Hŏng 135 gŏ sang mnuih djuê ana Jeh Triêng ti alŭ Dục Nhầy 1, să knông lăn Đăk Dục, kdriêk Ngọc Hồi, čả Kon Tum, phung knuă druh, lĭng kahan kđông kahan knông lăn Dục Nông msĕ si mnuih hlăm gŏ sang. Grăp čô hlăm alŭ mâo klei khăp jăk siam hŏng phung knuă druh, lĭng kahan knông lăn. Ayŏng A Luật, sa čô mnuih ƀuôn sang hlăm alŭ lač sơnei:

“Kđông kahan knông lăn uêñ mĭn kơ dŭm gŏ sang dleh dlan. Đru rông ba phung hđeh điêt. Mâo nanao klei hrăm mbĭt hŏng mnuih ƀuôn sang hlăm să Đăk Dục. kâo ƀuh phung lĭng kahan knông lăn tinei jĕ giăm êdi”.

Amai Xiêng Thị Tuý, khua alŭ Dục Nhầy 1, brei thâo, 3 thŭn êgao Êpul gĭt gai lĭng kahan knông lăn Dục Nông tiŏ nao Thiếu tá Dương Văn Lương hriê ngă bruă hlăm ƀuôn. Bi lar ai tiê, bruă klam mơ̆ng lĭng kahan knông lăn, Thiếu tá Dương Văn Lương đru kčĕ hŏng anôk bruă Đảng ba mdah dŭm hdră mtrŭn mkŏ mjing klei mlih hlăm bruă mkŏ mjing Đảng leh anăn mđĭ hnơ̆ng klei hdĭp mnuih ƀuôn sang. Anôk bruă Đảng alŭ Dục Nhầy 1 mđĭ kyar mâo 2 čô đảng viên mrâo, mđĭ ênoh đảng viên hlăm alŭ jing 19 čô, bi hrŏ ênoh gŏ sang ƀun knŏng adôk mă 6 gŏ êsei:

“Ñu nao hgŭm hur har hlăm bruă mkŏ mjing anôk bruă Đảng mkŏ mjing hdră êlan mơ̆ng anôk bruă leh anăn mta phŭn klei bi kƀĭn lu jơr hĭn, iêo jak phung đảng viên. Êngao kơ dŭm mta bruă anăn ñu ăt hur har đru kơ mnuih ƀuôn sang. Mơ̆ng mâo lĭng kahan đru kơ anôk bruă đảng alŭ, alŭ dưi ênuah ênô kjăp ktang, leh anăn amâo mâo gŏ sang ngă soh hŏng hdră bhiăn lăn čar”.

Čiăng hyuă kjăp hĭn klei khăp lĭng kahan mnuih ƀuôn sang, mkŏ mjing klei kjăp hlăm mnuih ƀuôn sang, mơ̆ng thŭn 2020 truh kơ ară anei, Knơ̆ng gĭt gai lĭng kahan knông lăn čar Kon Tum tiŏ nao leh phung khua kahan, lĭng kahan ti dŭm kđông kahan nao ngă bruă hlăm 13 să knông lăn hŏng Lào leh anăn Campuchia. Hlăm anăn mâo 4 čô knuă druh ngă bruă đảng 4 kdriêk, 13 čô ngă bruă đảng nah gŭ 13 să knôg lăn, 17 čô dưi ruah hlăm Êpul gơ̆ng bruă ƀuôn sang gưl čar, kdriêk, să…

Trung tá A Ngọc Chiến, Kđông kahan knông lăn Đăk Nhoong mâo knơ̆ng gĭt gai lĭng kahan čar Kon Tum tiŏ nao ngă k’iăng khua bruă đảng nah gŭ, khua kiă kriê dhar bruă ksiêm dlăng să knông lăn Đăk Nhoong, kdriêk Đăk Glei brei thâo:

“Kâo đru kčĕ hŏng bruă đảng nah gŭ mâo hdră mtrŭn gĭt gai leh anăn ktrâo lač bruă sang čư̆ êa, mặt trận leh anăn dŭm êpul êya bruă kđi čar yang ƀuôn hrăm mbĭt bi klă dŭm klei bi hmô mđĭ kyar bruă duh mkra, boh nik jing lăm lui dŭm klei bhiăn mluk mgu brei kơ mnuih djuê ƀiă kpưn đĭ kơ mdrŏng. Hmei bi klă jing pla ana êa drao tal êlâo jing Sâm Ngọc Linh, tal 2 jing hmei pla mmao linh chi čiăng ngă tur knơ̆ng đĭ kyar bruă duh mkra”.

Hŏng ai tiê kđông kahan jing sang, knông lăn jing ƀuôn sang, mnuih djuê ƀiă jing ayŏng adei, êpul lĭng kahan knông lăn čar Kon Tum mâo lu mta bruă klă klơ̆ng, hyuă kjăp klei khăp lĭng kahan mnuih ƀuôn sang. Êdah êdi msĕ klei bi hmô mkŏ mjing alŭ Đăk Ga, să Đăk Nhoong, kdriêk Đăk Glei trei mđao êđăp ênang, dŭm hdră bi hơĭt klei hdĭp mnuih ƀuôn sang msĕ si knơ̆ng êa bi êran pui kmlă Đăk Giao-Đăk Long, êa yua Bờ Y, Đăk Long, Đăk Blô, klei bi hmô klam bruă, mjĕ mjing hŏng gŏ sang dleh dlan, đru mđĭ klei bruă duh mkra, đru kơ 74 čô hđeh hlăm hdră atăt adei nao sang hră, 15 čô anak rông kđông kahan knông lăn… Mơ̆ng klei hrăm mbĭt, klei đru mơ̆ng knuă druh, lĭng kahan knông lăn, klei hdĭp mnuih ƀuôn sang ti krĭng knông lăn mơ̆ng čar Kon Tum ƀrư̆ hruê ƀrư̆ mlih mrâo, kjăp hlăm ai tiê mnuih ƀuôn sang.