https://vov4.vov.vn/ede/hdra-mtrun-leh-anan-klei-hdip-chinh-sach-cuoc-song/lam-lui-sang-ti-ruc-mko-mjing-ai-tie-dao-knang-ti-dum-buon-sang-lan-dap-kngu-492154.vov4

Nguyễn Đức Lực, pô ngă bruă mkŏ mkra ti ƀuôn hgŭm Ia Ko, čar Gia Lai dôk ngă 10 boh sang kơ dŭm gŏ sang ƀun hŏng ênoh 60 êklăk prăk sa boh sang. Dŭm boh sang dôk hlăm wưng dơ̆ng leh ƀiădah knŏng mrâo mâo mă dŭm ênoh prăk tla bi hmô. Nguyễn Đức Lực brei thâo, lăm lui sang dôk êjai jing hdră bruă prŏng, kyuanăn ñu amâo mâo tĭng mka lu ôh:

“Jih jang mnuih ƀuôn sang hrăm mbĭt lăm lui sang dôk êjai, pô sa ai ngă mbĭt yơh. Pô yua sa ênoh duh bi liê čiăng đru kơ mnuih ƀuôn sang tla nư blei mnơ̆ng ƀrư̆ ƀrư̆. Pô mkŏ mjing bruă mă čiăng mnuih ƀuôn sang mă bruă mbĭt, jah rơ̆k amâdah pĕ kphê ti hma pô, pô yap prăk mưn brei digơ̆ tla ƀrư̆ ƀrư̆ hluê thŭn. Diñu tla ƀrư̆ ƀrư̆ 2 3 thŭn jih yơh.”

Nao mbĭt hŏng alŭ wăl, hrăm mbĭt hŏng mnuih ƀuôn sang găn klei dleh dlan, Viettel Kon Tum lu thŭn êgao nao hgŭm hur har hlăm bruă bi hơĭt klei hdĭp yang ƀuôn, boh nik hlăm hdră lăm lui sang dôk êjai, sang tĭ ƀrôč – sa hdră prŏng yuôm bhăn mơ̆ng Khua knŭk kna mtrŭt mjhar. Diệp Trung Kiên – Khua knơ̆ng bruă Viettel Kon Tum (êlâo dih) brei thâo:

“Sa ai hŏng klei iêo mthưr, hlăm thŭn 2025, Viettel Kon Tum čŏng pô hưn mdah hŏng Êpul grŭp đru kơ čar 5 êklai prăk čiăng ngă hdră lăm lui sang dôk êjai, sang ti ƀrôč leh anăn mkra mđĭ sang dôk kơ dŭm gŏ sang dleh dlan ti alŭ wăl”.

Dŭm knơ̆ng bruă nao hgŭm hŏng bruă đua klam hŏng hdră lăm lui sang dôk êjai, sang tĭ ƀrôč. Klei mtrŭt mjhar bruă klam hŏng bruă kđi čar dŭm čar Lăn Dap Kngư ƀrư̆ hruê ƀrư̆ ktang hĭn. Khădah mâo lu klei dleh dlan kơ ai dưi leh anăn hră mơar lăn kơ bruă lăm lui sang dôk êjai, sang tĭ ƀrôč, ƀiădah čar Gia Lai leh anăn Dak Lak dưi ksiêm dlăng leh anăn grăp čar mâo hdră êlan lăm lui êbeh 8.100 boh sang. Ênoh lu sơnăk, bruă lu mơh, lŏ djŏ mbĭt hlăm wưng bi mŭt mbĭt anôk bruă knŭk kna, ƀiădah dŭm čar ngă ngă ktang phĭt hdră anei, iêo jak ai dưi mơ̆ng gưl dlông truh kơ nah gŭ. Siu Trung – k’iăng khua dhar bruă mặt trận čar Gia Lai brei thâo:

“Êpul gĭt gai kơ hdră lăm lui sang dôk êjai, sang tĭ ƀrôč mâo leh hră iêo mthưr dŭm knơ̆ng bruă, grăp čô hlăm leh anăn êngao čar mtrŭt mjhar čiăng đru mguôp êngao kơ klei đru mơ̆ng gưl dlông. Hluê anăn, bi leh hnơ̆ng čuăn dưi jao leh anăn mâo thiăm ai dưi ngă hdră. Đa đa alŭ wăl čŏng pô mkăp ngăn prăk ngă hdră.Êngao kơ anăn, đru mguôp hruê ai čiăng rơ̆ng ngă bruă djŏ hdră kčah.”

