Hlăm mmông bi tuôm, phung bi ala jing Phŭn lĭng kahan yang ƀuôn, lĭng kahan hđăp, êdam êra ba anăp lŏ wĭt yăl dliê kơ ênuk bi blah, bi êdah ai tiê jhŏng, klei mĭn kjăp leh anăn siă suôr hŏng bruă cách mạng mơ̆ng Đảng, mơ̆ng djuê ana. Phung bi ala bi êdah klei đăo knang leh anăn hmăng hmưi lŏ dơ̆ng đru mguôp ai tiê, klei thâo mĭn hlăm bruă mkŏ mjing, răng mgang lăn čar hlăm ênuk đĭ kyar mrâo. Blŭ hlăm mmông bi tuôm, Khua gĭt gai Đảng Tô Lâm mñă klă hƀuê ênuk cách mạng Việt Nam hdơr nanao kơ klei đru mguôp yuôm bhăn mơ̆ng phung tuôm nao hlăm klei bi blah hlăm djăp mta bruă.

Khua gĭt gai Đảng Tô Lâm hưn hŏng phung bi ala dŭm hdră êlan prŏng srăng dưi ngă hlăm wưng kơ anăp, kñăm kơ 3 bruă klam: Răng mgang klei êđăp ênang hơĭt kjăp, mđĭ kyar bruă duh mkra ala ƀuôn pral, hơĭt kjăp, mđĭ hnơ̆ng klei hdĭp mnuih ƀuôn sang, boh nik jing phung ƀun ƀin, phung awăt, rơ̆ng amâo mâo kơ hlei pô nah tluôn.