Truh kơ anôk ngă hră mơar ƀuôn hgŭm Ea Rốk, čar Daklak nao ngă hră hưn hrue kkiêng kơ anak,  Đinh Thanh Hùng, (ti alŭ mrô 3) tuôm hŏng lu klei mtŭk mtŭl kyua klei ba yua hŏng kdrăp điện tử sơăi mă bruă. Leh mâo phung êdam êra dôk kăp lehanăn ktrâo atăt, ñu dơ̆ng ngă dŭm knhuang. Knŏng hlăm ƀiă mnĭt đuič, jih jang bruă mâo ngă hŏng klei jăk. Đinh Thanh Hùng lač:

 “leh mâo phung êdam êra đru ktrâo atăt čih klei hưn, lehanăn jih jang bruă ngă hlăm mbah anôk mă bruă hŏng đĭng blŭ. Mâo phung êdam êra đru kâo jih ai tiê, lehanăn klă mngač, ênưih thâo săng mơh čiăng pioh hdơr kơ mgi dih”

Ti Anôk ngă hră mơar ƀuôn hgŭm Ea Rốk, grăp hrue mâo ƀiă êdi 8 čô êdam êra dôk kăp đru mnuih ƀuôn sang ngă hră mơar hŏng kdrăp mrô. Knŏng hlăm sa mlan mă bruă, êpul êdam êra mâo giăm  40 čô mâo đru leh hlăm bruă ngă hră mơar hưn hrue kkiêng, hră mơar bi kuôl ung mô̆, lehanăn hră mơar hưn mâo mnuih djiê, mbĭt hŏng lu mta hră mơar mkăn mâo ba yua hlăm mbah điện tử sơăi.

Ngô Bảo Ngọc, jing pô kăp đru mnuih ƀuôn sang hlăm grăp hrue lač, hlăm grăp hrue mâo lu mnuih ƀuôn sang hriê ngă hră mơar, lu jing mnuih djuê ƀiă amâo mâo thâo klei yuăn ôh, kăn mâo rei akkhao định danh ti hnơng mrô 2, tăp năng kăn mâo đĭng blŭ rei, amâodah amâo mâo thâo săng diêt đuôt ôh hlăm klei ngă hră mơar snei.

 “Hmei čŏng ktrâo atăt mnuih ƀuôn sang truh ti anôk kahan ksiêm ƀuôn hgŭm Ea Rốk čiăng ngă định danh lehanăn đru kơ mnuih ƀuôn sang dŭm klei hâo hưn hlăm bruă ngă hră mơar, bi mŭt hlăm computer amâodah hlăm đĭng blŭ mơ̆ng knơ̆ng bruă sang čư̆ êa ƀuôn hgŭm.”

Amâo mâo djŏ knŏng đru hlăm anôk bruă ngă hră maơr, phung êdam êra ba anăp lŏ trŭn nao truh hlăm ƀuôn sang, truh hŏng grăp gŏ sang, boh nik hŏng dŭm čô mnuih amâo mâo anôk jưh knang, mnuih khua thŭn, mnuih djuê ƀiă, čiăng hâo hưn, mkŏ mkra kdrăp mrô, ktrâo atăt klei djă yua kdrăp mrô hlăm klei hdĭp, lehanăn klei ngă hră mơar. Ninh Tiến Đạt, K’iăng khua bruă êdam êra ƀuôn hgŭm Quảng Phú, čar daklak lač:

 “Phung êdam êra ba anăp truh hlăm sang mnuih ƀuôn sang đru hâo hưn đru mnuih ƀuôn sang thâo ba yua kdrăp tĭn tla hŏng điện tử, ngă hră mơar jia, ba yua kdrăp mrô, mơ̆ng anăn mnuih ƀuôn sang thâo săng kơ bruă sang čư̆ êa 2 gưl, ngă bruă hŏng kdrăp mrô jing jăk găl hĭn”.

Mơ̆ng akŏ mlan 7 truh ară anei, leh bruă sang čư̆ êa dua gưl mâo hlue ngă, bruă êdam êra čar Daklak mâo tiŏ nao leh truh 131 êpul êdam êra nao đru kơ bruă kdrăp mrô, kdtrâo ti kngan hŏng mnuih ƀuôn sang, lŏ čuê dŭm bruă bi đru hlăm kdrăp mrô êlâo anăn. Mơ̆ng anăn mâo đru leh tŭ jing kơ dŭm pluh êbâo čô mnuih ƀuôn sang hlăm krĭng ƀuôn sang, krĭng čư̆ čhiăng, krĭng tiah kbưi, bi hrŏ klei amâo mâo yua kdrăp mrô hlăm mnuih ƀuôn sang.

Tui Lương Minh Tùng, Khua bruă êdam êra čar Daklak wưng tinăp, êpul êdam êra srăng lŏ mjuăt bi hriăm bruă kdrăp mrô kdlưn hĭn pioh đru kơ bruă sang čư̆ êa lehanăn mnuih ƀuôn sang hlăm bruă bi mlih mrô.

 “Dlăng bruă ba anăp anei jing bruă knơ̆ng hlăm klei bi đru ti anôk ngă hră mơar hlăm ƀuôn hgŭm, kyuanăn tui nao hlăm dŭm bruă êlam hĭn. Bruă êdam êra mâo mkŏ mjing leh klei mjuăt bi hriăm kơ dŭm bruă bi mlih mrô.

Tĭng hlăm wưng tinăp êpul khua kiă kriê bruă êdam êra čar srăng iêo ba phung truăn kơ bruă, lehanăn phung khua kiă kriê dŭm knơ̆ng dhar bruă ktrâo atăt êlam hĭn ti anôk ngă hră mơar kơ mnuih ƀuôn sang, pioh ktrâo at\t jih jang phung knơ̆ng hlăm anôk mă bruă ƀuôn hgŭm thâo mă bruă hŏng klei kjăp, lehanăn ba wĭt klei tŭ dưn"”

Hŏng klei đua klam lehanăn klei thâo ba yua pral kdrăp mrô, êpul êda êra Daklak ƀrư̆ ƀrư̆ đru hlăm klei dưi mkŏ tŭ jing plah wah mnuih ƀuôn sang hŏng bruă sang čư̆ êa hlăm klei ba yua kdrăp mrô, yang ƀuôn mrô, anăp truh bi leh mta kñăm hdĭp jăk găl djŏ hlăm ênuk mrâo mrang hŏng mnuih ƀuôn sang./.