Hưn mdah hlăm klei kƀĭn trông, hlăm wưng êgao, hdră êlan, klei bhiăn lăn čar kơ lăn ala ƀrư̆ ƀrư̆ nao hlăm klei hdĭp, mđĭ boh tŭ dưn kriê dlăng mơ̆ng knŭk kna, đru mđĭ kyar bruă duh mkra ala ƀuôn, rơ̆ng kơ bruă lĭng kahan, klei êđăp ênang leh anăn đĭ kyar hơĭt kjăp mơ̆ng lăn čar, bi kjăp klei đăo knang mơ̆ng mnuih ƀuôn sang, knơ̆ng bruă leh anăn duh bi liê. Ƀiădah, klă sĭt ăt adôk mâo klei dleh dlan, kpăk gun msĕ si čuăl mkă ka hrăm mbĭt…

Hlăm klei kƀĭn trông, Khua knŭk kna Phạm Minh Chính lač klă: bruă klam yuôm bhăn leh anăn mjêč čiăng ruh mgaih klei kpăk leh anăn mkra mlih, bi mbŏ hdră mtrŭn mrô 18 leh anăn ngă tur knơ̆ng mkra mlih, bi mbŏ hdră bhiăn lăn ala thŭn 2024. Khua knŭk kna mñă brei mkra mlih, bi mbŏ đa đa bruă klam, hdră êlan čiăng lŏ dơ̆ng bi kluôm hdră kiă kriê, hdră êlan yua lăn, hlăm anăn bi mbŏ dŭm hdră êlan kơ klei čuăl mkă, hdră êlan yua lăn. Mđing mkăp ngăn prăk kơ klei mđĭ kyar bruă mkŏ mkra hrăm mbĭt, bruă tuh tia, mđĭ kyar wăl krah, rơ̆ng kơ ênhă pla mdiê čiăng bi mâo djăp mnơ̆ng ƀơ̆ng huă hlăm lăn čar.