Mmăt hruê 27/7, ti Anôk bruă Knŭk kna, Khua knŭk kna Phạm Minh Chính gĭt gai leh Klei bi kƀĭn kơ hdră rŭ mdơ̆ng sang hră ti dŭm ƀuôn hgŭm krĭng knông lăn, mâo wăt sang dôk kơ phung hđeh lehanăn phung nai mtô. Khua knŭk kna mñă, bruă hluê ngă Klei klah čŭn mrô 81 mơ̆ng Phŭn bruă kđi čar jing hdră êlan prŏng, mâo boh tŭ yuôm. Hlăm wưng thŭn 2025 – 2027, srăng rŭ mdơ̆ng 248 boh sang hră čiêm rông phung hđeh mnuih djuê ƀiă mlir gưl, mơ̆ng gưl sa truh kơ gưl dua ti 248 ƀuôn hgŭm krĭng knông lăn hang.

Khua knŭk kna mtă brei hluê ngă mjêč, čiăng bi leh ƀiă êdi 100 boh sang hră êlâo kơ hruê 30/8/2026. Mbĭt anăn, mtă kơ dŭm alŭ wăl mjêč čih mkra hdră čuăl mkă, ruah anôk, rơ̆ng kơ ênhă rŭ mdơ̆ng, klei kơ pui kmlă, êa, hdră hâo hưn êlan kbưi… mkăp kơ bruă rŭ mdơ̆ng. Anei jing bruă klam mjêč kñăm mđĭ kyar klei thâo mnuih mă bruă, klei thâo kơ mnuih ƀuôn sang, mjing klei găl dưi hriăm hră kơ phung hđeh ti krĭng taih kbưi, đru bi kjăp hdră lĭng kahan – klei êđăp ênang ti krĭng knông lăn Ala čar./.