Hŏng klei gĭr ngă bruă kjăp mơ̆ng jih anôk bruă kđi čar lehanăn klei hgŭm kngan mơ̆ng êpul êya yang ƀuôn, čar Lâm Đồng hluê ngă leh hdră msir lăm êbeh 1 êbâo boh sang dôk êjai, sang tĭ ƀrôč ti alŭ wăl, bi knar hŏng êbeh 50% hdră kčah. Dŭm hruê akŏ thŭn 2025, gŏ sang amai K’Uyên (djuê ana K’Ho), ti alŭ 3, să Đinh Trang Thượng, kdriêk Di Linh, čar Lâm Đồng hơ̆k mơak hlăk dưi dôk hlăm sang mrâo mdơ̆ng, siam, kjăp, bi hrô kơ sang tĭ ƀrôč mơ̆ng pô.

Hlăm wưng êgao, êbeh 1 êbâo gŏ sang ƀun, giăm ƀun mâo sang dôk êjai, sang tĭ ƀrôč hlăm čar Lâm Đồng dưi đru lŏ mdơ̆ng mrâo lehanăn mkra mđĭ, hlăm anăn mâo 860 boh sang dưi mdơ̆ng mrâo lehanăn 178 boh sang dưi mkra mđĭ, hŏng ênoh prăk hluê ngă jih jang êbeh 47 êklai prăk. Phŭn mkăp prăk anei dưi mă mơ̆ng “Keh kyua mnuih ƀun” mâo Dhar bruă Mặt trận čar Lâm Đồng tŭ mă mơ̆ng dŭm êpul, mnuih, anôk bruă duh mkra hlăm čar đru mguôp./.

Êpul gĭt gai lăm lui sang dôk êjai, sang tĭ ƀrôč čar Gia Lai mdưm mta kñăm srăng bi leh bruă lăm lui 8.485 sang dôk êjai, sang tĭ ƀrôč hlăm 6 mlan akŏ thŭn 2025. Kluôm čar Gia Lai mâo 8.4785 gŏ sang čiăng mâo klei đru kơ sang dôk, hlăm anăn rŭ mdơ̆ng mrâo 6.828 boh sang leh anăn mkra wĭt 1.657 boh sang hŏng ênoh mĭn tĭng truh 460 êklai prăk.

Hlăm anăn, ngăn prăk mơ̆ng gưl dlông đru 241 êklai prăk. Ară anei dŭm alŭ wăl ti čar Gia Lai dôk mđing tal êlâo đru kơ phung mâo bruă tŭ dưn leh anăn gŏ sang ƀun, mbĭt anăn iêo jak thiăm ai dưi mơ̆ng êpul êya leh anăn lĭng kahan čiăng rơ̆ng hnơ̆ng čuăn đru rŭ mdơ̆ng sang. Hồ Văn Niên, Khua bruă Đảng čar Gia Lai mñă kơ dŭm alŭ wăl bi klă grăp mta bruă, mmông ngă bruă čiăng bi leh djŏ hdră kčah bruă lăm lui sang dôk êjai, bi êdah klei gĭr ktưn mơ̆ng čar hlăm bruă đu kơ mnuih ƀuôn sang bi hơĭt klei hdĭp.