
Dŭm hruê êgao, gŏ sang K’Thiệu, ti alŭ 1, ƀuôn hgŭm Bảo Lâm, čar Lâm Đồng hơ̆k mơak kyua mâo sang mrâo. Ñu brei thâo, sang mâo ênoh 220 êklăk prăk, hlăm anăn knŭk kna đru 50 êklăk prăk, bi adôk gŏ sang čŏng mkiêt mkriêm leh anăn găp djuê bi mguôp.
“Hơ̆k mơak êjai mâo Đảng hŏng knŭk kna uêñ mĭn kơ klei hdĭp mnuih ƀuôn sang djuê ƀiă krĭng tlaih kbưi msĕ hŏng hmei. Mâo sang dôk sơnei hmei srăng gĭr mă bruă knuă, hjan hlĭm kăn lŏ hŭi lei”.

Yap truh hruê 30/6, čar Lâm Đồng hđăp dưi bi leh bruă mkra mđĭ leh anăn rŭ mdơ̆ng mrâo 2.044 boh sang kơ gŏ sang ƀun, giăm ƀun hluê si hdră lăm lui sang ti dôk êjai, sang tĭ rưč. Amâo djŏ knŏng bi leh hnưm 2 mlan, alŭ wăl lŏ êgao hdră kčah 236 boh sang.
Ăt bi leh hnưm hdră lăm lui sang dôk êjai, sang tĭ ƀrôč êlâo 2 lan, čar Gia Lai iêo mkrum ai dưi čiăng ngă tŭ dưn hdră. Mbĭt hŏng ngăn prăk mkăp brei, lu anôk bruă nao mbĭt hŏng ai tiê “Hlei mâo mnơ̆ng đru mnơ̆ng, mâo ai đru ai”. Hlăm anăn, Êpul kahan ksiêm mâo bruă klam kmeh gơ̆ng hlăm bruă dŭ mdiăng, đru rŭ mdơ̆ng ti lu alŭ wăl. Dŭm anôk bruă lĭng kahan msĕ si Quân đoàn 34, Binh đoàn 15 đru mguôp jih jang giăm 40.000 hruê ai, đru mkŏ mjing dŭm boh sang kjăp, mđao bŏ hŏng klei bi khăp lĭng kahan, mnuih ƀuôn sang. Đại tá Khuất Bá Cao – khua dlăng bruă Đảng, k’iăng khua knơ̆ng gĭt gai lĭng kahan Binh Đoàn 15 mñă klă:
“Bruă msir lăm sang dôk êjai, sang tĭ rưč mâo boh tŭ dưn yuôm bhăn kyua đru kơ mnuih ƀuôn sang, lu hĭn jing mnuih djuê ƀiă ti alŭ wăl mâo anôk dôk, đru kơ mnuih ƀuôn sang mđĭ kyar bruă duh mkra. Hluê anăn Bình Đoàn 15 đru mbĭt hŏng alŭ wăl mkŏ mkra krĭng ƀuôn sang mrâo leh anăn krơ̆ng kjăp klei êđăp ênang yang ƀuôn ti alŭ wăl knông lăn.”

Bi kơ phung dưn, čar Gia Lai hđăp dưi bi leh 100% hdră đru sang dôk kơ gŏ sang knŭk kna dlăng, phung mâo ai đru, gŏ sang ƀun, giăm ƀun. Mbĭt anăn, dŭm alŭ wăl lŏ ngă hdră đru kơ hdră duh ƀơ̆ng, đru kơ mnuih ƀuôn sang dưi tlaih ƀun hơĭt kjăp. Ksor H’Phương khua dlăng bruă Đảng hđăp să Ia Rtô, ară anei jing să Ia Sao brei thâo:
“Leh ngă hdră msir lăm sang dôk êjai, sang tĭ ƀrôč ti alŭ wăl să, hmewi lŏ dơ̆ng ksiêm dlăng čiăng đru kơ dŭm gŏ sang mđĭ kyar bruă duh mkra, msĕ si brei êmô ana mđai, mnơ̆ng rông leh anăn mkŏ dŭm ênoh prăk đru.”

Dŭm hruê akŏ mlan 7 anei, čar Gia Lai bi leh êbeh 8.100 boh sang đru kơ dŭm gŏ sang dleh dlan, hnưm 2 mlan mkă hŏng hdră kčah. Anei amâo djŏ knŏng jing anôk dôk, ƀiădah lŏ pŏk klei hmăng hmưi kơ klei hdĭp hơĭt kjăp hĭn, đru kơ dŭm êbâo čô mâo klei găl kpưn đĭ, kuč mngač klei hmăng hmưi klei hdĭp mngač tač hĭn. Rah Lan Chung – k’iăng khua bruă Đảng čar, khua bruă sang čư̆ êa čar Gia Lai brei thâo:
“Anei jing hdră tŭ dưn êdi. Anăn jing kñăm kriê dlăng kơ phung ƀun ƀin, phung knŭk kna dlăng ba leh anăn phung awăt êdu hlăm kluôm čar. Hdră iêo jak klei nao hgŭm mơ̆ng bruă kđi čar, dŭm gưl bruă, dhar bruă, lĭng kahan leh anăn mnuih ƀuôn sang. Kyuanăn, čar Gia Lai dưi mkra mlih leh anăn bi hrŏ mmông bi leh hdră anei ti alŭ wăl”.
Viết bình luận