Mâo hŏng anei 60 thŭn, hrue 15/4/1965, Knơ̆ng kiă kriê kahan ksiêm yang ƀuôn, ară anei pia jing kahan răng mgang knông lăn, mâo tiŏ nao leh phung knuă druh kjăp hlăm bruă mơ̆ng dŭm boh čar nah Dưr hriê đru kơ čar Gia Lai. Truh kơ mlan 7 thŭn anăn mơh, êpul răng mgang klei êđăp ênang čar Gia Lai mâo mkŏ mjing mbha ngă hlăm 3 gưl, ngă dŭm mta bruă msĕ si: Bi rai klei jhat, mkhư̆ phung lhiăr, răng mgang mnuih ƀuôn sang, bi rai klei gang mkhư̆, sua mă klei dưi êngiê. Hlăm dăl 10 thŭn êlâo kơ hrue mâo klei êngiê, êpul anei nao leh hlăm dŭm kdrăn bi blah điêt prŏng, ngă djiê lehanăn êka dŭm dŭm êtuh čô phung roh, mđrăm mbĭt hŏng mnuih ƀuôn sang hlăm kluôm ala mhluh lir lăn čar.  

Êdei kơ thŭn 1975, êpul kahan răng mgang knông lăn čar Gia Lai lŏ dơ̆ng răng mgang kjăp klei êđăp ênang ti knông lăn, bi kdơ̆ng hŏng phung Khmer hrah. Ară anei, kahan răng mgang knông lăn čar hlăk dôk kiă kriê êbeh 80km kdriêl knông lăn bi knông hŏng čar Rattanakiri (Campuchia), hlăm alŭ wăl mâo 7 boh să, dôk hlăm 3 ktuê knông lăn. Dôk hlăm klei dleh dlan, kahan răng mgang knông lăn čar Gia Lai ăt bi leh jăk bruă ngă mdua mtam: Răng mgang kjăp klei êđăp ênang knông lăn êjai, lehanăn mđĭ kyar bruă duh mkra êjai, mbĭt anăn hgŭm hlăm bruă duh mkra ala ƀuôn.

Hŏng lu bruă mâo ngă hlăm klei bi đru: Msĕ si atăt adei nao sang hră, sang h’uh mđao kơ mnuih ƀun ti knông lăn – êmô mjeh kơ mnuih ƀun… kahan răng mgang knông lăn mâo đru leh kơ mnuih ƀuôn sang hdră duh ƀơ̆ng, rŭ mdơ̆ng krĭng knông lăn mđrăm mbĭt hŏng mnuih ƀuôn sang hơĭt kjăp, mâo klei bi jưh knang dua nah mnuih ƀuôn sang hŏng lĭng kahan hlăm krĭng knông lăn.

   Ƀri wưng anei, knơ̆ng kiă kriê kahan răng mgang knông lăn čar Gia Lai mâo klei myun tŭ mă mêđai răng mgang lăn čar mrô 2 mơ̆ng khua lăn čar, kyua mâo đru mguôp leh prŏng prĭn hlăm bruă răng mgang klei dưi êngiê kơ lăn čar, klei êđăp ênang ti knông lăn. Khua knơ̆ng bruă sang čư̆ êa čar ăt mđup brei hră bi mni kơ 6 êpul, lehanăn kơ 9 čô jing kdlưn hĭn, mâo lu klei đru mguôp hlămn bruă răng mgang klei êđăp ênang knông lăn. Thượng tá Ngôn Ngọc Cương, Khua knông răng mgang knông lăn Ia Puch, kdriêk Chư Prông – sa hlăm dŭm čô mnuih mâo tŭ mă klei pah mni – yăl dliê:

 “Asei mlei kâo myun mâo knơ̆ng bruă sang čư̆ êa čar mđup brei hra bi mni ƀri bi hdơr 60 thŭn. Wưng kơ anăp kâo srăng mbĭt hŏng êpul êya, gưl bruă Đảng, êpul khua kiă kriê kđông, mđing bi leh jăk bruă čuăn răng mgang kjăp klei dưi êngiê knông lăn. Jih ai tiê kiă kriê gĭt gai lĭng kahan hiu suang êwăng hlăm knông lăn răng mgang klei êđăp ênang. Hâo hưn, mtrŭt mjhar mnuih ƀuôn sang hlue ngă hdră êlan mơ̆ng Đảng, klei bhiăn knŭk kna”.

Blŭ hrăm ti knăm anei, Thiếu tướng Nguyễn Đức Mạnh, K’iăng khua knơ̆ng bruă kahan răng mgang knông lăn bi mni, lehanăn hơêč hmưi kơ dŭm boh tŭ dưn mơ̆ng dŭm gưl ênuk kahan răng mgang knông lăn čar Gia Lai mâo leh hlăm 60 thŭn, rŭ mdơ̆ng, bi blah, lehanăn đĭ kyar. Ñu mñă, găn hlăm dŭm gưl ênuk kahan răng mgang knông lăn čar mâo bi kjăp nanao hlăm klei mkŏ mjing, rŭ mdơ̆ng kđông, anôk kiă kriê hŏng klei kjăp, mđĭ klei thâo hlăm êpul knuă druh lĭng kahan bi leh jăk bruă čuăn hlăm boh klei mrâo ară anei.

Ti knăm anăn, Hồ Văn Niên, Khua bruă Đảng čar Gia Lai blŭ bi mni bruă klam mơ̆ng kahan răng mgang knông lăn, hlăm bruă pô răng kriê klei êđăp ênang, rŭ mdơ̆ng lehanăn răng mgang krĭng knông lăn ti Lăn dap kngư. Mñă kahan răng mgang knông lăn čar Gia Lai dưn yua leh jih bruă klam pô hlăm bruă răng kriê klei êđăp ênang ti knông lăn, đru hlăm bruă mđĭ kyar klei duh mkra lehanăn klei hdĭp mda ti dŭm alŭ wăl taih kbưi.

Khua bruă Đảng čar Gia Lai mta hlăm wưng tinăp, bruă Đảng, knơ̆ng bruă kiă kriê kahan răng mgang knông lăn čar lŏ dơ̆ng bi hgŭm kjăp hĭn hŏng dŭm knơ̆ng dhar bruă êpul êya hlăm čar, lehanăn êpul kahan răng mgang knông lăn ala čar Campuchia ngă djăp hdră bi hgŭm răng mgang kjăp klei êđăp ênang ti knông lăn, mâo klei hâo hưn, mtô mblang kčĕ đru, mđĭ klei thâo săng hlăm phung knuă druh, đảng viên lehanăn mnuih ƀuôn sang kơ bruă thâo bi răng kriê klei êđăp ênang, klei dưi êngiê kơ lăn čar, bruă klam mơ̆ng kahan răng mgang knông lăn hlăm wưng tinăp./.