Mơ̆ng hruê 1/7, bruă sang čư̆ êa alŭ wăl klă klơ̆ng ngă bruă, dŭm čar Dak Lak, Gia Lai, Lâm Đồng bi ksiêm dlăng hdră lăm lui sang dôk êjai, sang tĭ ƀrôč, bi klă ngă giăm 20 êbâo boh sang leh anăn 1.900 boh sang dôk dleh kpăk. Dŭm ƀuôn hgŭm mrâo dưi jao bruă klam ngă jih hnơ̆ng, mâo hdră kčah klă klơ̆ng kơ bruă bi leh dŭm boh sang knhal tuč čiăng kơ hdră lăm lui sang dôk êjai, sang tĭ ƀrôč djŏ hdră kčah.

Nguyễn Thị Hồng Hạnh- Khua adŭ bruă duh mkra ƀuôn hgŭm Čuôr Dăng, čar Dak Lak brei thâo, hlăm thŭn 2025, hlăm ƀuôn hgŭm mâo 31 gŏ sang dưi rŭ mdơ̆ng mrâo mâo klei kpăk djŏ tuôm hŏng lăn ala leh anăn hră mơar rŭ mdơ̆ng. Êjai ngă bruă sang čư̆ êa alŭ wăl 2 gưl leh anăn dưi jao bruă klam klă klơ̆ng kơ hdră lăm lui sang dôk êjai, sang tĭ ƀrôč, ƀuôn hgŭm dưi ngă jăk dŭm kdrêč bruă pô:

“Dleh dlan hĭn mơ̆ng mnuih ƀuôn sang kơ lăn mơ̆ng amĭ ama, ayŏng adei brei amâdah lŏ čuê ƀiădah ka mlih anăn, mbha čuê, đa đa dôk ti lăn hma ka bi mlih. Kyuanăn, hmei đru kơ mnuih ƀuôn sang ngă hră mơar, leh anăn mbha čuê leh anăn kơh mlih anăn amâodah mlih jing lăn dôk. Hŏng dŭm hră mơar rŭ mdơ̆ng, phung mă bruă ngă hră mơar, dŭm ênoh prăk jia djŏ tuôm hŏng bruă rŭ mdơ̆ng sang dôk dưi lui jih.”

Dŭm klei gĭr mơ̆ng bruă sang čư̆ êa, mnuih ƀuôn sang leh anăn knơ̆ng bruă, hdră lăm lui sang dôk êjai, sang tĭ ƀrôč ti Lăn Dap Kngư dưi ngă hrăm mbĭt. Khua bruă Đảng dŭm čar klă anăp jing pô gĭt gai, rơ̆ng kơ klei kñăm hĭn hlăm bruă ruh mgaih dŭm klei dleh kpăk, mtrŭt bi pral hdră. Nguyễn Đình Trung, Khua hlăm bruă Đảng gưl dlông, Khua bruă Đảng čar Dak Lak brei thâo, mâo dŭm mông mĭndah amâo mâo dưi rơ̆ng djŏ hdră kčah hdră lăm lui sang dôk êjai, sang tĭ ƀrôč, kyua mnuih ƀuôn sang knŏng mâo lăn hma amâodah dôk hlăm anăn găp djuê. Ƀiădah hŏng klei sa anăn mơ̆ng dlông truh kơ anh gŭ, klei gĭt gai găl guôp, dŭm klei dleh kpăk dưi ruh mgaih:

“Êpul bruă Đảng čar Dak Lak uêñ mĭn kơ boh klei anei. Dlăng kơ klei găl hlăm boh sĭt ti alŭ wăl, bruă Đảng čar mkŏ mjing leh Êpul gĭt gai rŭ mdơ̆ng sang dôk kơ gŏ sang ƀun leh anăn gŏ sang knŭk kna dlăng ba. Bruă Đảng čar gĭt gai bruă sang čư̆ êa čar, dŭm knơ̆ng, dhar bruă ngă ktang phĭt hdră êlan anei, si srăng ngă čiăng tŭ dưn, djŏ hdră kčah, djŏ pô”.

Grăp boh sang kjăp dưi rŭ mdơ̆ng ti dŭm ƀuôn êlan Lăn Dap Kngư, amâodjŏ knŏng đru kơ mnuih ƀuôn sang mâo anôk dôk hơĭt, ƀiădah lŏ ksul mbŭ klei đăo knang hlăm dŭm hdră êlan djŏ guôp, jĕ giăm hŏng mnuih ƀuôn sang. Nah tluôn anăn jing klei bi mguôp kjăp plah wah gưl dlông leh anăn alŭ wăl, jing ai tiê mơ̆ng êpul bruă kahan ksiêm, lĭng kahan, bruă sang čư̆ êa nah gŭ, knơ̆ng bruă leh anăn mnuih ƀuôn sang bi đru mguôp.