Tĭng truh kơ jih 3 mlan gưl 1 thŭn 2025, kluôm čar Dak Nông mâo 70.671 gŏ sang čan prăk ti Knơ̆ng prăk đru ba yang ƀuôn, hŏng ênoh čan truh giăm 4.800 êklai prăk. Hlăm anăn, mâo êbeh 24 êbâo gŏ sang mnuih djuê ƀiă, êbeh 1.655 êklai prăk. Păt čiăng jih gŏ sang ba yua tŭ dưn. Gŏ sang K’Biêng, ti ƀuôn Phai Kol Pruđăng, să Dak Nia, ƀuôn prŏng Gia Nghĩa, mâo 2 ha lăn. Gŏ sang ñu čan 90 êklăk prăk mơ̆ng Knơ̆ng prăk đru ba yang ƀuôn čiăng duh bi liê pla kphê lehanăn tiêu ba wĭt boh tŭ dưn.

“Thŭn anei, kphê mâo hlăm brô 2,5 – 3 ton kphê asăr, lehanăn wăt tiu đa. Čhĭ mâo mơ̆ng 200 – 250 êklăk prăk/thŭn. Jih jang kyua mâo phŭn mkăp prăk duh bi liê bruă pla mjing mơ̆ng knơ̆ng prăk đru ba yang ƀuôn lu thŭn êlâo. Mrâo anei, kâo lŏ čan 12 êklăk prăk čiăng ktir ƀăng êa, blei brŏng mgơ̆ng êa, mơ̆ng anăn rơ̆ng mâo djăp êa, rơ̆ng klei suaih pral kơ gŏ sang”.

Truh kơ ară anei, ênoh ngăn prăk mơ̆ng knơ̆ng prăk đru čung ba yang ƀuôn čar  Gia Lai mâo truh 7.631 êklai prăk, đĭ 153 êklai prăk mkă hŏng akŏ thŭn, hlăm anăn prăk alŭ wăl truh 598 êklai prăk. Phung knuă druh ngă bruă brei čan prăk mâo bi mguôp leh kjăp hŏng knuă druh dŭm êpul bruă kđi čar – yang ƀuôn, hŏng dŭm êpul bruă mkiêt mkriêm prăk, lehanăn brei čan prăk hlăm ƀuôn sang. Kyuanăn, jih jang dŭm gŏ sang mâo čan prăk ba yua prăk anăn djŏ hdră. Khua mduôn Ksor Biếc ti ƀuôn Rơng, să Pờ Tó, kdriêk Ia Pa brei thâo.

“Êlâo dih kâo čar prăk ti knơ̆ng prăk blei êmô, kâo čan 30 êklăk prăk, leh anăn blei 3 drei êmô. 5 thŭn êdei kâo čhĭ êmô mă prăk tla kơ knơ̆ng prăk, lehanăn kâo dưi tla leh ênŭm prăk čan. Ară anei kâo gĭr duah ƀơ̆ng yơh.”./.