Mơ̆ng dŭm hruê akŏ mlan 7 ti ƀuôn hgŭm Xuân Hương - Đà Lạt, čar Lâm Đồng, phung mda asei alŭ wăl gĭr mkŏ mjing dŭm bruă ngă “Hdơr knga tla ai” êmuh hrăm, mđĭ ai gŏ sang knŭk kna dlăng ba; hwai mdoh, myơr ƀrui mngưi ti wăl msat phung êngiă asei. Amai Nguyễn Thị Thúy, Khua dlăng bruă Êdam êra Êpul mnuih ƀuôn sang alŭ 9, brei thâo, anei amâo djŏ knŏng jing bruă ngă hdơr knga ôh, ƀiădah lŏ jing klei hriăm mtô bi hriăm jăk kơ klei khăp kơ ala čar leh anăn bruă klam mơ̆ng phung mda asei hruê anei:

 “Hmei bi hgŭm hŏng Anôk bruă gĭt gai mơ̆ng êpul hgŭm nao čhưn hŏng dŭm gŏ sang knŭk kna dlăng ba ti alŭ wăl čiăng đru kơ phung êdam êra bi êdah klei hdơr knga kơ phung nao êlâo. Êngao kơ bruă anăn snăn hmei lŏ hwai mdoh, myơr brui mngưi ti wăl msat phung êngiă asei. Dŭm gưl snei grăp thŭn jing gưl jăk kơ hmei mtô bi hriăm klei khăp kơ ala čar leh anăn ai tiê đua klam kơ phung êdam êra ti anôk bruă hmei”.

Bi êdah ai tiê hdơr knga hĭn kơ phung nao êlâo kyua bruă bi kdơ̆ng mtlaih êngiê djuê ana, răng mgang čar kwar leh anăn mkŏ mjing lăn čar hruê anei, hlăm dŭm hruê anei Êpul êdam êra ƀuôn hgŭm Xuân Hương - Đà Lạt iêô mkrum ai ktang phung hlăk ai hlăm dŭm bruă ngă klă sĭt, lar bra ai tiê “Mnăm êa hdơr kơ hnoh”. Khua êdam êra ƀuôn hgŭm Thái Thị Thu Thắm, brei thâo, dŭm bruă ngă mâo klei mđing jih ai tiê, đua klam mơ̆ng 106 êpul êdam êra hŏng êbeh 5000 čô êdam êra:

Ƀri gưl 78 thŭn hruê phung kahan êka êkeh - êngiă asei 100% êpul êdam êra mrâo êgao ăt ngă leh dŭmn kdrêč bruă, msĕ si nao hwai mdoh wăl hdĭp mda, wăl msat phung êngiă asei; mkŏ mjing bruă ngă êmuh hrăm phung gŏ sang mâo ai hŏng lăn čar, gŏ sang knŭk kna dlăng ba ti kluôm ƀuôn hgŭm. Êngao anăn, êpul êdam êra đru kơ gŏ sang phung mâo ai hŏng lăn čar msĕ si msir mgaih hră mơar gŏ sang ka dưi ngă.”

Dŭm bruă ngă sĭt mơ̆ng phung êdam êra ƀuôn hgŭm Xuân Hương - Đà Lạt leh anăn čar Lâm Đồng hlăm dŭm hruê mlan 7 ba leh klei mơak, mgei ai tiê kơ lu phung kahan hđăp, kahan êka êkeh, phung pioh leh jih ênuk mda asei kơ klei êđăp ênang, klei êngiê mơ̆ng lăn čar. Phan Xuân Khanh, 74 thŭn, kahan êka êkeh gưl 3/4, mgei ai tiê:

Phung awa khua thŭn leh wĭt mdei mă bruă leh ƀiădah truh hruê 27/7 snăn hlăm ai tiê ăt hur har kyua hruê anei jing hruê kluôm ala hdơr knga kơ phung săn leh asei wơr pô kơ lăn čar. Leh anăn mâo hruê anei ăt kyua klei săn asei, duh myơr mơ̆ng phung jhŏng ktang, gŏ sang săn asei kyua klei êngiê mơ̆ng čar kwar”.

Čar Lâm Đồng mâo êbeh 21.000 čô êngiă asei, êbeh 11. 000 čô kahan êka êkek, 2.460 čô amĭ Việt Nam jhŏng ktang (ară anei 17 čô amĭ adôk hdĭp) hŏng dŭm pluh êbâo čô mâo ai hŏng lăn čar. Hdơr knga êlam kơ phung luč liê, săn asei kyua phung nao êlâo, Y Thanh Hà Niê Kđăm, Khua hlăm bruă Đảng gưl dlông, Khua gĭt gai bruă Đảng čar, Khua Êpul bi ala Bruă kƀĭn ala gưl XV čar Lâm Đồng bi mklă, srăng lŏ dơ̆ng kriê dlăng kluôm hĭn kơ dŭm gŏ sang knŭk kna dlăng ba:

 “Hmei thâo săng kơ ya klei dưi ngă ăt ka dưi đru jih kơ klei luč liê, săn asei prŏng prĭn mơ̆ng digơ̆ leh anăn gŏ sang phung mâo ai hŏng lăn čar. Kyua anăn, hlăm wưng kơ anăp, Bruă Đảng, bruă sang čư̆ êa leh anăn mnuih ƀuôn sang ti čar srăng lŏ dơ̆ng gĭr hĭn čiăng mđĭ hnơ̆ng klei hdĭp mda mnơ̆ng dhơ̆ng, ai tiê kơ phung mâo ai hŏng lăn čar, amâo brei hlei pô lui ti tluôn hlăm hdră mkŏ mjing leh anăn mđĭ kyar mơ̆ng čar pô”.

 Bruă ngă hdơr knga kơ dŭm gŏ sang knŭk kna dlăng ba, găp djuê phung êngiă asei, phung mâo ai hŏng lăn čar hlăm dŭm hruê mlan 7 ti čar Lâm Đồng amâo djŏ knŏng gưl čiăng hdơr ôh, ƀiădah lŏ mđĭ hlăm grăp ai tiê mnuih ƀuôn sang alŭ wăl, boh nik phung mda asei kơ klei khăp kơ lăn čar, ai tiê ktưn hưn kơ djuê ana mơ̆ng anăn hdĭp jăk hĭn, tŭ dưn hĭn. Dŭm hdră êlan klă sĭt mđing kơ anôk phŭn, msĕ si klei đru kơ sang dôk, kriê dlăng klei suaih pral, mjing bruă mă, đru kơ klei hdĭp mda gŏ sang, găp djuê phung êngiă asei, phung mâo ai hŏng lăn čar ti čar Lâm Đồng dôk đru mguôp kriê pioh leh anăn lŏ čuê knhuah gru “Hdơr knga tla ai”; “mnăm êa hdơr kơ hnoh” mơ̆ng djuê ana.