč liê kyua yan adiê ngă. Hlăm grăp mtih sang, grăp čuôr sang mâo sơăi êa hŏ hang leh anăn ai liê phung lĭng kahan awa Hồ, lŏ sa blư̆ bi klă klei khăp lĭng kahan - mnuih ƀuôn sang hơĭt kjăp hlăm klei truh tơl, amâo mâo lui kơ hlei pô nah tluôn./.