Yan hjan angĭn êbŭ thŭn dih, dŭm gưl angĭn đrŭng ktang ngă leh kơ sang Nguyễn Thị Dung (krĭng Sơn Hà, wăl krah Na Dương, kdriêk Lộc Bình, čar Lạng Sơn) ring čiăng êbuh. Čhuang mŭt hlăm yan puih, angĭn êăt thut hlăm ƀăng mtih, ba hriê klei êăt hră hlămn sa boh sang điêt anăn. Khădah gĭr jih ai tiê mkuôm pioh mơ̆ng lu thŭn, ƀiădah kyua klei hdĭp dleh dlan, snăn klei čiăng mdơ̆ng sang mơ̆ng ñu, čiăng kơ pưk sang krĭp angĭn êăt, mđiă mtrang amâo mâo dưi ngă ôh… Kyuanăn, Tết anei, mâo drông thŭn mrâo hlăm sa boh sang prŏng 40m2 mtih kjăp, čuôr krĭp, tur sang ƀlia, ñu bŏ hŏng klei mơak tơl amâo mâo pĭt lu mlam:

 “Ama ñu tuôm hŏng klei ruă êbuh sa anôk mơ̆ng thŭn 1991, kâo ăt lĕ hlăm klei dju djuăm duam ruă mơh jih thŭn mlan, mtâo mniê êbuh mơh djiê leh 2 thŭn hŏng anei, knŏng hjăn anak êkei duh ƀơ̆ng mă bruă knuă rông 5 čô mnuih hlăm sang, snăn klei hdĭp lĕ nanao hlăm klei dleh dlan. Mơ̆ng leh mâo hdră êlan đru lăm lui sang hlang mtih kđuh, sang hluh ƀrôč, Đảng, Knŭk kna, Phŭn bruă kahan ksiêm, dŭm knơ̆ng dhar bruă lehanăn êpul êya, mbĭt hŏng phung thâo bi đru, đru mdơ̆ng brei leh sa boh sang kjăp siam, gŏ sang kâo bŏ hŏng klei mơak êdi”.

 Hŏng hdră “amâo mâo lui sa čô mnuih ti tluôn ôh”, kdrtiêk Lộc Bình, čar Lạng Sơn hlăk dôk mdơ̆ng 292 boh sang kjăp kơ dŭm gŏ sang dôk hlăm klei dleh dlan, giăm ƀun, gŏ sang knŭk kna dlăng ba. Grăp boh sang mâo ênoh bi liê 110 êklăk prăk, hlăm anăn phŭn bruă kahan ksiêm đru 70 êklăk prăk. Trịnh Tuấn Đông, Khua knơ̆ng bruă sang čư̆ êa kdriêk Lộc Bình, čar Lạng Sơn brei thâo dŭm alŭ wăl hlăm kdriêk hlăk dôk bi tiŏ êran hŏng hrue mmông, čiăng bi leh djŏ hŏng ênoh kčah.

“Klei hlue ngă hdră mtrŭn đru mlăm lui jih sang hlang mtih kđuh sang hluh ƀrôč jing hdră êlan prŏng mơ̆ng Đảng lehanăn knŭk kna, jing yuôm bhăn snăk, đru kơ mnuih ƀuôn sang dôk hlăm klei dleh dlan, gŏ sang knŭk kna dlăng ba, mâo leh dŭm gưl bi sa ai. Drei hlăk bi đru mguôp lăm lui jih sang tĭ rưč kơ mnuih ƀuôn sang, mđup brei kơ mnuih ƀuôn sang thhŭn mrâo klă sĭt h’uh mđao. Hlăm klei ngă bruă anei mtrŭt mjhar jih jang mnuih brei mâo klei thâo bi đru, mâo ƀiă mguôp ƀiă, mâo lu mguôp lu, kñăm čiăng dưi mdơ̆ng ênŭm 292 boh sang đru kơ mnuih ƀuôn sang drông Tết Nguyên đán klă sĭt mơak mñai h’uh mđao’.

Yap truh kơ hrue 17/12/2024, Knơ̆ng bruă măjt trận čar Lạng Sơn mâo tŭ mă leh êbeh 77 êklai prăk, hlăm anăn mâo bi lie leh êlâo kơ dŭm kdriêk mdơ̆ng sang mrâo kơ dŭm gŏ sang dleh dlan hŏng ênoh jih jang giăm 51 êklai prăk. Ênoh jih jang mâo đru sang dôk jing êbeh 2.400 gŏ sang, klei dôk rŭ mdơ̆ng mâo leh  80%.

Hồ Tiến Thiệu, Khua knơ̆ng bruă sang čư̆ čar Lạng Sơn lač čar ktưn lăm lui truh giăm 2.500 boh sang tĭ rưč, hlang hluh ƀrôč kơ dŭm gŏ sang ƀun, giăm ƀun, gŏ sang knŭk kna dlăng ba mâo klei hdĭp dleh dlan… êlâo kơ mlan 4/2025:

 “Hmei mđing hĭn êdi čiăng lăm lui jih sang hlang mtih kđuh, sang hluh ƀrôč hlăm thŭn 2024-2025, mâo iêo mkrum leh mơ̆ng dŭm êpul bruă yang ƀuôn, hŏng ênoh jih jang mâo mkrum êbeh 160 êklai prăk. Ară anei bruă hlăk dôk ngă bŏ hŏng klei jăk, djŏ hŏng hdră kčah, hŏng klei khua knŭk kna kiă kriê, mjing leh klei bi ktưn hlăm kluôm yang ƀuôn, čiăng kơ jih jang mnuih mđrăm mbĭt mă bruă, amâo mâo lui hjăn kơ sa êpul bruă ôh, bruă ngă anei lar hlăm djăp êpul êya bruă, mjing klei thâo bi đru , klei mơak hlăm mnuih ƀuôn sang. Anei jing bruă ngă bŏ hŏng klei yuôm bhăn, bi êdah klei   Đảng lehanăn knŭk kna dru kơ mnuih ƀuôn sang, boh nik hŏng dŭm gŏ sang dôk hlăm klei dleh dlan. Dŭm gŏ sang ka mâo ôh sang kjăp, snăn truh Tết Ất Tỵ anei srăng mâo sang dôk mrâo, anei jing klei mđĭ ai prŏng hŏng dŭm gŏ sang hlăm alŭ wăl”.

 Yan mnga mrâo hlăk hlê truh, dŭm boh sang bi đru mâo mdơ̆ng leh amâo mâo djŏ knŏng ba klei yuôm bhăn bi êdah klei bi mguôp đuič ôh, ƀiădah lŏ jing klei mđi ai kơ mnuih ƀuôn sang čư̆ čhiăng hlăm čar Lạng Sơn hơĭt ai tiê duh ƀơ̆ng, kpưn đĭ klei kơ ƀun./.