Leh lu thŭn hdĭp hlăm sang điêt tĭ rưč, hjan êa ƀrôč, angĭn thŭt êăt, gŏ sang Siu Hoàng (mnuih djuê ana Jarai) ti să Ia Mơ, kdriêk Čư̆ Prông, čar Gia Lai dưi mâo leh sa boh sang dôk kjăp, êđăp ênang. Mŭt hlăm sang mrâo mơ̆ng lĭng kahan knông lăn čar Gia Lai đru rŭ mdơ̆ng. Siu Hoàng mgei ai tiê brei thâo:

 “Lĭng kahan knông lăn, knŭk kna uêñ mĭn rŭ mdơ̆ng kơ gŏ sang kâo sang dôk mrâo. Gŏ sang kâo hơ̆k mơak êdi”.

Mơ̆ng klei đru mguôp mơ̆ng knuă druh, lĭng kahan mbĭt hŏng klei hrăm mbĭt mơ̆ng phung mâo ai tiê kmah, lĭng kahan knông lăn čar Gia Lai dôk rŭ mdơ̆ng 10 boh sang đru kơ mnuih ƀuôn sang mâo klei hdĭ dleh dlan ti alŭ wăl knông lăn Grăp boh sang mâo ênoh đru 70 êklăk prăk, lĭng kahan lŏ đru mguôp thiăm mnơ̆ng yua leh anăn hruê ai mă bruă, rơ̆ng dưi rŭ mdơ̆ng sang mâo kjăp siam hĭn. Đại tá Trần Tiến Hải, khua gĭt gai lĭng kahan knông lăn čar Gia Lai brei thâo bruă msir lăm sang dôk êjai, sang tŭ rưč amâo djŏ knŏng đru kơ mnuih ƀuôn sang mâo anôk dôk kjăp, bi hơĭt klei hdĭp, ƀiădah lŏ đru mkŏ mjing klei khăp lĭng kahan mnuih ƀuôn sang kjăp hĭn, răng mgang kjăp klei dưi kiă kriê, klei êđăp ênang knông lăn.

"Hlăm dŭm thŭn êgao, hmei kñăm kơ boh klei anei, čiăng iêo mthưr klei đru mguôp kơ knuă druh, lĭng kahan leh anăn phung mâo ai tiê kmah. Hmei ƀuh klă bruă klam hŏng mnuih ƀuôn sang ti knông lăn, čiăng bi hdơr klei khăp mơ̆ng mnuih ƀuôn sang hŏng lĭng kahan knông lăn”.

Mrâo anei Phŭn bruă lĭng kahan mâo leh hră mơĭt jao kơ kahan alŭ wăl 5, Quân đoàn 34, Binh đoàn 15 đru kơ mnuih ƀuôn sang Gia Lai msir lăm sang dôk êjai, sang tĭ rưč. Dlăng hlăm boh sĭt, dŭm anôk bruă lĭng kahan đru kơ mnuih ƀuôn sang rŭ mdơ̆ng mrâo, mkra mđĭ sang dôk, hluê ngă hdră bhiăn leh anăn mâo klei êđăp ênang. Dưi thâo, êlâo kơ mâo hdră hlăm lui sang dôk êjai, sang tĭ rưč hlăm lăn čar, êpul lĭng kahan mâo leh hdră êlan đru kơ mnuih ƀuôn sang mkra sang. Hluê si klei hưn, 5 thŭn êgao, Quân đoàn 34 leh anăn Binh đoàn 15 bi mguôp hŏng gưl bruă Đảng nah gŭ, bruă sang čư̆ êa alŭ wăl, ksiêm dlăng, rŭ mdơ̆ng, mkra mđĭ leh anăn ba jao êbeh 1.000 boh sang kơ dŭm gŏ sang ƀun ti dua čar Gia Lai leh anăn Kon Tum.

Mrâo anei, hdră Mlan 3 knông lăn ăt dưi mkŏ mjing ti kdriêk Knông Lăn Đức Cơ, čar Gia Lai, hŏng lu mta bruă tŭ dưn, hlăm anăn mâo bruă đru kơ mnuih ƀuôn sang lăm lui sang dôk êjai, sang tĭ rưč. Ayŏng Đỗ Đức Thanh, k’iăng khua bruă đoàn čar Gia Lai brei thâo.

 “Hmei ăt iêo mkrum đru mkra mđĭ sang dôk, nao hgŭm hlăm hdră lăm lui sang dôk êjai, sang tĭ rưč. Hdră thŭn anei êngao kơ klei hrăm mbĭt hŏng dŭm anôk bruă ƀuôn prŏng Hồ Chí Minh ăt mâo klei hrăm mbĭt mơ̆ng dŭm anôk bruă hlăm čar, hluê anăn brei ƀuh klei uêñ mĭn mơ̆ng dŭm êpul êya, grăp čô čiăng đru mguôp kơ ƀuôn sang, mkŏ mjing ƀuôn sang ƀrư̆ hruê ƀrư̆ mdrŏng ktang”.

Truh kơ ară anei, čar Gia Lai dưi rŭ mdơ̆ng mrâo leh anăn mkra mđĭ êbeh 2.000 boh sang hlăm hdră msir lăm sang dôk êjai, sang tĭ rưč. Hŏng mta kñăm rŭ mdơ̆ng êbeh 8.400 boh sang hlăm hdră êlâo kơ yan hjan thŭn anei. Gia Lai iêo jak leh lu ai dưi mơ̆ng yang ƀuôn. Hlăm anăn, mâo knơ̆ng bruă hŏng keh prăk đru kơ mnuih ƀun ƀin čar, đru leh 10 êklai prăk. Phŭn bruă kahan ksiêm đru êbeh 201 êlai prăk leh anăn bruă sang čư̆ êa čar Gia Lai mkăp brei 211 êklai prăk. Bruă sang čư̆ êa dŭm kdriêk, wăl krah, ƀuôn prŏng dưi jao bruă bi mguôp hŏng dhar bruă mặt trận čar tŭ mă leh anăn mkăp brei ênoh prăk yang ƀuôn, hnưm bi leh mta kñăm msir lăm sang dôk êjai, sang tĭ rưč hlăm alŭ wăl. K’iăng khua bruă sang čư̆ êa čar Gia Lai, aduôn Nguyễn Thị Thanh Lịch brei thâo:

 “Hmei bi klă hluê ngă hrăm mbĭt, ti anôk dleh ruh mgaih tinăn. Hmei kñăm jih ai dưi hluê ngă hdră anei. Hluê anăn êngao ngăn prăk dưi mkăp brei, čar lŏ iêo jak ai dưi mơ̆ng lĭng kahan, mnuih ƀuôn sang, êpul êya leh anăn knơ̆ng bruă čiăng hrăm mbĭt rŭ mdơ̆ng dŭm boh sang dôk kjăp kơ mnuih ƀuôn sang. Čar Gia Lai mdưm klei kñăm, mĭn tĭng truh mlan 6/2026 srăng bi leh bruă msir lăm sang tĭ rữč hlăm alŭ wăl čar”.