Tui si klei hâo mdah, truh kơ ară anei kluôm ala mâo bi leh, ba jao truh 65 êbâo boh sang dưi dôk hlăm sang mrâo; lehanăn rŭ mdơ̆ng êbeh 56 êbâo boh sang. Mơ̆ng leh klei bi kƀĭn tal 2 (krah mlan 1) truh ară anei giăm 16 êbâo boh sang bi leh lehanăn 18 êbâo boh sang mâo rŭ mdơ̆ng.

Blŭ hrăm ti anôk bi kƀĭn, Khua knŭk kna Phạm Minh Chính klă klơ̆ng anei jing sa hdră yuôm bhăn mơ̆ng Đảng lehanăn knŭk kna hŏng mnuih ƀuôn sang, bi êdah klei thâo hdơr knga hŏng mnuih mâo bruă tŭ dưn, săn leh asei mlei kyua klei djuê ana lehanăn lăn čar krŭ kdơ̆ng hlăm dŭm ênuk gưl. Bi êdah ai tiê thâo bi đru, klei thâo bi mguôp jih jang djuê ana. Kyuanăn, drei bi trông kơ klei mă bruă, amâo mâo klei kdŭn ôh, anei jing asăp mtrŭn mơ̆ng lam ai tiê. Hŏng mta kñăm truh hrue 30 mlan 10 thŭn 2025 bi leh jih mta kñăm anei, jing êlâo hĭn kơ mlan 2 mkă hŏng hdră kčah, ti anôk mtrŭt mjhar mâo leh hŏng anei 1 thŭn./.