Aguah 26/8 ti Hà Nội, Khua knŭk kna Phạm Minh Chính gĭt gai Klei bi kƀĭn ksiêm wĭt hdră “Kluôm ala hgŭm kngan msir lăm sang dôk êjai, sang tĭ ƀrôč”. Truh kơ ară anei, kluôm ala msir leh leh êbeh 334 êbâo boh sang tĭ ƀrôč, sang amâo rơ̆ng 3 hnơ̆ng čuăn kjăp; giăm 50 êbâo êklai prăl dưi pŏk ngă mơ̆ng Hdră bruă, hlăm anăn prăk mâo iêu mtrŭt truh 24 êbâo êklai prăk.

Khua knŭk kna bi êdah klei mơak hlăk Việt Nam dưi bi leh mta kñăm msir lăm sang dôk êjai sang tĭ ƀrôč hlăm kluôm ala, jing boh tŭ êdah êdi, kkuh mơak 80 thŭn Hruê krŭ kgŭ kdơ̆ng mlan 8, hruê mkŏ mjing ala čar 2/9.  Khă snăn, hluê si Khua knŭk kna, anei mrâo jing tur knơ̆ng tal êlâo čiăng “Bi hơĭt anôk dôk”, hlăm wưng ti anăp, dŭm Phŭn, dhar bruă, alŭ wăl brei mâo hdră đru kơ dŭm gŏ sang anei “Čô̆ kơ bruă”, gĭr truh thŭn 2030 Việt Nam amâo lŏ dôk gŏ sang ƀun. Mbĭt hŏng klei “Bi hơĭt anôk dôk” brei “Čô̆ kơ bruă”, mjing bruă mă, hdră duh ƀơ̆ng kơ mnuih ƀuôn sang./.