Mmông tlam, leh mrâo wĭt sang hră, Nguyễn Thùy Dương – dôk hriăm adŭ 6, sang hră gưl 2 Cát Khánh 9 ƀuôn hgŭm Đề Gi, čar Gia Lai) pral kdal êmiêt hruôm hră, kuič pui knă êsei, đru kơ ama dôk êwiên. Hlăm sang dôk tĭ rưč, klei hdĭp 2 ama anak knŏng knang kơ bruă mkra êdeh wai jơ̆ng hŏng ênoh prăk ba wĭt knŏng ƀiă. Thâo kơ klei anăn, mơ̆ng thŭn 2024, kđông kahan knông lăn Cát Khánh ( hlăm êpul gĭt gai lĭng kahan čar Gia Lai) ngă bruă đru rông ba Dương hlăm hdră Đru adei nao sang hră. Grăp mlan đru kơ adei 500.000 prăk, mbĭt hŏng braih, ƀung krô leh anăn hdruôm hră. Klei ngă kơ ama anak Dương mgei ai tiê hĭn jing klei uêñ mĭn, čuă êmuh, mđĭ ai, đru kơ dua ama anak mâo klei hơĭt kjăp hĭn:

Kâo khăp êdi kơ phung amiêt, diñu brei prăk leh anăn mñơng yua hriăm hră čiăng kơ kâo nao sang hră. Diñu lač ya dŏ kbah hưn brei blei, kâo lač dŏ thŭn dih adôk mơh, hbil đĭ adŭ kơh lŏ blei čhum ao mrâo.”

Ăt mơ̆ng thŭn 2024 truh kơ ară anei, ti ƀuôn hgŭm Quy Nhơn Đông, Trần Huỳnh Thùy Trang dôk hriăm adŭ 8 ăt jing sa čô mâo kđông kahan knông lăn Nhơn Lý đru rông ba. Ama luč ưm kyua êdeh drăm, Amĭ jing amai Huỳnh Thị Mỹ Hoa hiu mă bruă mưn čiăng rông dua čô anak nao sang hră. Kyua klei đru mơ̆ng phung lĭng kahan knông lăn, grăp mlan Trang mâo 500.000 prăk mbĭt hŏng čhum ao, hdruôm hră hriăm. Klei uêñ mĭn anăn amâo djŏ knŏng đru kơ adei găn klei dleh dlan, ƀiădah lŏ brei boh kdrŭt hriăm hră, lu thŭn jing hđeh hriăm thâo. Amai Hoa - amĭ adei Trang brei thâo:

Gŏ sang hơ̆k mơak êdi, mâo klei uêñ mĭn mơ̆ng phung lĭng kahan amâodah kreh êmuh klei hriăm hră. Kâo mđĭ ai anak êdei anăp hriăm thâo čiăng năng hŏng klei đru mơ̆ng phŭng amiêt, thâo hră êdei anei mă bruă mdul ƀiă. Mrâo anei ñu ăt mâo hră pah mni hriăm thâo, kâo lač hŏng phung amiêt, diñu hơ̆k mơak êdi.”

Hdră atăt adei nao sang hră mâo lĭng kahan knông lă čar Gia Lai ngă mơ̆ng thŭn 2016 truh kơ ară anei, jing leh anôk jưhj knang kơ hđeh sang hră ƀun ƀin ti krĭng knông lăn. 77 čô hđeh mâo klei hdĭp dleh dlan dưi mâo klei đru truh kơ hriăm jih adŭ 12. Mbĭt hŏng đru mnơ̆ng yua, dŭm kđông kahan lŏ ktuê dlăng, mđĭ ai, mtô kơ phung hđeh hlăm klei hriăm hră leh anăn klei hdĭp. Trung tá Nguyễn Hữu Nghị, khua bruă kđi čar kđông kahan knông lăn Cát Khánh, Êpul gĭt gai lĭng kahan knông lăn Gia Lai brei thâo:

“Hmei bi mguôp hŏng Bruă sang čư̆ êa alŭ wăl, sang hră, gŏ sang čiăng thâo kơ klei hriăm hră mơ̆ng diñu hŏng nai kiă adŭ leh anăn gŏ sang čiăng mâo hdră êlan đru, đru kơ diñu mâo klei găl hriăm hră. Wưng hruê knăm, tết leh anăn pŏk thŭn hriăm mrâo anôk bruă đru mâo 12 boh êdeh wai jơ̆ng. Mâo lu phung hđeh leh hriăm jih wĭt hriê čuă leh anăn lač jăk kơ anôk bruă.

Ară anei, hlăm ênoh 77 čô dưi đru rông ba, mâo leh 25 čô dưi mŭt hriăm gưl prŏng, gưl krah ti ƀuôn prŏng Hồ Chí Minh, Đà Nẵng, Huế. Nguyễn Thanh Danh, k’iăng khua Bruă sang čư̆ êa ƀuôn hgŭm Quy Nhơn Đông,  čar Gia Lai brei thâo: Hdră amâo djŏ knŏng đru rơ̆ng klei hơĭt hlăm klei hdĭp yang ƀuôn, ƀiădah lŏ hyuă kjăp klei bi mguôp lĭng kahan mnuih ƀuôn sang, bi lar rup lĭng kahan Awa Hồ ti krah klei hdĭp aguah tlam.

“Klei hmei bi myuôm jing hdră ngă bruă jăk, klă mngač leh anăn hơĭt kjăp mơ̆ng lĭng kahan knông lăn. Diñu amâo djŏ knŏng đru kơ mnơ̆ng yua, ƀiădah lŏ uêñ mĭn, tă hdră, hrăm mbĭt hŏng hđeh sang hră. Hlăm wưng êgao, êpul lĭng kahan knông lăn hur har bi mguôp hŏng Bruă sang čư̆ êa alŭ wăl mtrŭt mjhar knuă druh, lĭng kahan đru mguôp prăk hruê, đru kơ phung hđeh, boh nik jing hđeh êrĭt amĭ ama, mâo klei hdĭp dleh dlan dưi mâo klei găl hriăm hră mơar.”

Ti krĭng knông lăn čar Gia Lai, hdră đru adei nao sang hră mơ̆ng lĭng kahan knông lăn hlăm wưng êgao dưi đru kơ hđeh sang hră ƀun ƀin lŏ dưi nao sang hră. Mơ̆ng klei khăp leh anăn bruă klam, phung lĭng kahan ti knông lăn dôk mbĭt hŏng phung hđeh lŏ čih kač klei hmăng hmưi kơ êdei anăp mngač siam hĭn.